February 14, 2020
Friday of the Fifth Week in Ordinary Time
Readings for Today
Santos Cirilo, Monghe, ug Metodio, Obispo—Handumanan
“Ephphatha!” (nga nagpasabot, “Maabli ka!”) Ug dihadiha naabli ang mga dalunggan sa maong tawo. Mark 7:34-35
Unsa ka sagad nimo madungog si Jesus nga nagaingon niini kanimo? “Ephphatha! Maabli ka!” O unsa ka sagad nimo Siya madungog nga nakigsulti kanimo uban sa ingon niana nga awtoridad?
Gisulti ba kini ni Jesus tungod lamang kay bungol sa lawas kining tawhana ug gusto Niya siyang ayohon sa pisikal? O aduna ba kini mas lawom nga kahulogan? Pinaagi sa pag-ayo niining tawhana nga dili makadungog sa pisikal nga mga tingog, gipadayag kanato ni Jesus ang usa ka butang bahin sa gusto Niyang buhaton alang kanato. Niining pag-ayo, si Jesus naghatag kanato og tin-aw ug mas lawom nga mensahe. Sa pagkatinuod, daghan kitag makat-onang mensahe gikan niining maong teksto. Atong tan-awon ang usa niini.
Ang mensahe anaa sa sugo ni Jesus: “Maabli ka!” Gamhanan kining mga pulonga nga nagsugo nga adunay mahitabo. Dili kini mga pulong nga mahimong sundon o dili. Tin-aw ug tino kini. Ang “Maabli ka” dili usa ka pangutana, dili usa ka pagdapit, kondili usa ka sugo. Mahinungdanon kini!
Kining duha ka mugbong pulong nagpadayag nga si Jesus nakahukom na sa paglihok. Gipadayag niini nga wala gayod Siya magduhaduha niining Iyang pagpili. Nakahukom na Siya ug gipahayag na Niya ang Iyang kabubut-on. Ug kining Iyang paglihok mao ang nagdala sa kausaban. Kining duha ka mugbong pulong nagpadayag nga ang Dios dili magduhaduha kon Siya mosulti. Dili Siya maulawon o dili sigurado. Hingpit ug tin-aw ang Iyang gisulti.
Kini nga pagsabot angay makahatag kanato og dakong kahupayan. Kahupayan tungod kay si Jesus andam ug buot mogamit sa Iyang labing gamhanang awtoridad. Anaa gayod Kaniya ang tanang gahom ug dili Siya mahadlok sa paggamit niini nga awtoridad kon buot Niya. Labaw sa tanan, buot Niyang gamiton ang Iyang awtoridad kon kini makahatag sa labing dakong kaayohan sa atong kinabuhi.
Angay kini makahatag kanato og dakong kahupayan kay makasalig kita nga kining Dios nga makagagahom sa tanan tinuod gayod nga makagagahom sa tanan ug tinuod gayod nga nagdumala sa tanan. Kon gani Siya nagdumala sa natural nga kalibotan (sa pisikal nga pandungog), sigurado gayod nga nagdumala usab Siya sa espirituhanong kalibotan. Makahimo Siya sa tanang maayong butang.
Kon maamgohan nato nga anaa kita sa atubangan sa Usa nga dili lamang makagagahom sa tanan, kondili hingpit usab nga mahigugmaon ug maluluy-on, makaginhawa na unta kita nga may dakong kahupayan ug makasalig Kaniya sa hingpit. Makahimo Siya ug bug-os nga andam sa pagdumala sa tanan.
Pamalandongi karon kining duha ka mugbong pulong. Tugoti kining balaan ug diosnong awtoridad ni Jesus nga magdumala sa imong kinabuhi. Tugoti Siya nga mosugo kanimo. Ang Iyang mga sugo hingpit nga gugma ug kaluoy. Mga pulong kini nga mogiya kanimo ngadto sa imong kinatas-ang kaayohan. Ug kining Dios nga makagagahom sa tanan takos sa imong bug-os nga pagsalig.
Lord, I do trust You and I know that You can do all things. I know that You desire to have perfect authority in my life. Help me to turn my life fully over to You and to trust You enough to direct and to command every action of my life. Jesus, I fully trust in You!
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
