Monday, August 10, 2020
Pista ni San Lorenzo, Diyakono ug Martir
Paminaw sa Iningles
Miingon si Jesus sa iyang mga tinun-an: “Sa pagkatinuod, sa pagkatinuod, sultihan ko kamo, kon ang usa ka lugas sa trigo dili mahulog sa yuta ug mamatay, magpabilin lamang kini nga usa ka lugas sa trigo; apan kon kini mamatay, mamunga kini og daghan.” Juan 12:24
Kini usa ka panultihon nga daling mahinumdoman, apan nagpadayag kini og kamatuoran nga lisod dawaton ug isabuhay. Diretsong gisulti ni Jesus ang panginahanglan nga mamatay ka sa imong kaugalingon aron ang imong kinabuhi mamunga og daghang maayong bunga. Sa makausa pa, sayon isulti, apan lisod isabuhay.
Nganong lisod man kini isabuhay? Unsay nakalisod niini? Ang kalisdanan nagsugod sa unang pagdawat sa kamatuoran nga ang pagkamatay sa imong kaugalingon gikinahanglan ug maayo. Busa atong tan-awon kon unsay kahulogan niini.
Magsugod kita sa pagtandi niini sa usa ka lugas sa trigo. Kinahanglang mobulag kana nga lugas gikan sa uhay ug mahulog sa yuta. Kini usa ka hulagway sa hingpit nga paglingkawas sa pagkahigot. Kanang usa ka lugas sa trigo kinahanglang “mobuhi” sa tanan. Kini nga hulagway nagsulti kanato nga kon gusto natong magbuhat ang Diyos og mga milagro dinhi kanato, kinahanglan nga andam ug kinabubut-on kitang mobuhi sa tanang butang nga atong gikahigotan. Nagpasabot kini nga tinuod natong itugyan ang atong kabubut-on, ang atong mga gusto, ang atong mga tinguha ug ang atong mga paglaom. Mahimong lisod kaayo kini buhaton tungod kay mahimong lisod kaayo kini sabton. Mahimong lisod sabton nga ang paglingkawas sa pagkahigot sa tanan natong gusto ug gitinguha maayo gayod diay ug mao gayod ang paagi aron maandam kita alang sa bag-o ug mas mahimayaong kinabuhi nga nagpaabot kanato pinaagi sa pagbag-o nga dala sa grasya. Ang pagkamatay sa atong kaugalingon nagpasabot nga mas mosalig kita sa Diyos kay sa mga butang nga atong gikahigotan niining kinabuhia. Nagpasabot kini nga nagtuo kitang ang plano sa Diyos labaw gayod sa bisan unsang plano nga atong mahunahuna.
Sa dihang ang lugas sa trigo mamatay ug malubong sa yuta, matuman niini ang iyang katuyoan ug motubo kini aron mahimong labaw pa kay sa kaniadto. Mausab kini ug mamunga sa madagayaon.
Si San Lorenzo, usa ka diyakono ug martir sa ikatulong siglo nga atong gihinumdom karong adlawa, naghatag kanato og literal nga hulagway sa usa ka tawo nga mibiya sa tanan, lakip ang iyang kaugalingong kinabuhi, aron moingon og “Oo” sa Diyos. Gibiyaan niya ang tanan niyang bahandi, ug sa dihang gimandoan siya sa prepekto sa Roma nga itugyan ang tanang bahandi sa Simbahan, gidala ni Lorenzo ngadto kaniya ang mga kabos ug mga masakiton. Tungod sa kasuko, gihukman sa prepekto si Lorenzo nga patyon pinaagi sa pagsunog. Gibiyaan ni Lorenzo ang tanan aron mosunod sa iyang Ginoo.
Pamalandongi karong adlawa kon unsa ang posibleng gipabuhian kanimo sa Diyos. Unsa man ang gusto Niyang imong itugyan? Ang pagtugyan mao ang yawe aron tugotan ang Diyos nga magbuhat og mahimayaong mga butang sa imong kinabuhi.
Lord, help me to let go of my own preferences and ideas in life that are not in accord with Your divine will. Help me to always believe that You have an infinitely better plan. As I embrace that plan, help me to trust that You will bring forth an abundance of good fruit. Jesus, I trust in You.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Saint of the Day – Saint Lawrence, Deacon and Martyr
Mga Kapilian sa mga Basahon sa Misa
Image: The Martyrdom of St Lawrence by Palma il Giovane
