Nobyembre 16, 2020
Lunes sa Ika-33 nga Semana sa Ordinaryong Panahon
Mga Pagbasa Karon
Santa Margarita sa Eskosya—Dili Obligadong Handumanan
Santa Gertrudis nga Bantogan, Birhen—Opsiyonal nga Handumanan

Paminaw sa Iningles
Misamot pa hinuon siya pagsinggit, “Anak ni David, kaloy-i ako!” Lucas 18:39c
Maayo gayod ang iyang gibuhat! Ania ang usa ka butang makililimos nga gidaogdaog sa daghan. Gitratar siya nga daw walay pulos ug usa ka makasasala. Sa dihang misugod siya pagsangpit kang Jesus aron mangayo og kalooy, gipahilom siya sa mga tawo sa iyang palibot. Apan unsa may gibuhat sa butang lalaki? Nagpadaog ba siya sa ilang pagdaugdaog ug pagbiaybiay? Wala gayod. Hinuon, “Misamot pa hinuon siya pagsinggit!” Ug namatikdan ni Jesus ang iyang pagtuo ug giayo siya.
Adunay dakong leksiyon alang kanatong tanan gikan sa kinabuhi niining tawhana. Daghan kitag masugatan sa kinabuhi nga makapaguol kanato, makapaluya sa atong kadasig, ug makatintal kanato sa pagkawala sa paglaom. Daghang butang nga makapabug-at kanato ug lisod natong atubangon. Busa unsa may angay natong buhaton? Magpadaog ba kita sa kalisdanan ug unya motago na lang diha sa pagkalumos sa kalooy sa kaugalingon?
Kining butang lalaki naghatag kanato og hingpit nga ehemplo sa angay natong buhaton. Kon mobati kitag pagdaugdaog, kaluya sa kadasig, kasagmuyo, nga wala kita masabti, o susamang mga pagbati, kinahanglan natong gamiton kini isip higayon sa pagdangop kang Jesus uban sa mas dakong kainit sa kasingkasing ug kaisog, nga nagsangpit alang sa Iyang kalooy.
Ang mga kalisdanan sa kinabuhi mahimong adunay usa sa duha ka epekto kanato. Mahimong makapaluya kini kanato o makapalig-on kanato. Makapalig-on kini kanato pinaagi sa pagpatubo sulod sa atong mga kalag og mas dakong pagsalig ug pagsandig sa kalooy sa Dios.
Pamalandongi karon kon unsa ang labing makatintal kanimo nga mawad-an ug kadasig. Unsa ang daw nagpabug-at kanimo ug lisod nimong atubangon? Himoon mong kahigayonan kana nga kalisdanan sa pagsangpit sa Diyos uban ang mas dakong kaikag ug kadasig, aron mangayo sa Iyang kaluoy ug grasya.
Ginoo, sa akong kahuyang ug pakigbisog, tabangi ako sa pagdangop Kanimo uban ang mas dakong kaikag. Tabangi ako nga mosalig pa gayod Kanimo sa mga panahon sa kasakit ug kapakyasan sa kinabuhi. Hinaot nga ang kadaotan ug kapintas niining kalibotana magpalig-on lamang sa akong determinasyon sa pagdangop Kanimo sa tanang butang. Hesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos sa Adlaw –Santa Margarita sa Eskosya Ug usab si Santa Gertrudis Magna, Birhen
Mga Kapilian sa mga Basahon sa Misa
Hulagway nga gipakita sa ibabaw: Matinud-anong kopya sa dibuho nga “Pag-ayo sa Buta” ni Carl Bloch




