నవంబరు 29, 2020
ఆగమనకాల మొదటి ఆదివారం (సంవత్సరం B)
నేటి పఠనాలు

ఆంగ్లంలో వినండి
“నేను మీతో చెప్పేది అందరితోనూ చెబుతున్నాను: ‘జాగరూకులై ఉండండి!’” మార్కు 13:37
మీరు క్రీస్తు పట్ల శ్రద్ధగా ఉన్నారా? ఇది ఎంతో ప్రాముఖ్యమైన ప్రశ్న అయినప్పటికీ, దీని అర్థం కూడా పూర్తిగా గ్రహించనివారు చాలామంది ఉండవచ్చు. అవును, పైకి చూస్తే దీని అర్థం స్పష్టమే: “శ్రద్ధగా ఉండటం” అంటే మీ జీవితంలోనూ, మీ చుట్టూ ఉన్న ప్రపంచంలోనూ మన ప్రభువు సాన్నిధ్యాన్ని గుర్తెరిగి ఉండటం. మరి మీరు శ్రద్ధగా ఉన్నారా? జాగరూకులై ఉన్నారా? క్రీస్తు రాక కోసం చూస్తూ, ఆయనను వెదుకుతూ, వేచిచూస్తూ, ఎదురుచూస్తూ, సిద్ధపడుతున్నారా? యేసు 2,000 సంవత్సరాలకు పూర్వమే చిన్న శిశువుగా భూమిపైకి వచ్చినప్పటికీ, నేడు కూడా ఆయన మన వద్దకు వస్తూనే ఉన్నారు. ఆయన గాఢమైన సాన్నిధ్యాన్ని మీరు ప్రతిరోజూ గుర్తెరిగి ఉండకపోతే, ఆధ్యాత్మికంగా చెప్పాలంటే, మీరు ఇప్పటికే కొంతవరకు నిద్రలో ఉండవచ్చు.
ఈ లోకంలోని గతించిపోయే, ప్రాముఖ్యతలేని, పాపభరితమైన విషయాల వైపు కూడా మన అంతరంగ నేత్రాలను తిప్పిన ప్రతిసారీ, మనం ఆధ్యాత్మికంగా “నిద్రలోకి జారుకుంటాం.” అలా జరిగినప్పుడు, మనం క్రీస్తునే చూడలేకపోతాం. విచారకరంగా, ఇలా జరగడం రానురానూ మరింత సులభమవుతోంది. హింస, అనారోగ్యం, ద్వేషం, విభేదాలు, అపకీర్తికర ఘటనలు, ఇలాంటివి ప్రతిరోజూ మనల్ని పీడిస్తున్నాయి. సాధ్యమైనంత దిగ్భ్రాంతికరమైన, సంచలనాత్మకమైన వార్తలను మనకు అందించడానికి వార్తామాధ్యమాలు రోజూ పోటీపడుతున్నాయి. మనం శ్రద్ధ నిలపగల కొద్దిపాటి సమయాన్ని, క్షణకాలం మాత్రమే సంతృప్తినిచ్చే చిన్నచిన్న మాటల భాగాలతోనూ చిత్రాలతోనూ నింపడానికి సామాజిక మాధ్యమాలు ప్రతిరోజూ ప్రయత్నిస్తున్నాయి. ఫలితంగా, మన ఆత్మ నేత్రాలు, అంటే విశ్వాసంతో చూసే మన అంతరంగ దృష్టి, మసకబారిపోతోంది; నిర్లక్ష్యానికి గురవుతోంది, మరుగున పడుతోంది, పక్కన పెట్టబడుతోంది. అందువల్ల, నేడు మన ప్రపంచంలోని అనేకమంది, పెరుగుతున్న గందరగోళపు ధ్వనులను దాటుకుని లోక రక్షకుని మృదువైన, స్పష్టమైన, గంభీరమైన స్వరాన్ని గ్రహించలేకపోతున్నట్లు కనిపిస్తున్నారు.
మనం ఆగమనకాలాన్ని ప్రారంభిస్తున్న ఈ వేళ, మన ప్రభువు మీ ఆత్మలోని అత్యంత లోతైన అంతరాళాల్లో మీతో మాట్లాడుతున్నారు. ఆయన మృదువుగా, “మేలుకోండి.” “ఆలకించండి.” “జాగరూకులై ఉండండి” అని చెబుతున్నారు. ఆయన బిగ్గరగా అరవరు; మెల్లని స్వరంతో మాట్లాడతారు. అందువల్ల మీరు మీ శ్రద్ధనంతటినీ ఆయనపై నిలపాలి. మీరు ఆయనను చూస్తున్నారా? ఆయన స్వరం వింటున్నారా? ఆయన మాట ఆలకిస్తున్నారా? ఆయనను అర్థం చేసుకుంటున్నారా? ఆయన స్వరాన్ని మీరు గుర్తెరుగుదురా? లేక మీ చుట్టూ ఉన్న అనేక స్వరాలు, ఆయన మీకు తెలియజేయాలనుకుంటున్న లోతైన, గంభీరమైన, మిమ్మల్ని రూపాంతరం చేసే సత్యాల నుండి మిమ్మల్ని దూరం చేస్తున్నాయా?
దేవుడు ప్రతిరోజూ మీ ఆత్మ లోతుల్లో మాట్లాడుతున్నారనే విషయాన్ని నేడు ధ్యానించండి. ఆయన ఇప్పుడు మీతో మాట్లాడుతున్నారు. జీవితంలో నిజంగా ముఖ్యమైనది ఆయన చెప్పేదే. ఆలకించడానికి, శ్రద్ధగా ఉండటానికి, స్పందించడానికి మీ నిబద్ధతను పునరుద్ధరించుకోవడానికి ఆగమనకాలం మరే కాలంకన్నా విశేషమైన సమయం. నిద్రలోనే ఉండిపోకండి. మేలుకోండి; మన ప్రభువు గంభీరమైన స్వరాన్ని శ్రద్ధతో, పట్టుదలతో ఆలకించండి.
రా, ప్రభువైన యేసూ! రా! ప్రియ ప్రభువా, ఈ ఆగమనకాలం నా జీవితంలో లోతైన పునరుద్ధరణకు సమయం కావాలి. నీ మృదువైన, గంభీరమైన స్వరాన్ని వెదకడానికి నా హృదయమంతటితో కృషిచేసే సమయం కావాలి. ప్రియ ప్రభువా, నా శ్రద్ధను ఆకర్షించడానికి పోటీపడే ఈ లోకపు అనేక ధ్వనుల నుండి మరలి, కేవలం నీవైపు, నీవు చెప్పాలనుకునే ప్రతిమాట వైపు తిరిగే కృపను నాకు దయచేయి. రా, ప్రభువైన యేసూ, ఈ ఆగమనకాలంలో నా జీవితంలోకి మరింత లోతుగా రా. యేసూ, నేను నీపై నమ్మకం ఉంచుతున్నాను.
మరియమ్మ జన్మపాపరహిత గర్భధారణకు నవదిన ప్రార్థన
నవంబర్ 29-డిసెంబర్ 7
పైన ప్రదర్శించిన చిత్రం: పిక్సాబే నుండి గెర్డ్ ఆల్ట్మన్ చిత్రం
ఆగమనకాలానికి సిద్ధపడండి!
ఆగమనకాలం మరియు క్రిస్మస్ ధ్యానాలు
పేపర్బ్యాక్ & ఈ-పుస్తకం
Amazon.com – గూగుల్ ప్లే – ఐట్యూన్స్ – బార్న్స్ అండ్ నోబుల్





