తెలుగు

శిష్యత్వానికి చెల్లించవలసిన మూల్యం

ఫిబ్రవరి 28, 2022
సామాన్య కాలం ఎనిమిదవ వారంలోని సోమవారం
నేటి పఠనాలు

వీడియో

ఆంగ్లంలో వినండి

యేసు అతనిని చూసి, అతనిని ప్రేమించి, అతనితో ఇలా అన్నారు: “నీకు ఇంకా ఒకటి కొదువగా ఉంది. వెళ్ళి, నీకున్నవాటిని అమ్మి పేదలకు ఇవ్వు. అప్పుడు పరలోకంలో నీకు నిధి ఉంటుంది; ఆ తరువాత వచ్చి నన్ను అనుసరించు.” ఆ మాటకు అతని ముఖం చిన్నబోయింది. అతనికి చాలా ఆస్తులు ఉండటంతో, అతను దుఃఖంతో వెళ్ళిపోయాడు.  మార్కు 10:21-22

ఈ పవిత్ర గ్రంథ భాగంలో ప్రత్యేకంగా గమనించవలసిన రెండు ముఖ్యమైన విషయాలు ఉన్నాయి.  మొదటిది యేసు స్పందన, రెండవది ఆ ధనవంతుడైన యువకుని స్పందన.

యేసు అతనిని చూసి, “అతనిని ప్రేమించారు” అని ఈ భాగం చెబుతోంది.  యేసు ఈ యువకుడిని ఏమి చేయమని పిలుస్తున్నారో తెలుసుకునే ముందు, ఈ వాక్యాన్ని గమనించడం ముఖ్యం.  తనకున్నదంతా వదులుకొని, అంతా పంచిపెట్టి, వచ్చి తనను అనుసరించమని యేసు అతనిని పిలుస్తున్నారు.  ప్రేమతోనే యేసు అతనిని ఇలా చేయమని ఆహ్వానించారు.  

ఈ యువకుడు ప్రస్తుతం తనకున్నదానికంటే ఎంతో ఎక్కువ పొందాలని యేసు అతనిని ఆహ్వానిస్తున్నారు.  అందుకే తనను సంపూర్ణంగా, సమూలంగా అనుసరించమని ఆ యువకుని ఆహ్వానించే ముందు యేసు అతనిని ప్రేమతో చూశారు.  కానీ ఈ సందర్భంలో యేసును ప్రేమించడం బాధను కలిగించబోతోంది.  యేసును అనుసరించడానికి అతను తనకున్నదంతా పూర్తిగా త్యాగం చేయవలసి ఉంటుంది కాబట్టి అది బాధను కలిగించబోతోంది.  అది సంపూర్ణమైన, సమూలమైన త్యాగం.  కేవలం మానవ, లౌకిక దృక్కోణం నుంచి చూసినప్పుడైనా అది కష్టమైనదే.  కానీ ఈ యువకునిపట్ల యేసుకున్న ప్రేమ ఎంత పరిపూర్ణమైనదంటే, ఆ ధనవంతుడు ఎంతో ఎక్కువ పొందేలా, తనకున్నదంతా త్యాగం చేయడంలోని బాధను భరించమని అతనిని ఆహ్వానించడానికి యేసు సిద్ధంగా ఉన్నారు.

మనం కూడా అలాగే చేయమని ఆహ్వానించబడుతున్నాం.  అయితే, మన భౌతిక ఆస్తులన్నిటినీ వదులుకొని యేసును అనుసరించే ఆ విశిష్టమైన, సమూలమైన మార్గానికి మనకు పిలుపు ఉండకపోవచ్చు.  కానీ అంతే గాఢమైన నమ్మకంతో, ఆయన దివ్య చిత్తానికి మనల్ని మనం అంతే సంపూర్ణంగా అప్పగించుకొని యేసును అనుసరించడానికి మనకు పిలుపు ఉంది.  అందుకు తప్పనిసరిగా త్యాగం అవసరమవుతుంది.  అత్యున్నత స్థాయి త్యాగం అవసరమవుతుంది.  

శిష్యత్వానికి యేసు ఇచ్చే పిలుపునకు మన స్పందన కీలకమైనది.  మనల్ని మనం పూర్తిగా సమర్పించుకోవాలనే ఈ ఆహ్వానానికి మనం ఎలా స్పందిస్తాం?  ఆ ధనవంతుడైన యువకుడు మొదట దుఃఖంతో స్పందించాడు.  యేసు ఇచ్చిన ఆహ్వానాన్ని అతను అంగీకరించలేదు.  చివరికి అతను యేసును ఈ సమూలమైన, సంపూర్ణమైన మార్గంలో అనుసరించాడో లేదో మనకు తెలియదు. కానీ అతని తొలి స్పందన ఏమిటో మనకు తెలుసు.  

తరచూ మన తొలి స్పందన కూడా ఇలాగే ఉంటుంది.  మనం విశ్వాసపాత్రులుగా ఉండాలని, క్రీస్తు ఏమి అడిగినా ఆయనను అనుసరించాలని కోరుకుంటాం.  కానీ ఆయన పిలుపునకు స్పందించడానికి ఒక నిర్దిష్టమైన ఆహ్వానం వచ్చినప్పుడు, అది మన నుంచి మరీ ఎక్కువ కోరుతోందని భావించి దుఃఖంతో వెనుదిరుగుతాం.

ఈ రోజు, ఈ ధనవంతుడైన యువకుని గురించి ధ్యానించండి.  మీ సొంత జీవితాన్ని పరిశీలించి, యేసు మిమ్మల్ని ఏది అడిగినా దానికి సంపూర్ణంగా “అవును” అని చెప్పడానికి మీరు ఎంత సిద్ధంగా, సుముఖంగా ఉన్నారో ఆలోచించండి.  త్యాగపూర్వకంగా “అవును” అని చెప్పడం మీరు తీసుకోగల అత్యుత్తమ నిర్ణయం.  వాస్తవానికి, మీరు జీవించగల అత్యంత మహిమాన్వితమైన జీవితాన్ని ఇష్టపూర్వకంగా అంగీకరించడమే అది.

నా నుంచి ఎంతో కోరే నా ప్రభువా, నిన్ను అనుసరించడం కొన్నిసార్లు కష్టంగానూ, సమూలమైన మార్పును కోరేదిగానూ అనిపించవచ్చు.  అది నా శక్తికి మించినదిగా అనిపించవచ్చు.  ముఖ్యంగా అటువంటి క్షణాల్లో, ఈ లోకంలో నాకున్న అనేక మమకారాలకంటే నిన్నే ఎక్కువగా నమ్మడానికి నాకు సహాయం చేయి.  యేసూ, నేను నీపై నమ్మకం ఉంచుతున్నాను.

శాంతి కొరకు ప్రార్థనలు

యుద్ధాలను ఆపండి…ఇంట్లోనే—వీడియో
శాంతి కోసం జపమాల ప్రార్థన చేయమని ఫాతిమా మాత మనలను పిలుస్తున్నారు

మరిన్ని సువార్త ధ్యానాలు

దైవకారుణ్య ధ్యానాలు

సామాన్య కాలానికి పవిత్ర గ్రంథ ధ్యానాలు

నేటి పునీతులు/పండుగలు

దివ్యబలిపూజ పఠనాల ఎంపికలు

పైన ప్రదర్శించిన చిత్రం: హైన్రిఖ్ హోఫ్‌మాన్, “క్రీస్తు మరియు ధనవంతుడైన యువ అధికారి”, వికీమీడియా కామన్స్ ద్వారా


తపస్సుకాలం కోసం రెండు గొప్ప పుస్తకాలు:

తపస్సుకాలం మరియు పాస్కా ధ్యానాలు
అదనపు ధ్యానాలు, మరింత వివరమైన విషయసూచికతో 2022 తపస్సుకాలం & పాస్కా కొరకు నవీకరించబడింది

తపస్సుకాలం మరియు పాస్కా ధ్యానాలు అనేది దైనందిన కతోలిక ధ్యానాల గ్రంథమాలలోని నాలుగు పుస్తకాలలో ఒకటి.  భక్తి గ్రంథంగా ఇది దైనందిన ధ్యానానికి, ప్రార్థనకు ఎంతో ఉపయోగకరమైన వనరు. ఆచరణాత్మకంగా, విశ్వాసానికి అనుగుణంగా, నిత్యజీవితానికి దగ్గరగా ఉండే విధంగా నాటి సువార్తపై ధ్యానాలను అందిస్తుంది. ఏ ఆరాధనాక్రమ సంవత్సరానికైనా ఉపయోగించుకునేలా ఇది రూపొందించబడింది. ఆదివారాల A, B & C సంవత్సరాలు, ప్రతిరోజు దివ్యబలిపూజలో ఎంచుకోదగిన అన్ని పఠనాలు, పండుగలు, మహోత్సవాలు అన్నిటికీ సంబంధించిన ప్రతి సువార్త ఎంపికపై ధ్యానాలను అందిస్తుంది. ఈ తపస్సుకాలంలో, పాస్కా కాలంలో క్రీస్తు మరణం, పునరుత్థానం మీ హృదయాన్ని మరింత సంపూర్ణంగా మార్చనివ్వండి!  ఇది పేపర్‌బ్యాక్ & ఈ-పుస్తక రూపంలో కూడా లభిస్తుంది!

సిలువ పాదాల చెంత 40 రోజులు:
మన ధన్యమాత హృదయం నుండి ప్రేమపూర్వక వీక్షణం

మన ధన్యమాత తన ప్రియ కుమారునిపై మోపబడిన ఘోర యాతనను చూస్తూ అనుభవించిన మహా వేదనలో ఆమె మనస్సును, హృదయాన్ని ప్రార్థనాపూర్వకంగా ధ్యానించమని ఈ దైనందిన భక్తి గ్రంథం మిమ్మల్ని ఆహ్వానిస్తుంది.  మరియమాత పరిపూర్ణ విశ్వాసం, ప్రేమ, భక్తితో తన కుమారుని సిలువను ఎదుర్కొంది. ఆయన జీవితమంతటా తన కుమారుని పట్ల ఆమె విశ్వసనీయత అచంచలంగా నిలిచింది. ఆ సుదీర్ఘమైన మూడు గంటలపాటు ఆమె సిలువ ఎదుట నిలిచి ఉన్నప్పుడు, ఆ విశ్వసనీయత ఎన్నడూ సడలలేదు.