மே 19, 2023
பாஸ்கா காலத்தின் ஆறாம் ஞாயிறைத் தொடர்ந்து வரும் வெள்ளிக்கிழமை
இன்றைய வாசகங்கள்
“ஒரு பெண் பேறுகாலத்தில் இருக்கும்போது, அவளது நேரம் வந்துவிட்டதால் வேதனையடைகிறாள்; ஆனால் குழந்தையைப் பெற்றெடுத்தபின், உலகில் ஒரு குழந்தை பிறந்துவிட்டது என்ற மகிழ்ச்சியால் அந்த வலியை அவள் இனி நினைவுகூர்வதில்லை.” யோவான் 16:21
ஒரு நல்ல காரணத்திற்காக நாம் அனுபவிக்கும் எந்த விதமான வேதனைக்கும் இந்த உண்மையை நிச்சயமாகப் பொருத்திப் பார்க்கலாம். குழந்தைப் பேற்றின்போது அனுபவிக்கும் வலி, நல்லதும் புனிதமானதுமான ஒரு காரணத்திற்காக அனுபவிக்கப்படும் வலி என்பதைக் கவனியுங்கள். எனவே, தாய் தன் பச்சிளம் குழந்தையைக் கண்டு கைகளில் ஏந்தும்போது, ஒரு வகையில் அந்த வலியை மறந்துவிடுகிறாள். ஒரு குழந்தையின் பிறப்பால் அந்தத் துன்பம் மகிழ்ச்சியாக மாறிவிடுகிறது என்ற பொருளில்தான் அது மறக்கப்படுகிறது.
வாழ்க்கையில் வேதனையை ஏற்படுத்தக்கூடியவை பல உள்ளன. இன்றைய நற்செய்தியில், இயேசு தம் சீடர்களிடம் தொடர்ந்து இவ்வாறு கூறுகிறார்: “அவ்வாறே நீங்களும் இப்போது வேதனையில் இருக்கிறீர்கள்.” தாம் விரைவில் தந்தையிடம் செல்லவிருப்பதைப் பற்றியும், அவர்கள் அனைவரும் துன்புறுத்தலின் வழியாக அனுபவிக்கப்போகும் துயரத்தைப் பற்றியும் அவர்களிடம் பேசி முடித்திருந்ததால் அவர் இவ்வாறு கூறுகிறார். ஆனால், தாம் பிரிந்து சென்றபின் அவர்கள் தம்மைக் காணாவிட்டாலும், மீண்டும் தம்மைக் கண்டு மகிழ்வார்கள் என்று அவர்களிடம் கூறுகிறார். மேலும், “அந்நாளில் நீங்கள் என்னிடம் எதைப் பற்றியும் கேள்வி கேட்கமாட்டீர்கள்” என்கிறார். இது நாம் புரிந்துகொள்ள வேண்டிய முக்கியமான ஒரு வரியாகும்.
வேதனையோ வேறு எந்த விதமான துன்பமோ நம் வாழ்க்கையைக் குறித்தும், கடவுளைக் குறித்தும்கூட கேள்வி எழுப்ப நம்மைத் தூண்டலாம். இயேசு கொல்லப்பட்டபின் சீடர்கள் எல்லாவற்றையும் கேள்விக்கு உட்படுத்தினார்கள் என்பது தெளிவாகிறது. அவர்கள் குழப்பமும் அச்சமும் அடைந்திருந்தார்கள். அனைத்தையும் இழந்துவிட்டதுபோல் தோன்றியது. பின்னர், இயேசு விண்ணேற்றம் அடைந்தபின், அவர் தூய ஆவியாரை அனுப்புவதற்கு முன்பும், சீடர்கள் ஓரளவு குழப்பத்தை அனுபவித்திருப்பார்கள். இயேசு ஏன் அவர்களை விட்டுச் சென்றார்? அவர் ஏன் இன்னும் சில காலம் தங்கியிருக்கவில்லை? இனி அவர்களை வழிநடத்தப்போவது யார்? இத்தகைய கேள்விகளும், இதுபோன்ற வேறு பல கேள்விகளும் அவர்களுடைய மனங்களில் எழுந்திருக்கும்.
நமக்கும் அவ்வாறே நிகழ்கிறது. திட்டமிட்டபடி காரியங்கள் நடக்காதபோதோ, நம் வாழ்க்கையில் நிகழ்வுகள் வேதனைக்குரிய திருப்பத்தை எடுக்கும்போதோ, நாம் உடனே கடவுளின் நிறைவான திட்டத்தைக் குறித்துக் கேள்வி எழுப்பவும், சந்தேகப்படவும்கூடும். நம் பாவத்தால் காரியங்கள் சீர்குலைந்தால், மனமாற்றமே அதற்கான தீர்வு. ஆனால், வாழ்க்கை கடினமாகிறது என்ற பொருளில் காரியங்கள் சீர்குலைந்தால், இன்று இயேசு கூறும் வார்த்தைகளுக்கு நாம் குறிப்பாகச் செவிகொடுக்க வேண்டும்.
கடவுளின் திருவுளத்தை நாம் நிறைவேற்றுவதால் வாழ்க்கையில் வேதனை ஏற்படும்போது, மிகப் பெரியதொரு நன்மையை அடைவதற்கான வழியாக அந்த வேதனையை நாம் காண வேண்டும். பேறுகால வலிகள் ஒரு குழந்தை என்னும் கொடைக்கு வழிவகுப்பதுபோல, நம் வாழ்வில் கடவுளின் திருவுளத்தைச் செயலாக்கும்போது ஏற்படும் வலிகள், கடவுளே நம்மிடையே பிரசன்னமாக இருக்க வழிவகுக்கும். பொறுமையோடு தாங்கிக்கொள்வது இத்தகைய சூழலில் மிக முக்கியமான ஒரு நற்பண்பாகும். எடுத்துக்காட்டாக, ஒரு தீய பழக்கத்திற்கு அடிமையாகிய நிலையிலிருந்து மீள்வதில் ஏற்படும் வேதனை, செபிக்க மனமில்லாதபோதும் செபிப்பதில் ஏற்படும் வேதனை, நம்மைக் காயப்படுத்திய ஒருவரை மன்னிப்பதில் ஏற்படும் வேதனை ஆகிய அனைத்தும், வேதனைகள் ஆசிகளாக மாறுவதற்கான எடுத்துக்காட்டுகளாகும். நமது சுயநல விருப்பத்தை எதிர்த்துப் போராடுவது பெரும்பாலும் கடினமாகவே இருக்கிறது. ஆனால், நமக்குள்ளே இத்தகைய போராட்டத்தில் ஈடுபடுவதன் கனி மகிழ்ச்சியே. பாவத்தை வெல்வதில் மகிழ்ச்சி உள்ளது. செபத்தில் விடாமுயற்சியுடன் நிலைத்திருப்பதில் மகிழ்ச்சி உள்ளது. இறையாட்சிக்காக நாம் தாங்கிக்கொள்ளும் ஒவ்வொரு துன்பத்திலும் மகிழ்ச்சி உள்ளது. ஆனால், மகிழ்ச்சி எப்போதும் நமது முதல் அனுபவமாக இருப்பதில்லை. அந்தச் சூழ்நிலையைப் பொறுமையோடு தாங்கிக்கொள்ளும்போதுதான் அதை அனுபவிக்கிறோம்.
கடவுளின் மாட்சிக்காக இப்போது நீங்கள் தாங்கிக்கொண்டிருக்கும் எந்த விதமான வேதனையையும் பற்றி, அல்லது செய்வதற்குக் கடினமாகத் தோன்றுவதால் தற்போது நீங்கள் தவிர்த்துவரும் எதையும் பற்றி இன்று சிந்தியுங்கள். இந்தக் கடினங்களை எதிர்கொள்ளத் தயங்காதீர்கள். மாட்சிமிக்கதொரு முடிவை அடைவதற்கான வழியாக அவற்றைக் காணுங்கள். தொடக்கத்தில் நீங்கள் அனுபவிக்கும் கடினங்களுக்கு அப்பால் நோக்கி, உங்களுக்காகக் காத்திருக்கும் இறுதி விளைவைக் காணுங்கள். இவ்வாறு, கடவுள் உங்களை அழைக்கும் தூய்மைப்படுத்தலுக்கும் பணிக்கும் உரிய “பேறுகால வேதனைகளை” தாங்கிக்கொள்ளுங்கள்.
மாட்சிமிக்க என் ஆண்டவரே, முழுமையான நற்பண்புடன் உமது திருப்பாடுகளைத் தாங்கிக்கொண்டீர். தந்தையின் திருவுளத்தை நிறைவேற்றுவதிலிருந்து நீர் ஒருபோதும் தளரவில்லை; உமது விடாமுயற்சியின் கனியாக உயிர்த்தெழுதலின் மாட்சி விளங்கியது. என் வாழ்வின் சிலுவைகளைப் பொறுமையோடு தாங்கிக்கொள்ள எனக்கு உதவியருளும். அவற்றிலிருந்து நிலைவாழ்வின் மகிழ்ச்சி என்னும் நற்கனியை நீர் விளைவிப்பீர் என்பதை உணர எனக்கு நம்பிக்கை அளித்தருளும். இயேசுவே, உம்மில் நம்பிக்கை வைக்கிறேன்.
தூய ஆவியாருக்கு நவநாள் செபம்
தூய ஆவியாரின் வருகைப் பெருவிழாவுக்குத் தயாரிப்பாகச் செபிக்கப்படுவது
முதல் நாள் – வெள்ளிக்கிழமை, மே 19
இன்றைய புனிதர்கள்/திருவிழாக்கள்
திருப்பலி வாசிப்புகளுக்கான தெரிவுகள்
