Saturday, March 2, 2019
Saturday of the Seventh Week in Ordinary Time
Paminaw sa Iningles
“Pasagdi ang mga bata nga moduol kanako; ayaw sila pugngi, kay ang Gingharian sa Diyos iya sa mga sama kanila. Sa pagkatinuod, sultihan ko kamo, ang dili modawat sa Gingharian sa Diyos sama sa usa ka bata dili gayod makasulod niini.” Unya gigakos niya ang mga bata ug gipanalanginan sila, nga gipandong ang iyang mga kamot kanila. Marcos 10:14-16
Gigamit ni Jesus ang panig-ingnan sa mga bata aron ipasabot kon unsaon nato pagdawat ang Gingharian sa Diyos. Kinahanglan nato kining dawaton sama sa pagdawat sa usa ka bata. Dili uban sa pagduda o pagduhaduha, kondili uban sa bukas nga kasingkasing, kalipay ug kayano. Apan kining teksto sa ibabaw nagpadayag usab og laing kamatuoran nga dili dayon mamatikdan. Nagpadayag kini sa natural ug himsog nga pagmahal nga angay natong ihatag sa uban.
Ang kalibotan nga atong gipuy-an karon nagkaanam og kahilig sa pagpatuyang sa kahilayan ug sa tawhanong mga tinguha nga nasayop og tumong. Ang kaibog lagmit maoy naghari sa atong kultura, hangtod nga daw normal na lang ang pagtan-aw sa laing tawo isip butang nga pangibogan. Labing klaro kining makita sa mga anunsiyo ug sa Hollywood. Kaylap ang mga sala sa seksuwalidad ug grabe ang epekto niini sa daghang tawo, hangtod nga nahimo silang mga binilanggo niini ug dili na makalingkawas.
Usa ka makapasubo nga sangpotanan niini mao ang daw pagkawala sa himsog nga tawhanong pagmahal. Sa usa ka kultura nga sobra ka puno sa seksuwal nga mga pagtan-aw, dali ra kitang magsugod sa pagtan-aw sa tanang butang pinaagi niana nga panglantaw, naamgohan man nato kini o wala. Tungod niini, mawala ang pagsabot sa himsog nga tawhanong pagmahal.
Niining teksto sa Ebanghelyo, miingon si Jesus, “Pasagdi ang mga bata nga moduol kanako.” Mipadayon kini, “Unya gigakos niya ang mga bata ug gipanalanginan sila, nga gipandong ang iyang mga kamot kanila.” Kini nga mga teksto nagpadayag kanato sa balaan, natural ug himsog nga pagmahal ni Jesus alang niining mga bata ug alang kanatong tanan. Apan dili lamang mga bata ang miduol Kaniya. Ang babayeng nasakpan nga nanapaw migakos usab sa Iyang mga tiil, ug si Juan nga Apostol misandig Kaniya sa Kataposang Panihapon.
Ang tawhanong pagmahal kinahanglang putlion ug tubson aron ikahatag kini sa uban nga walay hakog nga mga tuyo ug, sa walay duhaduha, walay dili hapsay nga seksuwal nga mga tinguha. Kon mahimo kini, sama sa gibuhat ni Jesus, ang paggakos sa ginikanan sa iyang anak, sa usa ka higala ngadto sa laing higala, sa usa ka kapikas ngadto sa iyang kapikas, ug uban pa, mahimong balaan ug natural nga pagpahayag sa gugma nga anaa sa kasingkasing ni Cristo.
Pamalandongi karon ang kaayo sa himsog nga tawhanong pagmahal. Apan pamalandongi usab ang kamatuoran nga ang atong kultura napuno sa hilabihang kahugawan nga nakapahinabog kalibog bahin niining natural nga pagbayloay sa gugma. Pag-ampo nga padayon kang hatagan sa balaang kaputli sa kasingkasing aron ang atong Ginoo makadapit og daghan ngadto Kaniya pinaagi sa imong kasingkasing ug pagmahal.
Lord, help me to be pure of heart. Help me to allow You to purify all my affections so that You will shine through. Free me of the selfish temptations of the culture we live in and give me instead a selfless expression of Your love. Jesus, I trust in You.
Dugang nga mga Pamalandong sa Ebanghelyo
Mga Pamalandong sa Diosnong Kalooy
