April 17, 2020
Friday of the Octave of Easter
Readings for Today
Paminaw sa Iningles
“Itaktak ang pukot sa tuong daplin sa sakayan ug makakuha kamo.” Busa ilang gitaktak kini, ug dili na nila kini mabira tungod sa kadaghan sa mga isda. Juan 21:6
Ang matag mangingisda mangandoy nga makasinati sa gihatag ni Jesus sa mga Apostoles diha sa teksto sa ibabaw. Tibuok gabii nga nangisda ang mga Apostoles apan wala silay nakuha. Unya, sa pagkabuntag, mipakita si Jesus sa baybayon apan wala sila makaila Kaniya. Dayon gihatagan Niya sila og yano nga sugo nga itaktak ang ilang pukot sa tuong daplin sa sakayan. Ug daghan kaayo silang nakuhang isda nga dili na nila mabira ang pukot. Pagkakahinam gayod sa ilang dakop!
Kining pagdakop sa mga isda dili lamang usa ka pabor gikan kang Jesus aron tabangan sila sa ilang trabaho. Puno kini sa simbolikong kahulogan. Ang pangunang gisimbolo niini mao nga si Jesus naghatag sa mga Apostoles og bag-ong tawag. Dili na lamang mga isda ang ilang pangisdaon; karon, mga kalag na ang ilang pangisdaon. Ug ang hinungdanong bahin mao nga kon sulayan nila kini pinaagi lamang sa ilang kaugalingong paningkamot, wala gayod silay makuha. Apan kon buhaton nila kini sa sugo sa Ginoo, sa Iyang paagi, ug sa Iyang gitakdang panahon, ang ilang mga paningkamot makahatag og dagayang maayong bunga. Labaw pa sa ilang mahunahuna!
Kining milagro ni Jesus nagsugod sa pagpadayag ngadto sa mga Apostoles (ug kanato) sa sugo nga ipasangyaw ang Ebanghelyo sa tibuok kalibotan. Kining pagpadayag nahitabo human sa Iyang Pagkabanhaw, sa paghatag ni Jesus sa Iyang kataposang mga panudlo ngadto sa mga Apostoles aron tumanon ang Iyang misyon sa kaluwasan. Angay natong makita niining milagroha ang atong kaugalingong tawag sa pagpakaylap sa Maayong Balita. Ug kinahanglan natong makita niining milagroha ang sugo sa pagpakaylap sa Maayong Balita diha lamang sa sugo ni Jesus, sa Iyang paagi, ug sa Iyang gitakdang panahon.
Usahay, ang mga Kristiyano adunay daghang “maayong” mga hunahuna kon unsaon pagpakaylap sa Ebanghelyo. Apan ang yawe mao ang pagpaubos sa atong kaugalingon atubangan sa Diyos ug ang pag-ila nga dili nato mapakaylap ang Maayong Balita sa Ebanghelyo gawas kon ang Ginoo mao ang manguna ug maghatag sa giya. Kini nagtudlo kanato nga angay kitang maghulat Kaniya ug motugot nga Siya mosulti. Kinahanglan kitang maminaw sa Iyang tingog ug motubag lamang kon Siya na ang mogiya. Ang pag-ebanghelyo usa ka tubag kang Jesus, dili usa ka butang nga atong ginabuhat pinaagi lamang sa atong kaugalingong paningkamot. Mao kini ang pangunang mensahe niining milagrosong hitabo.
Samtang nagpadayon kita sa atong pagsaulog sa Adlaw sa Pagkabanhaw, maayong higayon kini alang sa matag usa kanato nga mamalandong sa atong kaugalingong katungdanan sa pag-ebanghelyo. Kitang tanan gitawag sa pagpakigbahin niining buluhaton ni Jesus. Magkalainlain ang porma niini alang sa matag usa kanato sumala sa atong bokasyon ug misyon. Apan ang tinuod nga pangutana mao kini: “Nagtubag ba ako sa tawag ni Jesus sa pag-ebanghelyo sa paagi nga Iyang gigiya kanako?” Hinungdanon kini nga pangutana. Angay natong mahibaloan nga ang piho nga misyon nga gihatag ni Jesus kanato wala Niya itugyan kang bisan kinsa pa. Ug buot gayod Niya kitang gamiton.
Pamalandongi karon kining sugo nga gihatag sa atong Ginoo ngadto sa mga Apostoles ug paminawa Siya nga nagsulti kanimo sa mao gihapong sugo, nga nagtawag kanimo sa “pagpangisda sa mga kalag” sumala sa Iyang balaang kabubut-on. Tugoti ang Ginoo nga mosulti kanimo niining semanaha ug ablihi ang imong kaugalingon sa Iyang giya. Buot sa Diyos nga gamiton ka, busa siguroha nga imong tugotan Siya!
Lord, I do want to be used by You. I do want to evangelize in accord with Your will. Help me to confidently answer the call, and help me to sincerely listen to the direction You give. Use me, dear Lord, to save many souls for Your Kingdom. Jesus, I trust in You.
Dugang pa alang sa Pasko sa Pagkabanhaw
Ikawalong Adlaw: Nobena sa pagpangandam alang sa Domingo sa Balaang Kalooy
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
Daily Reflections on Divine Mercy:
365 Days with Saint Faustina
