ஞாயிறு, செப்டம்பர் 18, 2022
பொதுக்காலத்தின் இருபத்தைந்தாம் ஞாயிறு, ஆண்டு C
“எந்தப் பணியாளரும் இரு தலைவர்களுக்குப் பணிவிடை செய்ய முடியாது. ஒருவரை வெறுத்து மற்றவரிடம் அன்பு கொள்வார்; அல்லது ஒருவரைச் சார்ந்துகொண்டு மற்றவரை இகழ்வார். நீங்கள் கடவுளுக்கும் செல்வத்துக்கும் பணிவிடை செய்ய முடியாது.” லூக்கா 16:13
பலர் செல்வந்தர்களாக வேண்டும் என்று கனவு காண்கிறார்கள். நிறையப் பணம் இருப்பது ஓரளவு பாதுகாப்பையும், பெரும்பாலானோரால் செய்ய முடியாத பலவற்றைச் செய்வதற்கான சுதந்திரத்தையும் தருகிறது. பணம் தன்னிலேயே நல்லதும் அல்ல, கெட்டதும் அல்ல. ஒருவர் செல்வந்தராக இருப்பதில் தவறில்லை. ஒருவர் ஏழையாக இருப்பதிலும் தவறில்லை. கடவுளின் பார்வையில், உங்களிடம் எவ்வளவு பணம் இருக்கிறது என்பது அவ்வளவு முக்கியமல்ல.
இருப்பினும், பணத்தை உங்கள் “தலைவனாக” மாற அனுமதிக்கும்போதுதான் அதனால் ஆபத்து ஏற்படுகிறது. வியப்புக்குரிய வகையில், ஏழைகள்கூட இன்னும் அதிகமாகப் பணம் வேண்டும் என்ற ஆசை தங்கள் வாழ்வை ஆட்கொள்ள அனுமதிக்கும்போது, பணத்தைத் தங்கள் தலைவனாக்கிக் கொள்ளலாம். ஆசையை எவ்வாறு கையாள்கிறோம் என்பதும், ஆரோக்கியமான பற்றின்மையுமே இதில் முக்கியமானவை.
நீங்கள் எதன்மீது பற்றுக்கொண்டிருக்கிறீர்கள்? உங்களிடம் இருக்கும் பணத்தின்மீது பற்றுக்கொண்டிருக்கிறீர்களா? உங்களிடம் இருக்க வேண்டும் என்று நீங்கள் விரும்பும் பணத்திற்கான ஆசையில் பற்றுக்கொண்டிருக்கிறீர்களா? பணத்தை அதன் உண்மை இயல்பில் காண்பதே நோக்கம். வாழ்வை முழுமையாக நோக்கும்போது, பணத்திற்கு மிகக் குறைந்த மதிப்பே உண்டு. உங்கள் அன்றாடத் தேவைகளை நிறைவு செய்வதற்கான ஒரு கருவியே அது; ஆனால், உங்கள் வாழ்வின் மகிழ்ச்சிக்கும் மனநிறைவுக்கும் அது ஒருபோதும் ஊற்றாக முடியாது. கடவுள் மட்டுமே நம் இதயங்களின் தலைவராக இருக்கத் தகுதியானவர்; அவர் ஒருவரே உங்களை உண்மையான செல்வங்களால் நிரப்ப முடியும்.
பணம் இருப்பதையோ இல்லாததையோ அளவுக்கு மீறிப் பற்றிக்கொள்வதில் உங்களுக்கு இருக்கும் போராட்டங்களைப் பற்றி இன்று சிந்தியுங்கள். உங்கள் தேவையில் உங்களுக்கு வேண்டியதை வழங்குவதாகக் கடவுள் வாக்களிக்கிறார்; ஆகவே, நீங்கள் அவரை நம்புவது இன்றியமையாதது. உங்கள் பணத் தேவைகள் போக உங்களுக்கு மிகுதியாக இருந்தால், நன்றியுடன் இருங்கள்; மகிழ்ச்சிக்கான பொய்யான ஊற்றாகப் பணத்தைக் கருதுவதிலிருந்து விடுபட முயலும்போது, தாராள மனப்பான்மையை வளர்த்துக்கொள்ளுங்கள். உங்கள் இதயம், தனக்கு நிறைவளிக்கும் ஊற்றாகக் கடவுளின் வளமிக்க அருளால் மட்டுமே நிரம்பியிருக்கட்டும்; அப்போது நீங்கள் உண்மையான பொருளில் செல்வந்தராக இருப்பீர்கள்.
அனைத்திற்கும் ஆண்டவரே, என் வாழ்வின் ஒரே தலைவராக உம்மை வைத்திருக்க எனக்கு உதவியருளும். உமக்காகவும் உமது திருவுளத்தின்படி மட்டுமே வாழவும், இவ்வுலகைச் சார்ந்த அனைத்திலிருந்தும் பற்றின்றி இருக்கவும் எனக்குத் தேவையான அருளைத் தந்தருளும். அன்பு ஆண்டவரே, நான் உம்மை நேசிக்கிறேன். எல்லாவற்றிற்கும் மேலாக உம்மை நேசிக்க எனக்கு உதவியருளும். இயேசுவே, உம்மீது நம்பிக்கை வைக்கிறேன்.
மேலும் பல ஞாயிறு காணொளிச் சிந்தனைகள்
இன்றைய புனிதர்கள்/திருவிழாக்கள்
திருப்பலி வாசிப்புகளுக்கான தெரிவுகள்
