Maria Mwenye Heri, Mama wa Mungu

Januari 1, 2020
Sherehe ya Bikira Maria Mwenye Heri, Mama wa Mungu 
Siku ya Nane ya Oktava ya Krismasi, Januari 1
Masomo ya Leo

Naye Maria akayahifadhi mambo haya yote, akiyatafakari moyoni mwake.  Luka 2:19

Oktava yetu ya Krismasi isingekuwa kamili bila kumwangalia kwa namna ya pekee Mama wa Mungu mwenye utukufu!  Maria, mama wa Yesu, mama wa Mwokozi wa Ulimwengu, anaitwa kwa haki “Mama wa Mungu.”  Inafaa kutafakari cheo hiki chenye maana kubwa cha Mama yetu Mwenye Heri.  Na ni muhimu kuelewa kwamba cheo hiki kinaeleza mengi kuhusu Yesu kama vile kinavyoeleza kuhusu Mama Yake Mwenye Heri.

Tunapomwita Maria “Mama wa Mungu,” tunakiri hasa ukweli mmoja kuhusu maisha ya mwanadamu.  Mama si chanzo tu cha mwili wa mtu, wala si mama wa miili ya watoto wake tu; yeye ni mama wa mtu huyo mzima.  Kuwa mama si jambo la kibayolojia tu; ni jambo takatifu na lenye heshima kuu, na ni sehemu ya utaratibu wa kimungu katika uumbaji wa Mungu.  Yesu alikuwa Mtoto wake, na Mtoto huyu ni Mungu.  Kwa hiyo, ni jambo lenye mantiki sahihi kumwita Maria “Mama wa Mungu.”

Huu ni ukweli wa kustaajabisha kuufikiria.  Mungu ana mama!  Ana mtu maalumu aliyembeba tumboni mwake, akamnyonyesha, akamlea, akamfundisha, akampenda, akawa karibu Naye ili kumsaidia, na akatafakari Yeye ni nani katika maisha Yake yote.  Jambo hili la mwisho linapendeza sana kulitafakari.

Kifungu cha Injili hapo juu kinasema, “Naye Maria akayahifadhi mambo haya yote, akiyatafakari moyoni mwake.”  Naye alifanya hivi akiwa mama mwenye kujali.  Upendo wake kwa Yesu ulikuwa wa pekee kama ulivyo upendo wa kila mama.  Hata hivyo, yapasa kutambua kwamba alikuwa mama mkamilifu, naye alimpenda kwa upendo mkamilifu Yeye ambaye hakuwa Mwana wake tu, bali pia alikuwa Mungu na alikuwa mkamilifu kwa kila namna.  Hili linafunua nini?  Linafunua kwamba upendo wa kimama uliowaunganisha Maria na Yesu ulikuwa wa kina, wenye kutia moyo, uliojaa fumbo, wenye utukufu na mtakatifu kweli!  Fumbo la upendo wao linastahili kutafakariwa katika maisha yetu yote, tukilidumisha hai kikamilifu mioyoni mwetu.  Yeye ni mfano kwa kila mama na pia ni mfano kwetu sote tunaotafuta kuwapenda wengine kwa moyo safi na mtakatifu.

Tafakari leo juu ya uhusiano mtakatifu na wenye kuvutia ambao Maria angekuwa nao pamoja na Mwana wake aliye Mungu.  Jaribu kufahamu upendo huo ungekuwa wa namna gani.  Wazia hisia za kina na upendo wenye ari ambavyo vingeujaza moyo wake.  Wazia kiwango cha kujitoa bila kuyumba ambacho angekuwa nacho.  Wazia kifungo kisichovunjika kilichojengeka kutokana na upendo wake.  Ni sherehe nzuri iliyoje ya kuhitimisha Oktava hii ya Siku ya Krismasi!

Mama Maria mpendwa sana, ulimpenda Mwana wako aliye Mungu kwa upendo mkamilifu.  Moyo wako uliwaka moto usiozimika wa mapendo ya kimama.  Kifungo chako na Yesu kilikuwa kikamilifu kwa kila namna.  Nisaidie kuufungua moyo wangu kwa upendo huohuo unaonipenda nao.  Njoo uwe mama yangu na unitunze kama ulivyomtunza Mwana wako.  Nami nikupende kwa upendo ambao Yesu alikuwa nao kwako na kwa upendo anaokumiminia sasa kwa wingi Mbinguni.  Mama Maria, Mama wa Mungu, utuombee.  Yesu, nakutumainia.

Tafakari Zaidi za Injili

Tafakari juu ya Huruma ya Mungu

Watakatifu/Sikukuu za Leo

Kristo, Mshumaa wa Matumaini

Sala ya Krismasi

Tazama pia:

Upendo wa Mama