April 16, 2020
Thursday of the Octave of Easter
Readings for Today
Paminaw sa Iningles
Samtang dili pa gihapon sila makatuo tungod sa kalipay ug nahingangha, nangutana Siya kanila, “Aduna ba kamoy makaon dinhi?” Gihatagan nila Siya ug usa ka pirasong isda nga giluto sa hudno; gikuha Niya kini ug gikaon sa ilang atubangan. Lucas 24:41–43
“Dili makatuo tungod sa kalipay!” Pagkaanindot nga paghulagway sa reaksyon sa mga tinun-an ngadto kang Jesus! Ang “dili makatuo” nagpasabot nga ang mga tinun-an dili sigurado kon unsay tuohan. Nagpanuko sila sa pagtuo sa ilang nakita. Anaa si Jesus, nga ilang nakita nga gilansang sa krus, nagtindog sa ilang atubangan uban sa mga samad sa Iyang mga kamot ug tiil. Nakigsulti Siya kanila ug nangayo ug makaon. Daw nakurat sila, dili makatuo ug nagduhaduha.
Apan ang paghulagway nag-ingon nga dili sila makatuo “tungod sa kalipay!” Daw hapit na silang mobuto sa kalipay; gusto nilang mabati ang kalipay sa ilang nakita, apan adunay nagpugong kanila. Daw maayo ra kaayo ang tanan aron mahimong tinuod. Tinuod ba kini? Posible ba nga nabuntog gayod ni Jesus ang kamatayon ug nakig-uban na usab Siya kanila?
Kini nga reaksyon sa mga tinun-an nagpadayag sa usa ka kasinatian nga atong maagian usahay sa dihang gidapit kita sa Dios sa pagsulod sa Iyang himaya ug grasya. Kasagaran, sa dihang dapiton kita sa Dios nga mas moduol Kaniya, sa dihang dapiton kita Niya nga masinati ang kalipay sa Iyang Pagkabanhaw, magpanuko kita. Mahimong maglisod kita sa pagtugot sa atong kaugalingon nga tinuod nga masinati ang kamatuoran sa Pagkabanhaw diha sa atong kinabuhi.
Mahitabo kini tungod sa daghang hinungdan. Ang pagkaluya sa buot maoy usa sa mga hinungdan sa atong pagpanuko sa hingpit nga pagdawat sa Pagkabanhaw. Naluya pag-ayo ang buot sa mga tinun-an sa pagkamatay ni Jesus. Ug karon nga nabanhaw na Siya ug nagtindog didto sa ilang atubangan, nagpanuko sila sa pagbiya sa pagkaluya sa buot nga ilang gitugot nga mogapos kanila.
Sa samang paagi, dali ra usab kitang madaog sa kabug-at sa kalibotan, sa atong sala, o sa mga sala sa uban. Mahimo kitang masuko o mabalaka ug magsige na lang ug hunahuna sa mga problemang atong giatubang. Ang pagkalipay sa Pagkabanhaw nagpasabot nga ibaling nato ang atong mga mata gikan niadtong mga butanga ug tutokan ang mga kamatuoran nga gusto sa Dios nga atong hatagan ug pagtagad. Walay kaayohan ang pagkaluya sa buot tungod sa daghang problemang moabot kanato. Hinuon, kanunay kitang gitawag sa atong Ginoo nga motan-aw lapas niini ngadto sa usa ka butang nga mas labaw pa. Gitawag kita Niya nga motan-aw sa Iyang kadaugan! Ang pagtan-aw sa Iyang kadaugan makapalingkawas ug mopatubo ug talagsaong pagtuo diha sa atong kinabuhi. Ug kana nga pagtuo sa Nabanhaw nga Ginoo magbunga sa kahibulongang kalipay nga gusto sa Dios nga maangkon nato.
Pamalandongi karon ang imong kaugalingong reaksyon sa kamatuoran sa Pagkabanhaw sa atong Ginoo. Paggahin ug panahon karong adlawa sa pagtutok sa Nabanhaw nga Ginoo. Tan-awa ang Iyang kadaugan. Tan-awa ang Iyang himaya. Tan-awa Siya nga nagtawag kanimo ngadto sa lawom nga pagtuo. Kon itutok nimo ang imong mga mata Kaniya, ang tanan nga makatintal kanimo sa pagkaluya sa buot anam-anam lamang nga mahanaw.
Lord, I do want to gaze upon You. I want to see Your splendor and glory. I want to see You risen from the dead and take great joy and delight in this reality. Help me, dear Lord, to experience the incredible joy that comes from knowing You, our Resurrected Lord. Jesus, I trust in You.
Dugang pa alang sa Pasko sa Pagkabanhaw
Ikapitong Adlaw: Nobena isip pagpangandam alang sa Domingo sa Diosnong Kalooy
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
Daily Reflections on Divine Mercy:
365 Days with Saint Faustina
