Juni 25, 2023
Jumapili ya Kumi na Mbili ya Kipindi cha Kawaida (Mwaka A)
Masomo ya Leo
Sikiliza kwa Kiingereza
Yesu aliwaambia wale Kumi na Wawili: “Msimwogope mtu yeyote. Hakuna kilichofichwa ambacho hakitafunuliwa, wala siri ambayo haitajulikana.” Mathayo 10:26
Bwana wetu anasema maneno haya akiwaandaa wale Kumi na Wawili kwa ajili ya mateso yatakayowapata. Kabla ya kifungu hiki, Yesu alisema, “Lakini jihadharini na watu, kwa maana watawapeleka mahakamani na kuwapiga mijeledi katika masinagogi yao, nanyi mtapelekwa mbele ya watawala na wafalme kwa ajili yangu, ili kutoa ushuhuda mbele yao na mbele ya wapagani.” Baada ya kusema mengi zaidi kuhusu mateso yatakayokuja, Yesu anawapa matumaini ya hakika na kuwatia moyo katika kifungu kilicho hapo juu.
Kwanza kabisa, Yesu anazungumzia moja kwa moja jambo mojawapo linalowasumbua watu wengi wanapokabiliwa na namna fulani ya mateso: hofu. Anasema, “Msimwogope mtu yeyote.” Hofu inaweza kumtawala mtu anapokosa imani kwamba Mungu anamtunza, na hivyo kuruhusu wasiwasi na mahangaiko ya moyo yamshike. Tunapoweza kukaza macho yetu kwa Kristo bila kuyageuza na kuyatupilia mbali mashambulizi tunayopata maishani, tutabaki na uhakika katika ukweli wa Mungu wala hatutakatishwa tamaa na uongo.
Yesu pia anajua vizuri sana kwamba hofu inaweza kutulemea. Hali hii hutokea hasa tunapolazimika kuvumilia aina yoyote ya mateso makali au majaribu mazito. Kwa hiyo, anawaambia wale Kumi na Wawili maneno ya faraja ili kuwasaidia kuwa na matumaini. “Hakuna kilichofichwa ambacho hakitafunuliwa, wala siri ambayo haitajulikana.” Maneno haya yanahusu mwisho wa nyakati, Yesu atakaporudi duniani kwa ajili ya Hukumu ya Mwisho. Wakati huo, kila shambulio la udanganyifu ambalo watu wamevumilia litawekwa wazi kabisa ili wote walione. Kila fadhila, hata kila fadhila iliyofichika, pia itadhihirishwa. Mwishowe, ukweli utatawala na wote watahukumiwa kwa Ukweli wa Mungu. Jambo hili linapaswa kuwafariji sana wale waliotendewa dhuluma maishani.
Mateso yana sura nyingi. Bila shaka, mateso yanayoelekezwa kwako kwa sababu ya imani yako ndiyo aina mbaya zaidi ya mateso. Lakini mara nyingi zaidi, mateso huja kwa namna nyingine. Wivu dhidi ya mtu mwingine unaweza kusababisha kusengenya juu yake. Kufichua hadharani dhambi za mtu mwingine ni dhambi ya kumvunjia heshima na ni aina ya mateso. Uhasama usioonyeshwa waziwazi, kashfa, “kumnyamazia mtu kwa makusudi” na mengine mengi, yote ni aina za mateso. Kila mara mtu anapojaribu kumdhuru mwingine kwa namna fulani, hayo ni mateso.
Mwelekeo mmoja wa kawaida ambao watu huwa nao baada ya kudhuriwa na mwingine kwa namna fulani ni kulipiza kisasi. Hakuna ubaya wowote katika kujitetea kwa kusema ukweli kwa upendo. Lakini mara nyingi mno, maumivu tuliyopata hugeuka ama kuwa hofu inayotutawala kabisa au kuwa shambulio dhidi ya yule aliyetudhuru. Tunapohisi kishawishi hiki, maneno ya Yesu yaliyo hapo juu hutusaidia sana na kutuweka huru. Mwishowe, hakuna dhuluma itakayopuuzwa. Kila kosa litashughulikiwa kwa haki na huruma ya Mungu, na utaratibu mkamilifu pamoja na ukweli vitarejeshwa kikamilifu kwa milele.
Tafakari leo kuhusu pambano lolote ulilo nalo dhidi ya hofu. Unapofanya hivyo, yatafakari maneno ya Yesu tena na tena. “Msimwogope mtu yeyote.” Usikubali kutawaliwa na dhuluma yoyote uliyotendewa. Badala yake, endelea kuwa na uhakika katika ukweli na, ikiwa dhuluma fulani haiwezi kurekebishwa hapa na sasa, utazamie kwa matumaini mwisho wa nyakati ambapo kila kitu kitawekwa wazi kulingana na fikra na haki ya Mungu.
Bwana wangu mwenye ujasiri, ulivumilia dhihaka nyingi na kutendewa kwa ukali, lakini hukuruhusu kamwe mambo hayo yakuzuie kutimiza utume Wako wa kimungu wa upendo. Tafadhali uniweke huru kutoka katika hofu yote na unipe ujasiri ninapokabiliwa na dhuluma za maisha, ili nitumaini kwamba Wewe utarekebisha kila kosa mwishowe. Yesu, nakutumainia.
Tafakari juu ya Huruma ya Mungu
Tafakari za Maandiko Matakatifu kwa Kipindi cha Mwaka
Machaguo ya Masomo ya Misa Takatifu
