June 8, 2021
Tuesday of the Tenth Week in Ordinary Time
Readings for Today
Paminaw sa Iningles
Miingon si Jesus sa iyang mga tinun-an: “Kamo ang asin sa yuta. Apan kon ang asin mawad-an sa iyang kaparat, unsaon man kini pagpaasin pag-usab? Wala na kiniy laing kapuslanan gawas nga ilabay ug tunob-tunoban. Kamo ang kahayag sa kalibotan…” Matthew 5:13–14
Ang matag Kristiyano adunay duha ka nag-unang katungdanan sa kinabuhi. Una, kinahanglan kitang maningkamot alang sa kaugalingong pagkabalaan. Ug ikaduha, kinahanglan kitang molihok aron matabangan ang uban nga makab-ot ang samang ang-ang sa pagkabalaan. Mao kini ang kahulogan sa pagkahimong “asin sa yuta” ug “kahayag sa kalibotan.”
Hunahunaa ang asin. Ang asin makatabang sa pagpreserbar sa pagkaon aron dili kini madaot, ug kini usab makadugang sa lami niini. Mahimo kini sa asin pinaagi sa pagsagol ngadto sa pagkaon ug, sa usa ka pagsabot, sa pagkahanaw niini. Ingon usab niini ang angay mahitabo kanato. Una, ang atong Ginoo kinahanglan mosulod sa atong kinabuhi ug manalipod kanato gikan sa pagkadaot tungod sa sala. Apan samtang Iya kining gibuhat, Iya usab nga ipadayag ang atong pagkamaayo sa paagi nga ang “lami” sa pagkabalaan mamatikdan sa uban. Niining paagiha, gamiton kita ingon nga asin alang sa uban. Mahitabo kini ilabina pinaagi sa atong mga buhat sa gugma.
Si Santa Teresa sa Lisieux miingon sa iyang awtobiyograpiya, “Nasabtan ko karon nga ang tinuod nga gugma naglangkob sa pagpailob sa mga sayop sa mga tawo sa atong palibot, nga dili gayod mahibulong sa ilang mga kahuyang, kondili madasig sa bisan labing gamay nga timailhan sa ilang hiyas.” Nagtuo siya nga mao kini ilabina ang paagi sa atong pagkahimong asin ug kahayag alang sa uban. Makatabang kita sa pagpanalipod sa uban gikan sa sala pinaagi sa pagpakita og kaluoy kanila sa dihang sila huyang. Atong gipadato ang ilang kinabuhi pinaagi sa pagtan-aw sa ilang pagkamaayo ug pagmaya niini. Ug ato kining gibuhat sa tagong paagi. Pinaagi sa atong kalumo ug pagkamabination, sa atong kaayo ug kaluoy, atong gipanalipdan ang uban ug gitabangan sila nga motubo diha sa madagayaong grasya sa Diyos. Ug sa makadaghang higayon, ato kining mabuhat nga wala gani sila makamatikod kon giunsa kita paggamit sa Diyos.
Hunahunaa usab ang kahayag. Ang kalibotan nga atong gipuy-an kanunayng mangitngit ug puno sa kawalay paglaom. Adunay pagkadaot sa atong palibot ug daghan kaayong mga tentasyon. Busa, ang kahayag ni Kristo kinahanglan ipadayag sa tanang dapit. Ang mga tawo sa atong palibot kinahanglan makakita og tin-aw sa dalan padulong sa pagkabalaan ug kalipay. Sa makausa pa, mahimo kini kon maningkamot una kita nga mahimong kahayag mismo. Si Kristo, ang tinuod nga Kahayag sa Kalibotan, kinahanglan motuhop pag-ayo sa atong kinabuhi aron ang pagsidlak nga masanagon taliwala sa kalibotang nahulog sa sala mahimong halos kinaiyanhon na lamang alang kanato. Kon si Kristo buhi diha kanato, mosidlak gikan kanato ang kalipay ug kalinaw, ang kalinaw sa kasingkasing ug lig-ong pagtuo, ang moral nga kaayo ug determinasyon. Ug kon magkinabuhi kita niining paagiha, dili na kinahanglan nga atong “ipugos” ang Ebanghelyo sa uban; hinuon, ang kahayag sa Diyos mosidlak lamang ug mahimong suga sa paglaom alang sa mga tawo nga moduol kanato.
Pamalandongi karong adlawa kining duha ka misyon sa kinabuhi. Una, palandonga ang imong tawag ngadto sa pagkabalaan. Sa unsang paagi gusto sa Diyos nga dad-on ang kahayag ngadto sa imong kaugalingong kinabuhi, panalipdan ka gikan sa tanang sala ug dugangan kini og espirituhanong lami alang sa balaang pagkinabuhi? Ikaduha, kinsa ang gusto sa Diyos nga imong higugmaon pinaagi sa Iyang gugma? Kinsa ang nagkinahanglan og paglaom ug kalipay, kaluoy ug kaayo, mga pulong sa kaalam ug pagdasig? Pagbalaan ug dayon tugoti nga kanang pagkabalaan mosidlak ngadto sa uban, ug sa pagkatinuod mahimo kang asin sa yuta ug kahayag sa kalibotan.
Akong Jesus, ang tinuod nga Kahayag sa Kalibotan, palihog sidlaki ang akong kinabuhi aron tin-aw kong makita ang tanan ug mapanalipdan ako gikan sa kangitngit sa sala. Samtang gipuno Mo ako sa Imong kahayag, palihog gamita ako isip instrumento sa Imong gugma ug kalooy alang sa kalibotan nga puno sa kagubot ug kalibog. Paphaa ang kangitngit, hinigugmang Ginoo, ug gamita ako isip Imong instrumento sumala sa Imong kabubut-on. Jesus, misalig ako Kanimo.
Novena to the Sacred Heart
Novena dates: June 2-10, 2021
June 11, 2021: Solemnity of the Sacred Heart
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos/Kasaulogan Karong Adlawa
Mga Kapilian sa mga Basahon sa Misa
