Ushindi wa Zakaria

Jumamosi, Desemba 23, 2023
Siku ya Juma ya Majilio
Masomo ya Leo

Mtakatifu Yohane wa Kanty, Padre—Kumbukumbu ya Hiari

Sikiliza kwa Kiingereza

Mara kinywa chake kikafunguliwa, ulimi wake ukafunguka, naye akasema akimbariki Mungu. Luka 1:64

Mstari huu unaonyesha mwisho wenye furaha wa hali ya Zakaria ya kutokuamini mwanzoni yale ambayo Mungu alimfunulia. Kumbuka kwamba miezi tisa kabla, Zakaria alipokuwa akitimiza wajibu wake wa kikuhani wa kutoa sadaka katika Patakatifu pa Patakatifu ndani ya Hekalu, alitembelewa na Malaika Mkuu Gabrieli mwenye utukufu, anayesimama mbele za Mungu. Gabrieli alimfunulia Zakaria habari njema kwamba mke wake angepata mimba katika uzee wake na kwamba mtoto huyo ndiye angewaandaa watu wa Israeli kwa ajili ya Masihi anayekuja. Hiyo ingekuwa fursa ya pekee iliyo ya ajabu namna gani! Lakini Zakaria hakuamini. Kwa sababu hiyo, Malaika Mkuu alimfanya awe bubu kwa miezi tisa ya ujauzito wa mke wake.

Adhabu za Bwana daima ni zawadi za neema Yake. Zakaria hakuadhibiwa kwa chuki, wala kwa sababu za kuadhibu. Badala yake, adhabu hii ilikuwa zaidi kama kitubio. Alipewa kitubio cha kumnyenyekeza cha kupoteza uwezo wake wa kuzungumza kwa miezi tisa kwa sababu njema. Inaonekana kana kwamba Mungu alijua kuwa Zakaria alihitaji miezi tisa kutafakari kimya kimya yale ambayo Malaika Mkuu alikuwa amesema. Alihitaji miezi tisa kutafakari ujauzito wa kimuujiza wa mke wake. Na alihitaji miezi tisa kutafakari mtoto huyu angekuwa nani. Na miezi hiyo tisa ilileta matokeo yaliyokusudiwa ya kuongoka kikamilifu kwa moyo.

Baada ya mtoto kuzaliwa, ilitarajiwa kwamba mwana huyu mzaliwa wa kwanza angepewa jina la baba yake, Zakaria. Lakini Malaika Mkuu alikuwa amemwambia Zakaria kwamba mtoto angeitwa Yohane. Kwa hiyo, siku ya nane, siku ya kutahiriwa kwa mwanawe alipowasilishwa kwa Bwana, Zakaria aliandika kwenye kibao kwamba jina la mtoto lilikuwa Yohane. Hiki kilikuwa kitendo cha imani na ishara kwamba alikuwa ameacha kabisa kutokuamini na sasa alikuwa anaamini. Na kitendo hiki cha imani ndicho kilichoondoa shaka yake ya awali.

Maisha ya kila mmoja wetu yatakuwa na nyakati za kushindwa kuamini katika kina cha imani yetu. Kwa sababu hiyo, Zakaria ni mfano kwetu wa jinsi tunavyopaswa kukabiliana na kushindwa kwetu. Tunakabiliana nako kwa kuruhusu matokeo ya kushindwa kwetu kwa wakati uliopita yatubadilishe tuwe bora. Tunajifunza kutokana na makosa yetu na kusonga mbele tukiwa na maazimio mapya. Hivi ndivyo Zakaria alivyofanya, na hivi ndivyo tunavyopaswa kufanya ikiwa tunataka kujifunza kutokana na mfano wake mwema.

Tafakari leo juu ya dhambi yoyote uliyotenda ambayo imeleta matokeo yenye uchungu katika maisha yako. Unapotafakari dhambi hiyo, swali la msingi ni hatua utakayochukua kuanzia sasa. Je, unaruhusu dhambi hiyo ya zamani, au ukosefu huo wa imani, itawale na kuongoza maisha yako? Au unatumia kushindwa kwako kwa wakati uliopita kufanya maazimio na maamuzi mapya kwa ajili ya siku zijazo ili ujifunze kutokana na makosa yako? Inahitaji ujasiri, unyenyekevu na nguvu kuiga mfano wa Zakaria. Jitahidi kuziishi fadhila hizi katika maisha yako leo.

Bwana, najua kwamba nina upungufu wa imani katika maisha yangu. Nashindwa kuamini yote unayoniambia. Kwa sababu hiyo, mara nyingi nashindwa kuyatekeleza maneno Yako. Bwana mpendwa, ninapoteseka kutokana na udhaifu wangu, nisaidie kujua kwamba mateso haya na mateso yote yanaweza kuleta utukufu Kwako ikiwa nitaifanya imani yangu iwe mpya. Nisaidie, kama Zakaria, kurudi Kwako daima, na unitumie kama chombo cha kudhihirisha utukufu Wako. Yesu, nakutumainia.

Mpya kwa 2024!
Zawadi nzuri sana ya Krismasi…