ദൈവമാതാവായ പരിശുദ്ധ മറിയം

ജനുവരി 1, 2020
ദൈവമാതാവായ പരിശുദ്ധ കന്യകാമറിയത്തിന്റെ മഹോത്സവം 
ക്രിസ്മസ് അഷ്ടദിനാചരണത്തിന്റെ എട്ടാം ദിവസം, ജനുവരി 1
ഇന്നത്തെ വായനകൾ

മറിയമാകട്ടെ, ഈ കാര്യങ്ങളെല്ലാം ഹൃദയത്തിൽ ചിന്തിച്ചുകൊണ്ട് സൂക്ഷിച്ചു.  ലൂക്കാ 2:19

മഹത്വപൂർണയായ ദൈവമാതാവിനു പ്രത്യേക ശ്രദ്ധ നൽകാതെ നമ്മുടെ ക്രിസ്മസ് അഷ്ടദിനാചരണം പൂർണമാകില്ല! ഈശോയുടെ അമ്മയും ലോകരക്ഷകന്റെ അമ്മയുമായ മറിയത്തെ “ദൈവമാതാവ്” എന്നു വിളിക്കുന്നത് തികച്ചും ഉചിതമാണ്. നമ്മുടെ പരിശുദ്ധ അമ്മയുടെ ഈ മഹത്തായ വിശേഷണത്തെക്കുറിച്ച് ധ്യാനിക്കുന്നത് ഏറെ പ്രയോജനകരമാണ്. ഈ വിശേഷണം അവിടുത്തെ പരിശുദ്ധ അമ്മയെക്കുറിച്ചു പറയുന്നതുപോലെതന്നെ ഈശോയെക്കുറിച്ചും പറയുന്നുവെന്നു മനസ്സിലാക്കേണ്ടത് പ്രധാനമാണ്.

മറിയത്തെ “ദൈവമാതാവ്” എന്നു വിളിക്കുമ്പോൾ, മനുഷ്യജീവിതത്തിലെ ഒരു വസ്തുത നാം പ്രത്യേകമായി അംഗീകരിക്കുന്നു. ഒരാളുടെ ശരീരത്തിന്റെ ഉറവിടം മാത്രമല്ല അമ്മ; സ്വന്തം മക്കളുടെ ശരീരത്തിന്റെ മാത്രം അമ്മയല്ല അവൾ, ആ വ്യക്തിയുടെ അമ്മയാണ്. അമ്മയായിരിക്കുക എന്നത് കേവലം ജൈവികമായ ഒരു കാര്യമല്ല; അത് പവിത്രവും വിശുദ്ധവുമാണ്, ദൈവത്തിന്റെ സൃഷ്ടിയിലെ ദൈവികക്രമത്തിന്റെ ഭാഗവുമാണ്. ഈശോ മറിയത്തിന്റെ ശിശുവായിരുന്നു; ഈ ശിശു ദൈവമാണ്. അതിനാൽ, മറിയത്തെ “ദൈവമാതാവ്” എന്നു വിളിക്കുന്നത് തികച്ചും യുക്തിസഹമാണ്.

ചിന്തിക്കുമ്പോൾ വിസ്മയമുണർത്തുന്ന ഒരു വസ്തുതയാണിത്. ദൈവത്തിന് ഒരു അമ്മയുണ്ട്! സ്വന്തം ഉദരത്തിൽ അവിടുത്തെ വഹിക്കുകയും, മുലയൂട്ടുകയും, വളർത്തുകയും, പഠിപ്പിക്കുകയും, സ്നേഹിക്കുകയും, അവിടുത്തെ തുണയായി നിലകൊള്ളുകയും, അവിടുത്തെ ജീവിതത്തിലുടനീളം അവിടുന്ന് ആരാണെന്ന് ആഴമായി ചിന്തിക്കുകയും ചെയ്ത ഒരു വ്യക്തി അവിടുത്തേക്കുണ്ട്. ഈ അവസാന വസ്തുത ധ്യാനിക്കുന്നത് പ്രത്യേകിച്ചും മനോഹരമാണ്.

മുകളിൽ നൽകിയിരിക്കുന്ന സുവിശേഷഭാഗം പറയുന്നു: “മറിയമാകട്ടെ, ഈ കാര്യങ്ങളെല്ലാം ഹൃദയത്തിൽ ചിന്തിച്ചുകൊണ്ട് സൂക്ഷിച്ചു.” കരുതലുള്ള ഒരമ്മയായിട്ടാണ് മറിയം ഇങ്ങനെ ചെയ്തത്. ഏതൊരമ്മയുടെയും സ്നേഹംപോലെതന്നെ, ഈശോയോടുള്ള മറിയത്തിന്റെ സ്നേഹവും അനന്യമായിരുന്നു. എന്നാൽ, മറിയം മാതൃത്വത്തിൽ പൂർണതയുള്ളവളായിരുന്നുവെന്നും, സ്വന്തം പുത്രൻ മാത്രമല്ല, ദൈവവും എല്ലാ വിധത്തിലും പരിപൂർണനുമായിരുന്ന അവിടുത്തെ പരിപൂർണമായ സ്നേഹത്തോടെ സ്നേഹിച്ചുവെന്നും നാം ശ്രദ്ധിക്കണം. ഇത് എന്താണ് വെളിപ്പെടുത്തുന്നത്? മറിയവും ഈശോയും തമ്മിൽ പങ്കിട്ട മാതൃസ്നേഹം അഗാധവും പ്രചോദനദായകവും നിഗൂഢവും മഹത്വപൂർണവും യഥാർഥത്തിൽ പവിത്രവുമായിരുന്നുവെന്ന് ഇതു വെളിപ്പെടുത്തുന്നു! അവരുടെ സ്നേഹത്തിന്റെ രഹസ്യം നമ്മുടെ ഹൃദയങ്ങളിൽ പൂർണമായി സജീവമാക്കി നിലനിർത്തിക്കൊണ്ട്, ജീവിതത്തിലുടനീളം അതിനെക്കുറിച്ചു ധ്യാനിക്കുന്നത് ഉചിതമാണ്. ഓരോ അമ്മയ്ക്കും മറിയം മാതൃകയാണ്; നിർമലവും വിശുദ്ധവുമായ ഹൃദയത്തോടെ മറ്റുള്ളവരെ സ്നേഹിക്കാൻ ആഗ്രഹിക്കുന്ന നമുക്കെല്ലാവർക്കും മറിയം മാതൃകയാണ്.

മറിയം തന്റെ ദൈവിക പുത്രനുമായി പങ്കിട്ടിരിക്കാവുന്ന വിശുദ്ധവും ഹൃദയഹാരിയുമായ ബന്ധത്തെക്കുറിച്ച് ഇന്ന് ധ്യാനിക്കുക. ആ സ്നേഹം എങ്ങനെയായിരുന്നിരിക്കുമെന്ന് ആഴത്തിൽ മനസ്സിലാക്കാൻ ശ്രമിക്കുക. മറിയത്തിന്റെ ഹൃദയം നിറച്ചിരുന്നിരിക്കാവുന്ന അഗാധമായ വികാരവും സ്നേഹതീവ്രതയും സങ്കൽപ്പിക്കുക. മറിയത്തിനുണ്ടായിരുന്നിരിക്കാവുന്ന അചഞ്ചലമായ സമർപ്പണത്തിന്റെ ആഴം സങ്കൽപ്പിക്കുക. മറിയത്തിന്റെ സ്നേഹത്തിൽനിന്ന് രൂപപ്പെട്ട അഭേദ്യമായ ബന്ധം സങ്കൽപ്പിക്കുക. ക്രിസ്മസ് ദിനത്തിന്റെ ഈ അഷ്ടദിനാചരണം സമാപിക്കാൻ എത്ര മനോഹരമായ ആഘോഷമാണിത്!

ഏറ്റവും പ്രിയപ്പെട്ട മറിയമാതാവേ, അങ്ങയുടെ ദൈവിക പുത്രനെ അങ്ങ് പരിപൂർണമായ സ്നേഹത്തോടെ സ്നേഹിച്ചു. മാതൃസ്നേഹത്തിന്റെ അണയാത്ത അഗ്നിയാൽ അങ്ങയുടെ ഹൃദയം ജ്വലിച്ചു. ഈശോയോടുള്ള അങ്ങയുടെ ബന്ധം എല്ലാ വിധത്തിലും പൂർണമായിരുന്നു. അങ്ങ് എന്നോടു പങ്കുവയ്ക്കുന്ന അതേ സ്നേഹത്തിനു നേരെ എന്റെ ഹൃദയം തുറക്കാൻ എന്നെ സഹായിക്കണമേ. വന്ന് എന്റെ അമ്മയായിരിക്കണമേ; അങ്ങയുടെ പുത്രനെ പരിപാലിച്ചതുപോലെ എന്നെയും പരിപാലിക്കണമേ. ഈശോയ്ക്ക് അങ്ങയോടുണ്ടായിരുന്ന സ്നേഹത്താലും, ഇപ്പോൾ സ്വർഗത്തിൽ അവിടുന്ന് അങ്ങയുടെമേൽ സമൃദ്ധമായി ചൊരിയുന്ന സ്നേഹത്താലും ഞാനും അങ്ങയെ സ്നേഹിക്കട്ടെ. ദൈവമാതാവായ മറിയമാതാവേ, ഞങ്ങൾക്കുവേണ്ടി പ്രാർഥിക്കണമേ. ഈശോയേ, ഞാൻ അങ്ങയിൽ വിശ്വസിക്കുന്നു.

കൂടുതൽ സുവിശേഷ വിചിന്തനങ്ങൾ

ദൈവകരുണയെക്കുറിച്ചുള്ള വിചിന്തനങ്ങൾ

ഇന്നത്തെ വിശുദ്ധർ/തിരുനാളുകൾ

ക്രിസ്തു, പ്രത്യാശയുടെ ദീപം

ക്രിസ്മസ് പ്രാർഥന

ഇതും കാണുക:

ഒരമ്മയുടെ സ്നേഹം