வெள்ளிக்கிழமை, பிப்ரவரி 2, 2024
ஆண்டவரைக் காணிக்கையாக அர்ப்பணித்தல்—விழா
இன்றைய வாசகங்கள்
“ஆண்டவரே, இப்போது உமது வார்த்தையின்படி உம் அடியானை அமைதியுடன் செல்ல அனுமதிக்கலாம். ஏனெனில், மக்கள் அனைவரின் முன்னிலையிலும் நீர் ஆயத்தம் செய்துள்ள உமது மீட்பை என் கண்கள் கண்டுகொண்டன; அது பிற இனத்தாருக்கு வெளிப்பாட்டை அளிக்கும் ஒளியும், உமது மக்களாகிய இஸ்ரயேலுக்குப் பெருமையும் ஆகும்.” லூக்கா 2:29–32
இயேசு பிறந்த காலத்தில், சிமியோன் என்னும் ஒருவர் வாழ்ந்து வந்தார். முக்கியத்துவம் வாய்ந்த ஓர் இறைத்தருணத்திற்காக அவர் தம் வாழ்நாள் முழுவதும் ஆயத்தம் செய்து வந்தார். அக்காலத்தில் இறைநம்பிக்கையில் உறுதியாயிருந்த யூதர்கள் அனைவரையும் போலவே, சிமியோனும் மெசியாவின் வருகைக்காகக் காத்திருந்தார். தாம் இறப்பதற்கு முன் மெசியாவை நிச்சயமாகக் காண்பார் என்று தூய ஆவியார் அவருக்கு வெளிப்படுத்தியிருந்தார். குழந்தை இயேசுவை ஆண்டவருக்குக் காணிக்கையாக அர்ப்பணிக்க மரியாவும் யோசேப்பும் அவரைக் கோவிலுக்குக் கொண்டுவந்தபோது, அது நிறைவேறியது.
அந்தக் காட்சியை மனக்கண்முன் கொண்டுவர முயலுங்கள். சிமியோன் தூய்மையும் இறைப்பற்றும் நிறைந்த வாழ்க்கை வாழ்ந்திருந்தார். உலக மீட்பரைத் தம் சொந்தக் கண்களால் காணும் பேறு கிடைக்கும்வரை, மண்ணுலகில் தம் வாழ்வு முடிவடையாது என்பதை அவர் தம் மனச்சான்றின் ஆழத்தில் அறிந்திருந்தார். நம்பிக்கையின் சிறப்புக் கொடையாக, தூய ஆவியார் தம் உள்ளத்தில் வெளிப்படுத்தியதன் வழியாக இதை அவர் அறிந்திருந்தார்; அதை நம்பினார்.
சிமியோன் தம் வாழ்நாள் முழுவதும் பெற்றிருந்த இந்தத் தனித்துவமான அறிவுக் கொடையைப் பற்றிச் சிந்திப்பது பயனுள்ளதாக இருக்கும். பொதுவாக நாம் நமது ஐம்புலன்கள் வழியாக அறிவைப் பெறுகிறோம். ஒன்றைப் பார்க்கிறோம், கேட்கிறோம், சுவைக்கிறோம், முகர்கிறோம் அல்லது தொட்டு உணர்கிறோம்; அதன் விளைவாக அது உண்மையானது என்பதை அறிகிறோம். உடலின் புலன்கள் வழியாகப் பெறும் அறிவு மிகவும் நம்பகமானது; நாம் பொருள்களை அறிந்துகொள்ளும் வழக்கமான வழியும் அதுவே. ஆனால் சிமியோன் பெற்றிருந்த இந்த அறிவுக் கொடை வேறுபட்டது. அது இன்னும் ஆழமானதாகவும் ஆவிக்குரிய தன்மை கொண்டதாகவும் இருந்தது. தாம் இறப்பதற்கு முன் மெசியாவைக் காண்போம் என்பதை அவர் அறிந்திருந்தது, வெளிப்புறப் புலனுணர்வு எதனாலும் அல்ல; மாறாக, தூய ஆவியார் அவரது உள்ளத்தில் வெளிப்படுத்தியதாலேயே.
இந்த உண்மை ஒரு கேள்வியை எழுப்புகிறது: எந்த வகையான அறிவு அதிக உறுதியானது? உங்கள் கண்களால் பார்ப்பது, தொட்டுணர்வது, முகர்வது, கேட்பது அல்லது சுவைப்பதா? அல்லது அருளின் வெளிப்பாட்டின் வழியாக உங்கள் ஆன்மாவின் ஆழத்தில் கடவுள் உங்களுக்குச் சொல்வதா? இந்த இருவகை அறிவும் வேறுபட்டவை என்றாலும், ஐம்புலன்களால் மட்டும் உணரப்படும் எதையும்விடத் தூய ஆவியார் அளிக்கும் ஆவிக்குரிய அறிவு மிகவும் உறுதியானது என்பதைப் புரிந்துகொள்வது முக்கியம். இந்த ஆவிக்குரிய அறிவுக்கு உங்கள் வாழ்வை மாற்றவும், உங்கள் செயல்கள் அனைத்தையும் அந்த வெளிப்பாட்டை நோக்கி வழிநடத்தவும் வல்லமை உண்டு.
இயேசு கோவிலுக்குக் கொண்டுவரப்பட்டபோது, சிமியோனின் உள்ளத்தில் இருந்த ஆவிக்குரிய இந்த அறிவு, திடீரென அவரது ஐம்புலன்களோடு ஒன்றிணைந்தது. ஒருநாள் தம் சொந்தக் கண்களால் காண்பார் என்றும், தம் சொந்தக் கைகளால் தொடுவார் என்றும் அவர் அறிந்திருந்த இந்தக் குழந்தையைச் சிமியோன் திடீரெனக் கண்டார், அதன் குரலைக் கேட்டார், அதைத் தொட்டு உணர்ந்தார். சிமியோனுக்கு அந்தத் தருணமே அவரது வாழ்வு நிறைவுபெற்ற தருணமாக இருந்தது.
உங்கள் ஆன்மாவின் ஆழத்தில் நம் ஆண்டவர் உங்களிடம் பேசியுள்ள எதையும் பற்றி இன்று சிந்தியுங்கள். மிக அடிக்கடி, அவர் தமது மெல்லிய குரலில் பேசும்போது அதை நாம் புறக்கணித்துவிட்டு, புலன்களால் உணரக்கூடிய உலகில் மட்டுமே வாழ விரும்புகிறோம். ஆனால் நமக்குள் இருக்கும் ஆவிக்குரிய எதார்த்தமே நம் வாழ்வின் மையமாகவும் அடித்தளமாகவும் ஆக வேண்டும். அங்குதான் கடவுள் பேசுகிறார்; அங்குதான் நாமும் நம் வாழ்வின் மைய நோக்கத்தையும் பொருளையும் கண்டடைவோம்.
என் ஆன்மாவின் ஆண்டவரே, இரவும் பகலும் என் ஆன்மாவின் ஆழத்தில் எண்ணற்ற வழிகளில் நீர் என்னோடு பேசுவதற்காக உமக்கு நன்றி கூறுகிறேன். நீர் என்னோடு பேசும்போது, உமக்கும் உமது மென்மையான குரலுக்கும் எப்போதும் செவிமடுக்க எனக்கு உதவியருளும். உமது குரல், உமது குரல் மட்டுமே, என் வாழ்வை வழிநடத்துவதாக. உமது வார்த்தையில் நான் நம்பிக்கை வைத்து, நீர் எனக்கு அளித்த பணியிலிருந்து ஒருபோதும் விலகாதிருப்பேனாக. இயேசுவே, உம்மில் நம்பிக்கை வைக்கிறேன்.
மேலும் வாசிக்க:
ஆண்டவரைக் காணிக்கையாக அர்ப்பணித்தல்
தவக்காலத்திற்கான நூல்கள்:
அனைத்துப் புனிதர்கள்/திருவிழாக்கள்
திருப்பலி வாசிப்புகளுக்கான தெரிவுகள்
