மார்ச் 1, 2022
பொதுக்காலம் எட்டாம் வாரம் செவ்வாய்க்கிழமை
இன்றைய வாசகங்கள்
பேதுரு இயேசுவிடம், “நாங்கள் எல்லாவற்றையும் விட்டுவிட்டு உம்மைப் பின்பற்றினோம்” என்று சொல்லத் தொடங்கினார். மாற்கு 10:28
சிலர் பலவற்றைக் கைவிட்டுக் கிறிஸ்துவைப் பின்பற்ற அழைக்கப்படுகிறார்கள். எடுத்துக்காட்டாக, மடத் துறவு வாழ்வுக்கோ, வெளியுலகத் தொடர்பின்றி வாழும் துறவு மடத்தில் அருட்சகோதரியாக வாழ்வதற்கோ அழைக்கப்படுவோர் இருக்கிறார்கள். இத்தகைய முற்றிலுமான அர்ப்பணிப்புடன் தம்மைப் பின்பற்றக் கிறிஸ்து விடுக்கும் அழைப்பை நாடி, அதன்படி நடப்பதற்காக, அவர்கள் உண்மையிலேயே இவ்வுலகைச் சார்ந்த அனைத்தையும் கைவிடுகிறார்கள்.
ஆயினும், நாம் ஒவ்வொருவரும் நமக்கே உரிய தனித்துவமான வழியில் கிறிஸ்துவைப் பின்பற்றுவதற்கு “எல்லாவற்றையும்” கைவிட அழைக்கப்படுகிறோம். எல்லாவற்றையும் கைவிடுவதன் வழியாக, கிறிஸ்துவின் தெய்வீகத் திட்டத்திற்கேற்ப அவருக்குப் பணிசெய்யும்படி, வாழ்வில் நம் சொந்த விருப்பத்தையும் முன்னுரிமைகளையும் முழுமையாக ஒப்படைக்க அழைக்கப்படுகிறோம். இது பல வடிவங்களை எடுக்கலாம்; ஆனால், இறுதியில் இது எப்போதுமே எல்லாவற்றையும் கைவிடுவதற்கான அழைப்பாகும்.
“எல்லாவற்றையும் கைவிடுவது” என்பது வாழ்வில் நம்முடைய சுயநல இலட்சியங்களையும் முன்னுரிமைகளையும் கைவிடுவதே அன்றி வேறல்ல என்பதுதான் நற்செய்தி. அதைவிடச் சிறந்த செய்தி என்னவென்றால், கடவுள் நமக்காக வைத்திருக்கும் வாழ்வு, நாம் கனவு காணவோ கற்பனை செய்யவோ இயலாத அளவுக்குச் சிறந்தது என்பதே. எனவே, நம் சொந்த விருப்பத்திற்கும், நம் விருப்பப்படி செயல்படுவதற்கும் “இல்லை” என்று சொல்வதன் வழியாக, உண்மையில் நாம் கடவுளின் நிறைவான வழியில் செயல்படுவதற்கு “ஆம்” என்று சொல்கிறோம்.
நம் வாழ்வின் ஒவ்வொரு நாளிலும் அவருடைய திருவுளத்தை மட்டுமே நாட நாம் ஏன் விரும்பாமல் இருக்க வேண்டும்? அவருக்கும் அவரது நிறைவான திட்டத்திற்கும் பணிசெய்ய நாம் ஏன் விரும்பாமல் இருக்க வேண்டும்? இது நம் குடும்பங்களுக்குப் பணிசெய்யும் வடிவத்தை எடுக்கலாம். அவர்களுக்குக் கொடுக்க மனமில்லாதபோதும் கொடுப்பதாக இருக்கலாம். பணியிலும் அன்பிலும் வெளிப்படும் சிறுசிறு செயல்களில் மகிழ்ச்சியைக் காண முயல்வதாக இருக்கலாம். சிலருக்கு, அவரது திருவுளத்தை இன்னும் முழுமையான அர்ப்பணிப்புடன் நாடுவதற்காக, வாழ்வின் வழக்கமான பற்றுகள் அனைத்தையும் கைவிடுவதாக இருக்கலாம். வாழ்வில் உங்களுக்குரிய குறிப்பிட்ட அழைப்பு எதுவாக இருந்தாலும், கடவுளின் திருவுளத்தை ஏற்று வாழ்வது மதிப்புக்குரியது.
கிறிஸ்து உங்களிடம் எதைக் கேட்டாலும், அவருக்கு “ஆம்” என்று சொல்ல நீங்கள் எவ்வளவு ஆயத்தமாகவும் விருப்பமுள்ளவர்களாகவும் இருக்கிறீர்கள் என்பதை இன்று சிந்தித்துப் பாருங்கள். அவர் உங்களுக்கு இன்னும் வெளிப்படுத்தாதவற்றிற்குக்கூட “ஆம்” என்று சொல்ல விரும்புகிறீர்களா? உங்கள் எதிர்காலத்தில் எது காத்திருந்தாலும், அதற்கு இன்றே “ஆம்” என்று சொல்லுங்கள்; கடவுள் உங்களை நிறைவாக ஆசீர்வதிப்பார்.
நம்பிக்கைக்குரிய என் ஆண்டவரே, வாழ்வில் நீர் என்னை எதைச் செய்ய அழைத்தாலும், என் பதில் “ஆம்” என்பதே. தன்னலமின்றி, முழுமையாக உமது திருவுளத்திற்குப் பணிசெய்ய விரும்புகிறேன். தாராள உள்ளத்தோடும் அன்போடும் அந்த அழைப்பின்படி வாழ எனக்கு உதவியருளும். இயேசுவே, உம்மில் நம்பிக்கை வைக்கிறேன்.
பொதுக்காலத்திற்கான இறைவார்த்தைத் தியானங்கள்
இன்றைய புனிதர்கள்/திருவிழாக்கள்
திருப்பலி வாசிப்புகளுக்கான தெரிவுகள்
தவக்காலத்திற்கான இரு சிறந்த நூல்கள்:
தவக்கால மற்றும் உயிர்ப்புக்காலச் சிந்தனைகள்
கூடுதல் சிந்தனைகளுடனும் மேலும் விரிவான பொருளடக்கத்துடனும் 2022 தவக்காலம் & உயிர்ப்புக்காலத்திற்காகப் புதுப்பிக்கப்பட்டது
தவக்கால மற்றும் உயிர்ப்புக்காலச் சிந்தனைகள் என்பது கத்தோலிக்க அன்றாடச் சிந்தனைகள் நூல்வரிசையில். உள்ள நான்கு நூல்களில் ஒன்றாகும். அன்றைய நற்செய்தியைப் பற்றிய சிந்தனைகளை நடைமுறைக்கு ஏற்ற வகையிலும், விசுவாசத்திற்கு உண்மையாயும், எளிய வாழ்க்கையோடு தொடர்புடைய முறையிலும் வழங்கும் இந்த இறைபக்தி நூல், அன்றாடத் தியானத்திற்கும் இறைவேண்டலுக்கும் ஒரு சிறந்த துணையாகும். ஞாயிறு ஆண்டுகளான A, B & C, அன்றாடத் திருப்பலிகளுக்கான அனைத்து நற்செய்தித் தேர்வுகள், எல்லா விழாக்கள் மற்றும் பெருவிழாக்கள் உட்பட, தேர்ந்தெடுக்கக்கூடிய ஒவ்வொரு நற்செய்திப் பகுதிக்கும் சிந்தனைகளை வழங்குவதால், எந்தத் திருவழிபாட்டு ஆண்டிலும் பயன்படுத்தக்கூடிய வகையில் இது அமைக்கப்பட்டுள்ளது. இந்தத் தவக்காலத்திலும் உயிர்ப்புக்காலத்திலும் கிறிஸ்துவின் இறப்பும் உயிர்ப்பும் உங்கள் இதயத்தை இன்னும் முழுமையாக மாற்றியமைக்க இடமளியுங்கள்! இது மென் அட்டை நூல் & மின்னூல் வடிவங்களிலும் கிடைக்கிறது!
சிலுவையடியில் 40 நாட்கள்:
நம் புனித அன்னையின் இதயத்திலிருந்து ஓர் அன்புப் பார்வை
நம் புனித அன்னை தம் அன்பு மகனுக்கு இழைக்கப்பட்ட பெரும் துன்பத்தைத் தாங்கியபோது, அவரது உள்ளத்திலும் இதயத்திலும் நிலவியவற்றை இறைவேண்டலுடன் தியானிக்க இந்த அன்றாட ஆன்மிக வழிகாட்டி உங்களை அழைக்கிறது. அன்னை மரியா முழுமையான நம்பிக்கையோடும் அன்போடும் பக்தியோடும் தம் மகனின் சிலுவையை எதிர்கொண்டார். தம் மகனின் வாழ்நாள் முழுவதும் அவர் காட்டிய உண்மைப்பற்று அசைக்க முடியாததாக இருந்தது. நீண்ட அந்த மூன்று மணி நேரமும் சிலுவையின் முன் அவர் நின்றபோது, அந்த உண்மைப்பற்று ஒருபோதும் தளரவில்லை.
.jpg){kind=link}