Nobyembre 29, 2020
Unang Domingo sa Adbiyento (Tuig B)
Mga Basahon alang sa Karong Adlawa

Paminaw sa Iningles
“Ang akong gisulti kaninyo, gisulti ko sa tanan: ‘Pagbantay kamo!’” Marcos 13:37
Nagtutok ka ba kang Kristo? Importante kaayo kining pangutanaha, apan daghan ang tingali wala pa gani hingpit makasabot sa kahulogan niini. Sa unang tan-aw, tin-aw ra ang kahulogan: Ang pagkamabinantayon mao ang pag-ila nga ang atong Ginoo anaa sa imong kinabuhi ug sa kalibotan sa imong palibot. Busa, mabinantayon ka ba? Nagbantay ka ba? Naglantaw, nangita, naghulat, nagpaabot, ug nangandam ka ba sa pag-abot ni Kristo? Bisan tuod mianhi si Hesus sa yuta kapin sa 2,000 ka tuig na ang milabay isip usa ka gamayng bata, nagpadayon Siya sa pag-anhi kanato karon. Ug kon wala nimo mamatikdi matag adlaw ang Iyang lawom nga presensya, tingali medyo nahinanok ka na sa espirituhanong kinabuhi.
“Makatulog” kita sa espirituhanong bahin matag higayon nga ipunting nato ang mata sa atong kalag sa lumalabay, walay hinungdan, ug usahay makasasala pa ganing mga butang niining kalibotana. Kon mahitabo kana, dili na nato makita si Kristo mismo. Makapasubo nga nagkasayon kini nga mahitabo. Ang kapintasan, balatian, pagdumot, pagkabahinbahin, eskandalo, ug uban pang sama niini naghasol kanato adlaw-adlaw. Ang mga tigbalita naglumba matag adlaw sa paghatod kanato sa labing makapakurat ug makapaukyab nga mga balita. Matag adlaw, ang sosyal nga medya naningkamot sa pagpuno sa atong mubo nga panahon sa pagtagad og mga tipik sa sinultihan ug mga hulagway nga makatagbaw sa makadiyot lamang. Tungod niini, ang mata sa atong kalag—ang panan-aw sa atong pagtuo—mongitngit, mapasagdan, malimtan, ug isalikway. Busa morag daghan na sa atong kalibotan karon ang dili na makalusot sa nagkadakong kasaba ug kagubot aron makadungog sa malumo, tin-aw, ug lawom nga tingog sa Manluluwas sa Kalibotan.
Sa pagsugod nato sa panahon sa Adbiyento, ang atong Ginoo nakigsulti kanimo sa kinalawman sa imong kalag. Malumo Siyang nag-ingon, “Pagmata.” “Paminaw.” “Pagbantay.” Dili Siya mosinggit; mohunghong Siya, busa kinahanglan ihatag nimo Kaniya ang tibuok nimong pagtagad. Nakita ba nimo Siya? Nadungog ba nimo Siya? Namati ka ba Kaniya? Nasabtan ba nimo Siya? Nailhan ba nimo ang Iyang tingog? O ang daghang tingog sa imong palibot nagpalayo ba kanimo gikan sa mga kamatuoran nga lawom kaayo ug makabag-o sa imong kinabuhi, nga gusto Niyang ipahibalo kanimo?
Pamalandongi karong adlawa nga ang Dios nakigsulti diha sa kahiladman sa imong kalag sa matag adlaw. Nakigsulti Siya kanimo karon. Ug ang Iyang gisulti mao lamang ang tinuod nga mahinungdanon sa kinabuhi. Labaw sa bisan unsang laing panahon, ang Adbiyento maoy panahon sa pagbag-o sa imong pasalig sa pagpaminaw, pagkamabinantayon, ug pagtubag. Ayaw pagpabiling natulog. Pagmata ug paningkamoti gayod nga mamati sa lawom nga tingog sa atong Ginoo.
Umari Ka, Ginoong Hesus! Umari Ka! Hinaot nga kining Adbiyento mahimong panahon sa lawom nga pagbag-o sa akong kinabuhi, minahal kong Ginoo. Hinaot nga niining panahona maningkamot ako sa tibuok kong kasingkasing sa pagpangita sa Imong malumo ug lawom nga tingog. Hatagi ako sa grasya, minahal kong Ginoo, nga motalikod sa daghang kasaba sa kalibotan nga nag-ilog sa akong pagtagad ug modangop lamang Kanimo ug mamati sa tanan Mong gustong isulti. Umari Ka, Ginoong Hesus, ug sulod pa gayod sa kahiladman sa akong kinabuhi niining panahon sa Adbiyento. Hesus, misalig ako Kanimo.
Nobena sa Imakulada Concepcion
Nobyembre 29-Disyembre 7
Tan-awa ang among mga kapanguhaan alang sa Adbiyento!
Mga Pamalandong sa Balaang Kasulatan
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
Hulagway sa ibabaw: Gerd Altmann gikan sa Pixabay
Pangandam alang sa Adbiyento!
Mga Pamalandong sa Adbiyento ug Pasko
Libro nga humok og hapin & Elektronikong libro
Amazon.com – Google Play – iTunes – Barnes and Noble





