Wednesday, March 25, 2020
Solemnidad sa Pagpahibalo sa Anghel kang Maria
Paminaw sa Iningles
Unya miingon ang manulunda kaniya, “Ayaw kahadlok, Maria, kay gikahimut-an ka sa Dios. Tan-awa, manamkon ka sa imong sabakan ug manganak og usa ka lalaki, ug nganlan mo Siyag Jesus. Mahimo Siyang bantogan ug pagatawgon nga Anak sa Labing Halangdon, ug ihatag Kaniya sa Ginoong Dios ang trono ni David nga Iyang amahan, ug maghari Siya sa panimalay ni Jacob hangtod sa kahangtoran, ug ang Iyang Gingharian walay kataposan.” Luke 1:30–33
Malipayong Dakong Kapistahan! Karon gisaulog nato ang usa sa labing mahimayaong mga kapistahan sa tibuok tuig. Siyam pa ka bulan gikan karon ang Pasko, ug karong adlawa gisaulog nato ang kamatuoran nga ang Dios Anak misagop sa atong tawhanong kinaiya diha sa sabakan sa Bulahang Birhen. Kini ang pagsaulog sa Pagkahimong Tawo sa atong Ginoo.
Daghan kitag angay saulogon karong adlawa ug daghang butang nga angay natong pasalamatan hangtod sa kahangtoran. Una sa tanan, gisaulog nato ang lawom nga kamatuoran nga dako kaayo ang gugma sa Dios kanato nga nahimo Siyang usa kanato. Ang kamatuoran nga ang Dios misagop sa atong tawhanong kinaiya takos sa walay kinutobang pagmaya ug pagsaulog! Kon nasabtan pa lamang nato ang kahulogan niini. Kon nasabtan pa lamang nato ang mga epekto niining talagsaong hitabo sa kasaysayan. Ang kamatuoran nga ang Dios nahimong tawo diha sa sabakan sa Bulahang Birhen usa ka gasa nga labaw pa sa atong masabtan. Kini usa ka gasa nga nagpataas sa katawhan ngadto sa diosnong kahimtang. Ang Dios ug ang tawo nahiusa niining mahimayaong hitabo ug angay kitang mapasalamaton hangtod sa kahangtoran.
Makita usab nato niining hitaboa ang mahimayaong buhat sa hingpit nga pagpasakop sa kabubut-on sa Dios. Makita nato kini diha mismo sa Bulahang Inahan. Angayng timan-an nga ang atong Bulahang Inahan gisultihan nga “manamkon ka sa imong sabakan ug manganak og usa ka lalaki…” Wala siya pangutan-a sa manulunda kon andam ba siya; hinuon, gisultihan siya kon unsay mahitabo. Nganong ingon man niini?
Nahitabo kini sa ingon niini tungod kay ang Bulahang Birhen miingon og oo sa Dios sa tibuok niyang kinabuhi. Walay bisan usa ka higayon nga mibalibad siya sa Dios. Busa, ang iyang kanunayng pag-oo sa Dios nakapahimo sa manulundang Gabriel sa pagsulti kaniya nga siya “manamkon.” Sa laing pagkasulti, ang manulunda nakasulti kaniya sa butang nga iyang giuyonan na daan sa iyang kinabuhi.
Pagkamahimayaon niining panig-ingnan. Ang “Oo” sa atong Bulahang Inahan usa ka talagsaong pagpamatuod alang kanato. Gitawag kita sa pag-oo sa Dios matag adlaw. Ug gitawag kita sa pag-oo Kaniya bisan sa wala pa nato mahibaloi kon unsay Iyang gipangayo kanato. Kining dakong kapistahan naghatag kanato og higayon sa pag-ingon pag-usab og “Oo” sa kabubut-on sa Dios. Bisan unsa pay Iyang gipangayo kanimo, ang hustong tubag mao ang “Oo.”
Pamalandongi karong adlawa ang pagdapit sa Dios kanimo sa pag-ingon og “Oo” Kaniya sa tanang butang. Ikaw, sama sa atong Bulahang Inahan, gidapit sa pagdala sa atong Ginoo nganhi sa kalibotan. Dili sa literal nga paagi nga iyang gibuhat, apan gitawag ka nga mahimong instrumento sa Iyang padayon nga Pagkahimong Tawo dinhi sa atong kalibotan. Pamalandongi kon unsa ka hingpit ang imong pagtubag niini nga tawag, ug luhod karong adlawa ug isulti ang “Oo” sa plano sa atong Ginoo alang sa imong kinabuhi.
Ginoo, ang tubag mao ang “Oo!” Oo, gipili ko ang Imong diosnong kabubut-on. Oo, buhata kanako ang bisan unsang Imong kabubut-on. Hinaot nga ang akong “Oo” mahimong putli ug balaan sama sa “Oo” sa atong Bulahang Inahan. Matuman unta kanako ang sumala sa Imong kabubut-on. Jesus, misalig ako Kanimo.
40 Days at the Foot of the Cross – Reflection Twenty-Eight – His Hands and Feet
Mga Kapanguhaan alang sa Kwaresma
Prayers to Combat the Coronavirus Pandemic and Mass Online
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
Image: The Annunciation, Carl Heinrich Bloch
