இறைவனின் தாயான புனித மரியா

ஜனவரி 1, 2020
இறைவனின் தாயான புனித கன்னி மரியாவின் பெருவிழா 
கிறிஸ்து பிறப்புப் பெருவிழாவின் எண்கிழமை நிறைவுநாள், ஜனவரி 1
இன்றைய வாசகங்கள்

மரியா இவற்றையெல்லாம் தம் உள்ளத்தில் இருத்திச் சிந்தித்துக்கொண்டிருந்தார்.  லூக்கா 2:19

மாட்சிமைமிக்க இறையன்னைக்குச் சிறப்புக் கவனம் செலுத்தாமல் நமது கிறிஸ்து பிறப்புப் பெருவிழாவின் எண்கிழமை முழுமை பெறாது!  இயேசுவின் தாயும் உலக மீட்பரின் தாயுமான மரியா, “இறைவனின் தாய்” என்று அழைக்கப்படுவது முற்றிலும் பொருத்தமானதே.  நம் புனித அன்னையின் ஆழ்ந்த பொருளுள்ள இந்தப் பட்டத்தைப் பற்றிச் சிந்திப்பது பயனுள்ளது.  இந்தப் பட்டம் அவருடைய புனித அன்னையைப் பற்றிக் கூறும் அதே அளவுக்கு இயேசுவைப் பற்றியும் கூறுகிறது என்பதைப் புரிந்துகொள்வது முக்கியம்.

மரியாவை “இறைவனின் தாய்” என்று அழைக்கும்போது, மனித வாழ்வின் ஓர் உண்மையை நாம் சிறப்பாக ஏற்றுக்கொள்கிறோம்.  ஒரு தாய் ஒருவரின் சதைக்கு மட்டுமே மூலமாக இருப்பவர் அல்ல; தம் பிள்ளைகளின் உடலுக்கு மட்டுமே தாய் அல்ல; அந்த நபருக்கே அவர் தாய்.  தாயாக இருப்பது வெறும் உயிரியல் சார்ந்த ஒன்று மட்டுமல்ல; அது புனிதமும் தூய்மையும் நிறைந்தது; இறைவனின் படைப்பிலுள்ள தெய்வீக ஒழுங்கின் ஒரு பகுதியாகவும் இருக்கிறது.  இயேசு அவருடைய குழந்தையாக இருந்தார்; இந்தக் குழந்தை இறைவனே.  எனவே, மரியாவை “இறைவனின் தாய்” என்று அழைப்பது தர்க்கரீதியாகவும் பொருத்தமானதே.

இதைச் சிந்தித்துப் பார்ப்பதே வியப்பூட்டும் உண்மை.  இறைவனுக்கு ஒரு தாய் இருக்கிறார்!  அவரைத் தம் கருவறையில் சுமந்து, பாலூட்டி, வளர்த்து, கற்பித்து, அன்பு செய்து, அவருக்குத் துணையாக இருந்து, அவரது வாழ்நாள் முழுவதும் அவர் யார் என்பதைப் பற்றித் தியானித்த ஒரு குறிப்பிட்ட நபர் அவருக்கு இருக்கிறார்.  கடைசியாகக் கூறப்பட்ட இந்த உண்மை சிந்திப்பதற்கு மிகவும் அழகானது.

மேலே உள்ள நற்செய்திப் பகுதி, “மரியா இவற்றையெல்லாம் தம் உள்ளத்தில் இருத்திச் சிந்தித்துக்கொண்டிருந்தார்” என்று கூறுகிறது.  அக்கறையுள்ள ஒரு தாயாக அவர் இவ்வாறு செய்தார்.  எந்தவொரு தாயின் அன்பையும் போலவே, இயேசுவின்மீது அவர் கொண்டிருந்த அன்பும் தனித்துவமானது.  எனினும், அவர் தாய்மையில் நிறைவுள்ளவராக இருந்தார் என்பதையும், தம் மகனாக மட்டுமன்றி இறைவனாகவும் எல்லா வகையிலும் நிறைவுள்ளவராகவும் இருந்த இயேசுவை நிறைவான அன்புடன் நேசித்தார் என்பதையும் கவனத்தில் கொள்ள வேண்டும்.  இது எதை வெளிப்படுத்துகிறது?  மரியாவுக்கும் இயேசுவுக்கும் இடையே பகிரப்பட்ட தாயன்பு ஆழமானது, ஊக்கமூட்டுவது, மறைபொருள் நிறைந்தது, மாட்சிமைமிக்கது, உண்மையிலேயே புனிதமானது என்பதை இது வெளிப்படுத்துகிறது!  அவர்களுடைய அன்பின் மறைபொருளை நம் இதயங்களில் முழுமையாக உயிரோட்டத்துடன் பேணி, வாழ்நாள் முழுவதும் அதைப் பற்றிச் சிந்திப்பது பயனுள்ளது.  அவர் ஒவ்வொரு தாய்க்கும் முன்மாதிரியாக இருக்கிறார்; தூய்மையும் புனிதமும் நிறைந்த இதயத்துடன் பிறரை அன்பு செய்ய நாடும் நம் அனைவருக்கும் முன்மாதிரியாக இருக்கிறார்.

மரியா தம் இறைமகனுடன் பகிர்ந்துகொண்டிருக்கக்கூடிய புனிதமான, மனதைக் கவரும் உறவைப் பற்றி இன்று சிந்தியுங்கள்.  இந்த அன்பு எப்படிப்பட்டதாக இருந்திருக்கும் என்பதை ஆழ்ந்து உணர முயலுங்கள்.  அவரது இதயத்தை நிறைத்திருக்கக்கூடிய ஆழ்ந்த உணர்வையும் தீவிர அன்பையும் கற்பனை செய்து பாருங்கள்.  அவர் கொண்டிருந்திருக்கக்கூடிய அசைக்க முடியாத அர்ப்பணிப்பின் அளவைக் கற்பனை செய்து பாருங்கள்.  அவரது அன்பின் விளைவாக உருவான முறிக்க முடியாத பிணைப்பைக் கற்பனை செய்து பாருங்கள்.  கிறிஸ்து பிறப்புப் பெருவிழாவின் இந்த எண்கிழமையை நிறைவு செய்யும் எத்துணை அழகான கொண்டாட்டம் இது!

மிகவும் அன்பிற்குரிய அன்னை மரியே, நீர் உமது இறைமகனை நிறைவான அன்புடன் நேசித்தீர்.  உமது இதயம் அணைக்க முடியாத தாயன்பின் நெருப்பால் எரிந்தது.  இயேசுவுடனான உமது பிணைப்பு எல்லா வகையிலும் நிறைவுள்ளதாக இருந்தது.  நீர் என்னுடன் பகிர்ந்துகொள்ளும் அதே அன்பிற்கு என் இதயத்தைத் திறக்க எனக்கு உதவும்.  என் தாயாக இருக்க வாரும்; உமது மகனைக் கவனித்துக்கொண்டதுபோல என்னையும் கவனித்துக்கொள்ளும்.  இயேசு உம்மீது கொண்டிருந்த அன்புடனும், இப்போது விண்ணகத்தில் அவர் உம்மீது பொழியும் அன்புடனும் நானும் உம்மை அன்பு செய்வேனாக.  இறைவனின் தாயான அன்னை மரியே, எங்களுக்காக வேண்டிக்கொள்ளும்.  இயேசுவே, நான் உம்மை நம்புகிறேன்.

மேலும் நற்செய்திச் சிந்தனைகள்

இறை இரக்கச் சிந்தனைகள்

இன்றைய புனிதர்கள்/திருவிழாக்கள்

கிறிஸ்து, நம்பிக்கையின் மெழுகுதிரி

கிறிஸ்து பிறப்பு மன்றாட்டு

இதையும் காண்க:

ஒரு தாயின் அன்பு