Wednesday, October 28, 2020
Kapistahan ni San Simon ug San Judas, mga Apostoles
Paminaw sa Iningles
Mitungas si Jesus sa bukid aron mag-ampo, ug nagpalabay Siya sa tibuok gabii sa pag-ampo sa Dios. Lucas 6:12
Makapainteres gayod ang pagpamalandong kang Jesus nga nag-ampo sa tibuok gabii. Kining Iyang gibuhat nagtudlo kanato og daghang butang, sama usab sa mga gitudlo niini ngadto sa Iyang mga Apostoles. Ania ang pipila ka mga leksiyon nga atong makuha gikan sa Iyang gibuhat.
Una, mahimong maghunahuna kita nga si Jesus wala “kinahanglana” nga mag-ampo. Kay kon hunahunaon, Siya Dios man. Busa, kinahanglan ba Siyang mag-ampo? Sa pagkatinuod, dili kini ang hustong pangutana. Dili kini mahitungod sa Iyang panginahanglan sa pag-ampo; hinuon, nag-ampo Siya tungod kay ang Iyang pag-ampo naggikan sa kinauyokan sa kon kinsa Siya.
Ang pag-ampo, labaw sa tanan, usa ka buhat sa lawom nga pakighiusa sa Dios. Alang kang Jesus, kini usa ka buhat sa lawom nga pakighiusa sa Amahan sa Langit ug sa Espiritu Santo. Si Jesus kanunayng anaa sa hingpit nga pakighiusa (pagkausa) sa Amahan ug sa Espiritu, busa ang Iyang pag-ampo mao lamang ang yutan-ong pagpahayag niining pakighiusa. Ang Iyang pag-ampo mao ang pagsabuhay sa Iyang gugma alang sa Amahan ug sa Espiritu. Busa, dili kay kinahanglan Siyang mag-ampo aron magpabiling duol Kanila. Hinuon, nag-ampo Siya tungod kay hingpit Siyang nahiusa Kanila. Ug kining hingpit nga pakighiusa nagkinahanglan og yutan-ong pagpahayag pinaagi sa pag-ampo. Niining higayona, kini mao ang pag-ampo sa tibuok gabii.
Ikaduha, ang Iyang pag-ampo sa tibuok gabii nagpadayag nga ang “pagpahulay” ni Jesus walay lain kondili ang pagpabilin diha sa presensiya sa Amahan. Sama nga ang pagpahulay nagpaayo ug nagbag-o sa atong kusog, ang tibuok gabii nga pagbilar ni Jesus nagpadayag usab nga ang Iyang tawhanong pagpahulay mao ang pagpahulay diha sa presensiya sa Amahan.
Ikatulo, ang angay natong makat-onan gikan niini alang sa atong kaugalingong kinabuhi mao nga dili gayod nato angayng pakamenoson ang pag-ampo. Kasagaran kaayo, mosulti lamang kita sa Dios og pipila ka mga hunahuna sa pag-ampo ug kutob ra kita niana. Apan kon gipili ni Jesus nga igahin ang tibuok gabii sa pag-ampo, dili kita angayng mahibulong kon mas daghan pa ang gitinguha sa Dios gikan sa atong hilom nga panahon sa pag-ampo kay sa atong gihatag Kaniya karon. Ayaw kahibulong kon gitawag ka sa Dios sa paggahin og mas taas pang panahon matag adlaw sa pag-ampo. Ayaw pagpanuko sa pagtukod og usa ka regular nga batasan sa pag-ampo. Ug kon dili ka makatulog sa usa ka gabii, ayaw pagpanuko sa pagbangon, pagluhod, ug pagpangita sa presensiya sa Dios nga nagpuyo sulod sa imong kalag. Pangitaa Siya, paminawa Siya, pakig-uban Kaniya, ug tugoti Siya nga bug-os nga mosakop kanimo diha sa pag-ampo. Gihatagan kita ni Jesus sa hingpit nga panig-ingnan. Ato nang responsibilidad karon ang pagsunod niana nga panig-ingnan.
Samtang nagpasidungog kita sa mga Apostoles nga sila si Simon ug Judas, pamalandongi karong adlawa ang imong kaugalingong tawag sa pagsunod kang Cristo ug sa paglihok isip Iyang apostol ngadto sa kalibotan. Matuman lamang nimo kining misyon pinaagi sa kinabuhi sa pag-ampo. Pamalandongi ang imong kinabuhi sa pag-ampo ug ayaw pagpanuko sa pagpalig-on sa imong tinguha sa pagsundog sa kalawom ug kainit sa hingpit nga panig-ingnan sa pag-ampo sa atong Ginoo.
Lord Jesus, help me to pray. Help me to follow Your example of prayer and to seek the presence of the Father in a deep and continuous way. Help me to enter into a deep communion with You and to be consumed by the Holy Spirit. Jesus, I trust in You.
Prayers & Resources for the U.S. Elections
Dugang nga mga Pamalandong sa Ebanghelyo
Mga Pamalandong sa Diosnong Kalooy
Saint of the Day – Saint Simon and Saint Jude, Apostles
Mga Kapilian sa mga Basahon sa Misa
