Ijumaa, Februari 2, 2024
Kutolewa kwa Bwana Hekaluni—Sikukuu
Masomo ya Leo
Sikiliza kwa Kiingereza
“Sasa, Bwana, unaweza kumwacha mtumishi Wako aende kwa amani, kulingana na neno Lako, kwa maana macho yangu yameuona wokovu Wako, ulioutayarisha mbele ya watu wa mataifa yote: mwanga wa ufunuo kwa watu wa mataifa, na utukufu kwa watu Wako Israeli.” Luka 2:29–32
Wakati wa kuzaliwa kwa Yesu, kulikuwa na mtu aliyeitwa Simeoni ambaye alikuwa ametumia maisha yake yote kujiandaa kwa tukio moja muhimu. Kama Wayahudi wote waaminifu wa wakati huo, Simeoni alikuwa akingojea ujio wa Masihi. Roho Mtakatifu alikuwa amemfunulia kwamba hakika angemwona Masihi kabla ya kufa kwake—na ndivyo ilivyotokea Maria na Yosefu walipomleta Yesu Hekaluni akiwa mchanga ili wamtoe kwa Bwana.
Jaribu kuwazia tukio hilo. Simeoni alikuwa ameishi maisha matakatifu yenye uchaji wa Mungu. Na ndani kabisa ya dhamiri yake, alijua kwamba maisha yake duniani yasingefikia mwisho kabla hajajaliwa kumwona Mwokozi wa Ulimwengu kwa macho yake mwenyewe. Alijua hili kwa kipawa cha pekee cha imani, ufunuo wa ndani kutoka kwa Roho Mtakatifu, naye aliamini.
Inasaidia kutafakari kipawa hiki cha pekee cha ufahamu ambacho Simeoni alikuwa nacho katika maisha yake yote. Kwa kawaida tunapata ufahamu kupitia hisi zetu tano. Tunaona kitu, tunakisikia, tunakionja, tunakinusa au tunakigusa, na kwa njia hiyo tunajua kwamba ni halisi. Ufahamu unaopatikana kupitia hisi za mwili unategemeka sana, na hiyo ndiyo njia ya kawaida tunayotumia kuvifahamu vitu. Lakini kipawa hiki cha ufahamu alichokuwa nacho Simeoni kilikuwa tofauti. Kilikuwa cha kina zaidi na chenye asili ya kiroho. Alijua kwamba angemwona Masihi kabla hajafa, si kwa sababu ya jambo lolote la nje alilokuwa ametambua kwa hisi zake, bali kwa sababu ya ufunuo wa ndani kutoka kwa Roho Mtakatifu.
Ukweli huu unazua swali: ni aina gani ya ufahamu iliyo na uhakika zaidi? Je, ni kitu unachokiona kwa macho yako, unachokigusa, unachokinusa, unachokisikia au unachokionja? Au ni jambo ambalo Mungu anakuambia ndani kabisa ya roho yako kwa ufunuo wa neema? Ingawa aina hizi za ufahamu zinatofautiana, ni muhimu kuelewa kwamba ufahamu wa kiroho unaotolewa na Roho Mtakatifu una uhakika mkubwa zaidi kuliko kitu chochote kinachotambuliwa kwa hisi tano pekee. Ufahamu huu wa kiroho una nguvu ya kubadili maisha yako na kuelekeza matendo yako yote kwenye ufunuo huo.
Kwa Simeoni, ufahamu huu wa ndani wenye asili ya kiroho uliungana ghafla na hisi zake tano Yesu alipoletwa Hekaluni. Ghafla Simeoni alimwona, akamsikia na kumgusa Mtoto huyu ambaye alijua kwamba siku moja angemwona kwa macho yake mwenyewe na kumgusa kwa mikono yake mwenyewe. Kwa Simeoni, huo ulikuwa wakati wa kilele cha maisha yake.
Tafakari leo juu ya jambo lolote ambalo Bwana wetu amekuambia ndani kabisa ya roho yako. Mara nyingi sana tunaipuuza sauti Yake ya upole inaposema nasi, tukipendelea badala yake kuishi tu katika ulimwengu wa hisi. Lakini uhalisi wa kiroho ulio ndani yetu lazima uwe kiini na msingi wa maisha yetu. Ni hapo ambapo Mungu anasema nasi, na ni hapo ambapo sisi pia tutagundua kusudi kuu na maana ya maisha yetu.
Bwana wangu wa kiroho, nakushukuru kwa njia zisizohesabika ambazo kwazo Unazungumza nami mchana na usiku katika kina cha nafsi yangu. Nisaidie daima kuwa makini kukusikiliza Wewe na sauti Yako tulivu Unapozungumza nami. Sauti Yako, na sauti Yako peke yake, na iwe mwongozo wa maisha yangu. Nilitegemee Neno Lako na nisiyumbe kamwe katika utume ulionipa. Yesu, nakutumainia.
Soma Zaidi:
Kutolewa kwa Bwana Hekaluni
Vitabu vya Kwaresima:
Tafakari juu ya Huruma ya Mungu
Machaguo ya Masomo ya Misa Takatifu
