June 1, 2021
Tuesday of the Ninth Week in Ordinary Time
Readings for Today
San Justino nga Martir—Handumanan
Paminaw sa Iningles
“Uyon ba sa balaod ang pagbayad sa buhis sa sensus ngadto kang Cesar o dili? Mobayad ba kami o dili?” Kay nasayod Siya sa ilang pagkasalingkapaw, miingon Siya kanila, “Nganong gisulayan man ninyo Ako? Dad-i Ako ug usa ka denaryo aron Akong tan-awon.” Marcos 12:14–15
Kining mga Pariseo ug mga Herodiano gipadala aron lit-agon si Jesus pinaagi sa Iyang mga pulong. Kini nga mga tawo hilabihan ka mahunahunaon sa politika ug mahilig mopili ug dapigan ug mangitag sayop sa uban. Nagpakamatarong sila sa ilang kaugalingon ug diyutay ra kaayo ang ilang pagtagad sa kaluwasan sa mga kalag. Busa miduol sila kang Jesus uban sa usa ka pangutana nga daw walay daotang tuyo. Morag nagdahom sila nga ipahayag ni Jesus ang Iyang pagsupak sa pagbayad sa buhis sa sensus ngadto kang Cesar, ug kon buhaton Niya kana, andam silang mosumbong Kaniya ngadto sa mga awtoridad sa gobyerno. Wala sila magtagad sa kamatuoran; ang ilang bugtong tuyo mao ang paglit-ag sa atong balaang Ginoo. Sa dihang gidala nila ngadto kang Jesus ang Romanhong sensilyo nga may larawan ni Cesar, gisulti ni Jesus kining lawom ug maalamong mga pulong, “Ihatag kang Cesar ang iya kang Cesar ug sa Diyos ang iya sa Diyos.”
Tin-aw nga kon kining salingkapaw nga mga pangulo sa relihiyon miduol pa kang Jesus uban sa pagpaubos ug pagkasinsero, lahi unta kaayo ang Iyang tubag kanila. Apan tungod kay miduol sila aron lamang lit-agon, tuison ang mga pulong, ug laglagon ang atong Ginoo, gibutang sila ni Jesus sa ilang hustong dapit pinaagi sa usa ka buhat sa diosnong kaalam. Wala Niya ipahayag ang pagsuporta sa pagbayad sa buhis sa sensus, ni misupak Siya niini. Busa, kining bahin sa Ebanghelyo natapos sa mga pulong: “Natingala sila pag-ayo Kaniya.” Ang “pagkatingala” mao ang hustong tubag. Busa, sa usa ka paagi, makakat-on kita gikan niining salingkapaw nga mga pangulo sa relihiyon. Sa matag higayon nga atong masugatan ang lawom nga kaalam sa Diyos, angay kitang mobati ug kahingangha ug balaang pagkatingala.
Siyempre, natingala sila tungod kay napakyas ni Jesus ang ilang daotang lit-ag. Apan bisan pa niana, makakat-on kita gikan niini nga ang kaalam sa Diyos dili gayod malabwan. Ang kaalam sa Diyos mopahilom sa kabuangan niining panahona ug mopadayag sa tinagong malisya luyo nianang kadaotan.
Nakasugat ka na ba sa pagkamalimbongon sa sekular nga mga “kahibalo-sa-tanan” sa atong panahon? Aduna na bay mihagit kanimo, direktang miatake sa imong pagtuo, o mikuwestiyon sa imong moral nga mga baroganan? Lagmit, kon gipili nimo ang pagpuyo sa imong pagtuo sa dayag ug uban sa pagsalig, nasinati na nimo ang pag-atake sa uban. Alang niadtong kulang sa lawom nga pagtuo ug sa tin-aw nga gasa sa diosnong kaalam, ang maong pagkamalimbongon mahimong hinungdan sa kalibog ug kabalaka. Mahimong dili ka mahibalo unsaon pagtubag ug mobati nga nalit-agan ka sa sayop nga “kaalam” niining panahona. Nianang kahimtanga, unsa man ang imong buhaton? Ang bugtong tubag sa bakak nga mga doktrina ug mga paglimbong nga masugatan natong tanan niining kalibotang nagkaanam ka sekular ug ateyista mao ang tubag nga nagagikan sa diosnong kaalam. Sa atong kaugalingon lamang, walay usa kanato nga adunay igong kaalam aron masuklan kining mga sayop. Busa, ang atong bugtong kadangpan mao ang padayon nga pagdangop sa kaalam sa Diyos.
Modangop kita sa kaalam sa Diyos pinaagi sa pag-ampo ug pagtuon sa balaang mga butang. Ang atong pag-ampo moabli sa atong mga hunahuna ngadto sa tin-aw nga tingog sa Diyos nga nagsulti sa putli nga kamatuoran. Ug ang pagtuon sa balaang mga butang, ilabina sa Balaang Kasulatan, sa mga pagtulon-an sa Simbahan ug sa kinabuhi sa mga santos, makatabang aron mas tin-aw natong mailhan ang tingog sa Diyos ug mapapas ang kalibog nga gipaningkamotan sa kalibotan nga ipahamtang kanato. Sa kataposan, kon dili nato ituslob ang atong mga hunahuna sa tinuod nga kaalam sa Diyos, dili kita maandam alang sa atong masugatan sa kalibotan.
Pamalandongi karon ang imong panginahanglan nga mapuno sa diosnong kaalam aron masagubang ang pagkamalimbongon ug kabuangan sa kalibotan. Ilha nga sa imong kaugalingon lamang, kulang ang imong kaalam aron makalingkawas sa kalibog sa kinabuhi. Pag-ampo alang sa gasa sa kaalam ug tugoti ang atong Ginoo nga itugyan kini kanimo.
Ginoo sa tanang Kamatuoran, ang Imong kaalam labaw pa sa tanang kaalam sa kalibotan, ug Imong gibabagan ang mga limbong sa Daotan. Ablihi ang akong hunahuna, hinigugmang Ginoo, ngadto sa Imong balaang Kamatuoran aron makahimo akong moatubang sa mga hagit sa kinabuhi. Hatagi ako sa Imong kaalam, hinigugmang Ginoo, aron makasunod ako Kanimo bisan asa Ka mangulo. Hesus, ako misalig Kanimo.
Novena to the Sacred Heart
Novena dates: June 2-10, 2021
June 11, 2021: Solemnity of the Sacred Heart
Dugang nga mga Pamalandong sa Ebanghelyo
Mga Pamalandong sa Diosnong Kalooy
Saint of the Day – Saint Justin Martyr
Mga Kapilian sa mga Basahon sa Misa
Featured image above: The Tribute Money By Leopold Layer, via Wikimedia Commons
