సెప్టెంబరు 5, 2022
సామాన్య కాలపు ఇరవై మూడవ వారంలోని సోమవారం
నేటి పఠనాలు
కలకత్తా పునీత మదర్ తెరిసా—స్మరణ

ఆంగ్లంలో వినండి
“నీ చెయ్యి చాపు.” అతడు అలా చేయగానే అతని చెయ్యి బాగుపడింది. అయితే వారు కోపంతో రగిలిపోయి, యేసుకు ఏమి చేయవచ్చో తమలో తాము చర్చించుకున్నారు. లూకా 6:10-11
ఇది ఎంతో కలవరపరిచే వాక్యభాగం. ధర్మశాస్త్ర బోధకులు, పరిసయ్యులు ఉద్దేశపూర్వకంగా, పథకం ప్రకారం ఎంతో దురుద్దేశంతో ప్రవర్తించారని మనం పదేపదే చూస్తాము. ఇక్కడ వారు యేసుపై నింద మోపడానికి ఆయన చేసే పనుల్లో ఏదో ఒకటి దొరుకుతుందేమోనని వెతుకుతున్నారు. మరి ఆయనపై నింద మోపడానికి వారికి ఏమి దొరికింది? ఆయన విశ్రాంతి దినాన ఒక అద్భుతం చేయడాన్ని వారు చూస్తారు. యేసు అలా చేయడం పాపమైనట్లుగా వారు ప్రవర్తిస్తారు. నిజంగానా?
ఈ వాక్యభాగం ఇంతగా కలవరపరచడానికి కారణం ఏమిటంటే, ఆనాటి మతనాయకులు స్పష్టంగా తమ గురించి మాత్రమే పట్టించుకున్నారు; తామే ముఖ్యులమనే వారి భావనకు యేసు అడ్డుగా నిలిచాడు. ధర్మశాస్త్ర పండితులు, పరిసయ్యుల కంటే ఆయనకు ప్రజాదరణ, గౌరవం పెరుగుతుండటంతో వారు అసూయతో నిండిపోయారు.
ఈ వాక్యభాగం నుండి నేర్చుకోవలసిన ఒక ముఖ్యమైన విషయం ఏమిటంటే, అసూయ అనే పాపం మనల్ని విచక్షణ కోల్పోయేలా చేసి, అవివేకం వైపు నడిపిస్తుంది. ఈ పాపం మనల్ని అంధులుగా చేసి, అవివేకంగా ఆలోచించేలా, మాట్లాడేలా చేస్తుంది. ధర్మశాస్త్ర బోధకులు, పరిసయ్యులు చేసింది ఇదే. విశ్రాంతి దినాన స్వస్థపరచడం వంటి మంచి పని చేసినందుకు యేసును సక్రమమైన బుద్ధి ఉన్నవారెవరైనా “నిందిస్తారా”? అసూయతో అంధులైనవారు మాత్రమే అలా చేస్తారు.
ఈ వాక్యభాగం కలవరపరిచేదిగా ఉన్నప్పటికీ, అది మన మేలుకు తోడ్పడే విధంగా మనలను కలవరపరచాలని ఆశిద్దాం. మనలో ప్రతి ఒక్కరం మన జీవితాలను పరిశీలించుకోవడానికి, మన సంబంధాలను పరీక్షించుకోవడానికి ఇది ఒక అవకాశంగా ఉండాలి. ఆ సంబంధాలలో దేనిలోనైనా అసూయ ఉన్నట్లు మీకు కనిపిస్తోందా? ఒక్కోసారి ఈ వ్యక్తి పట్లనో, ఆ వ్యక్తి పట్లనో మీరు హేతుబద్ధంగా ఆలోచించకుండా ప్రవర్తిస్తున్నట్లు గమనిస్తున్నారా?
ధర్మశాస్త్ర పండితులు, పరిసయ్యుల వలె ప్రవర్తించే ధోరణి మీలో ఏమైనా ఉందేమో నేడు ధ్యానించండి. మనం కొన్నిసార్లు పోరాడే ఈ వికృతమైన పాపం గురించి మనకు బోధించడానికే వారి చర్యలు పవిత్ర గ్రంథంలో చేర్చబడ్డాయని తెలుసుకోండి. ఇందులోని కలవరపరిచే అంశం మీ జీవితంలో అసూయ నుండి విముక్తి పొందేందుకు కృషి చేసేలా మిమ్మల్ని ప్రేరేపించనివ్వండి.
అద్భుతాలు చేసే నా ప్రభువా, గర్వం, అసూయ, ఈర్ష్య అనే పాపాల నుండి విముక్తి పొందాలని నేను నిజంగా కోరుకుంటున్నాను. నా జీవితంలో వీటిని గుర్తించి, వీటి విషయమై పశ్చాత్తాపపడి, వాటి స్థానంలో నీ కరుణను, ప్రేమను నింపుకోవడానికి నాకు సహాయం చేయుము. యేసూ, నేను నీపై నమ్మకం ఉంచుతున్నాను.
సామాన్య కాలానికి పవిత్ర గ్రంథ ధ్యానాలు
నేటి పునీతులు – కలకత్తా పునీత మదర్ తెరిసా
పైన ప్రదర్శించిన చిత్రాలు: క్రీస్తు ఆ వ్యక్తిని స్వస్థపరుస్తున్నారు , వికీమీడియా కామన్స్ ద్వారా




