വ്യാഴാഴ്ച, ജൂൺ 29, 2023
അപ്പസ്തോലന്മാരായ വിശുദ്ധ പത്രോസിന്റെയും വിശുദ്ധ പൗലോസിന്റെയും മഹോത്സവം
“അതിനാൽ ഞാൻ നിന്നോടു പറയുന്നു: നീ പത്രോസാണ്; ഈ പാറമേൽ ഞാൻ എന്റെ സഭ സ്ഥാപിക്കും. പാതാളത്തിന്റെ കവാടങ്ങൾ അതിനെതിരെ പ്രബലപ്പെടുകയില്ല. സ്വർഗരാജ്യത്തിന്റെ താക്കോലുകൾ ഞാൻ നിനക്കു നൽകും. നീ ഭൂമിയിൽ കെട്ടുന്നതെല്ലാം സ്വർഗത്തിലും കെട്ടപ്പെട്ടിരിക്കും; നീ ഭൂമിയിൽ അഴിക്കുന്നതെല്ലാം സ്വർഗത്തിലും അഴിക്കപ്പെട്ടിരിക്കും.” മത്തായി 16:17–19
വിശുദ്ധ പത്രോസും വിശുദ്ധ പൗലോസും പലപ്പോഴും “സഭയുടെ മഹത്തായ തൂണുകളിൽ” രണ്ടുപേരായി വിശേഷിപ്പിക്കപ്പെടുന്നു. ആദിമസഭയുടെ സ്ഥാപനത്തിൽ ഇരുവരും അത്യന്തം നിർണായകമായ പങ്കുവഹിച്ചു. ഇരുവരുടെയും പങ്ക് അനിവാര്യവും അടിസ്ഥാനപരവുമായിരുന്നെങ്കിലും, വ്യക്തികൾ എന്ന നിലയിൽ അവർ പരസ്പരം വ്യത്യസ്തരായിരുന്നതുപോലെതന്നെ അവരുടെ ദൗത്യങ്ങളും വ്യത്യസ്തമായിരുന്നു.
പത്രോസ് കുടുംബസ്ഥനും നാട്ടിലെ ഒരു മത്സ്യത്തൊഴിലാളിയുമായിരുന്നു; വിദ്യാഭ്യാസമില്ലാത്ത, തികച്ചും സാധാരണക്കാരനായ ഒരാൾ. യേശു വിളിക്കുന്നതിനുമുമ്പുള്ള അദ്ദേഹത്തിന്റെ ജീവിതത്തെക്കുറിച്ച് നമുക്കറിയാവുന്ന കാര്യങ്ങളിൽ, ദൈവപുത്രൻ സ്ഥാപിക്കാനിരുന്ന പുതിയ സഭയുടെ തൂണുകളിലൊന്നാകാൻ അദ്ദേഹത്തെ സവിശേഷമായി യോഗ്യനാക്കുന്ന ഒന്നും ഉണ്ടായിരുന്നില്ല. യേശു അദ്ദേഹത്തെ വിളിച്ചു; അദ്ദേഹം ആ വിളിക്കു പ്രത്യുത്തരം നൽകി. യേശു പത്രോസിന്റെ വള്ളത്തിൽ കയറി, വലകൾ ഇറക്കാൻ അദ്ദേഹത്തോടു കല്പിച്ചു; അങ്ങനെ ധാരാളം മത്സ്യം ലഭിക്കാൻ ഇടയാക്കി. ഈ അത്ഭുതം കണ്ടപ്പോൾ പത്രോസ് യേശുവിന്റെ പാദങ്ങളിൽ വീണ്, അവിടുത്തെ സന്നിധിയിൽ ആയിരിക്കാൻ യോഗ്യനല്ലാത്ത “പാപിയായ മനുഷ്യൻ” ആണ് താനെന്ന് ഏറ്റുപറഞ്ഞു (ലൂക്കാ 5:8 കാണുക). എന്നാൽ ഇനി മുതൽ അദ്ദേഹം മനുഷ്യരെ പിടിക്കുന്നവനാകുമെന്ന് യേശു പത്രോസിനെ അറിയിച്ചു. പത്രോസ് ഉടൻതന്നെ എല്ലാം ഉപേക്ഷിച്ച് യേശുവിനെ അനുഗമിച്ചു.
പൗലോസ് തന്നെത്തന്നെ ഇങ്ങനെ വിവരിക്കുന്നു: “ഞാൻ കിലിക്യയിലെ താർസോസിൽ ജനിച്ച ഒരു യഹൂദനാണ്. എന്നാൽ ഈ നഗരത്തിൽ ഗമാലിയേലിന്റെ പാദത്തിങ്കൽ വളർന്ന്, നമ്മുടെ പിതാക്കന്മാരുടെ നിയമത്തിന്റെ കർശനമായ രീതിയനുസരിച്ച് വിദ്യാഭ്യാസം നേടി. ഇന്ന് നിങ്ങളെല്ലാവരും ആയിരിക്കുന്നതുപോലെ ഞാനും ദൈവത്തിനുവേണ്ടി തീക്ഷ്ണതയുള്ളവനായിരുന്നു” (അപ്പസ്തോലപ്രവർത്തനങ്ങൾ 22:3). യഹൂദനിയമത്തിന്റെ ഏറ്റവും കർശനമായ വ്യാഖ്യാനത്തിൽ പൗലോസ് നല്ല വിദ്യാഭ്യാസം നേടിയിരുന്നു; തത്ത്വചിന്തയിൽ അറിവുണ്ടായിരുന്ന അദ്ദേഹം യുവാവായിരിക്കുമ്പോൾ വളരെ തീക്ഷ്ണതയുള്ളവനുമായിരുന്നു. ക്രിസ്തുമതത്തിലേക്കു പരിവർത്തനം ചെയ്യുന്നതിനുമുമ്പ് അദ്ദേഹം “ദൈവത്തിന്റെ സഭയെ ക്രൂരമായി പീഡിപ്പിക്കുകയും അതിനെ നശിപ്പിക്കാൻ ശ്രമിക്കുകയും ചെയ്തു” (ഗലാത്തിയർ 1:13) എന്നതും ഓർക്കുക. തുടക്കത്തിൽ സഭയെ അത്ര ശക്തമായി എതിർത്തിരുന്നതിനാൽ, സഭയുടെ ഒരു തൂണാകാൻ തിരഞ്ഞെടുക്കപ്പെടാൻ ഒട്ടും സാധ്യതയില്ലാത്ത ഒരാളായി പലവിധത്തിലും പൗലോസ് കണക്കാക്കപ്പെടുമായിരുന്നു. ആദ്യത്തെ ക്രൈസ്തവ രക്തസാക്ഷിയായ വിശുദ്ധ സ്തേഫാനോസിനെ വധിക്കുന്നതിനെപ്പോലും അദ്ദേഹം പിന്തുണച്ചു.
ക്രൈസ്തവസഭയുടെ സ്ഥാപകരാകാൻ തീരെ സാധ്യതയില്ലാത്തവരായി പലരും ഇവരിൽ ഓരോരുത്തരെയും കരുതിയിരിക്കാമെങ്കിലും, അവർ ആയിത്തീർന്നത് കൃത്യമായും അതുതന്നെയായിരുന്നു. മാനസാന്തരത്തിനുശേഷം പൗലോസ് സുവിശേഷം പ്രസംഗിക്കാനായി ദൂരദേശങ്ങളിലേക്കു യാത്രചെയ്തു; ഏഷ്യാമൈനറിലും യൂറോപ്പിലുമുടനീളം നിരവധി പുതിയ സഭാസമൂഹങ്ങൾ സ്ഥാപിച്ചു. ഒടുവിൽ അദ്ദേഹം ജറുസലെമിൽവെച്ച് അറസ്റ്റിലാവുകയും വിചാരണയ്ക്കായി റോമിലേക്കു കൊണ്ടുപോകപ്പെടുകയും ശിരച്ഛേദം ചെയ്യപ്പെടുകയും ചെയ്തു. പുതിയനിയമത്തിലെ പകുതിയിലധികം ഗ്രന്ഥങ്ങളുടെ കർത്താവായി പൗലോസ് കണക്കാക്കപ്പെടുന്നു; അപ്പോസ്തലന്മാരുടെ നടപടികളുടെ പകുതിയോളം അദ്ദേഹത്തിന്റെ പ്രേഷിതയാത്രകൾ വിശദമായി വിവരിക്കുന്നു. യഹൂദരല്ലാത്ത വിജാതീയരുടെ ഇടയിലെ പ്രേഷിതപ്രവർത്തനത്തിന്റെ പേരിലാണ് പൗലോസ് വിശേഷാൽ അറിയപ്പെടുന്നത്.
പത്രോസിന്റെ ദൗത്യം യഥാർഥത്തിൽ അതുല്യമായിരുന്നു. അദ്ദേഹത്തിന്റെ പേര് യേശു “ശിമയോൻ” എന്നതിൽനിന്ന് “പത്രോസ്” എന്നു മാറ്റി. യേശു പറഞ്ഞത് ഓർക്കുക: “ഞാൻ നിന്നോടു പറയുന്നു, നീ പത്രോസാണ് (Petros); ഈ പാറമേൽ (petra) ഞാൻ എന്റെ സഭ സ്ഥാപിക്കും…(മത്തായി 16:18). “പത്രോസ്” എന്നതിന്റെ ഗ്രീക്കുരൂപമാണ് Petros; ചലിപ്പിക്കാവുന്ന ഒറ്റക്കല്ല് എന്നാണ് അതിന്റെ അർഥം. എന്നാൽ petra എന്ന ഗ്രീക്കുപദം സൂചിപ്പിക്കുന്നത് ഉറച്ചുനിൽക്കുന്നതും അചഞ്ചലവും നിലനിൽക്കുന്നതുമായ ഒരു ശിലാരൂപത്തെയാണ്. അതിനാൽ, ഈ ഒറ്റക്കല്ലായ പത്രോസിനെ, സഭ പണിതുയർത്തപ്പെടേണ്ട അചഞ്ചലമായ പാറയുടെ ഉറച്ച അടിത്തറയാക്കി മാറ്റാൻ യേശു തിരഞ്ഞെടുത്തു.
സഭയിൽ മറ്റാർക്കും ഏല്പിക്കപ്പെട്ടിട്ടില്ലാത്ത ഒരു സവിശേഷ ദൗത്യത്തിലേക്ക് നമ്മുടെ കർത്താവ് നിങ്ങളെയും വിളിച്ചിരിക്കുന്നു. വിശുദ്ധ പൗലോസിലൂടെ ചെയ്തതുപോലെ, നിങ്ങളുടേതായ രീതിയിൽ ചില മനുഷ്യരിലേക്ക് സുവിശേഷം എത്തിക്കാൻ നിങ്ങളെ ഉപയോഗിക്കാൻ ദൈവം ആഗ്രഹിക്കുന്നു. വിശുദ്ധ പത്രോസിന്റെ കാര്യത്തിലെന്നപോലെ, നിങ്ങളുടെയും നിങ്ങളുടെ വിശ്വാസത്തിന്റെയും മേൽ തന്റെ സഭയെ സ്ഥാപിക്കുന്ന പ്രവൃത്തി തുടരാനും ദൈവം ആഗ്രഹിക്കുന്നു.
നമ്മുടെ സഭയുടെ വിശുദ്ധരും അതുല്യരുമായ ഈ രണ്ടു തൂണുകളെക്കുറിച്ച് ഇന്ന് ധ്യാനിക്കുക. അങ്ങനെ ചെയ്യുമ്പോൾ, ഈ ലോകത്തിൽ അവരുടെ ദൗത്യം തുടരാൻ നിങ്ങളെ എങ്ങനെ ഉപയോഗിക്കാനായിരിക്കും ദൈവം ആഗ്രഹിക്കുന്നതെന്ന് ചിന്തിക്കുക. വിശുദ്ധ പത്രോസും വിശുദ്ധ പൗലോസും നമ്മുടെ ലോകത്തിലെ ഏറ്റവും മഹാന്മാരും ഏറ്റവും സ്വാധീനം ചെലുത്തിയവരുമായ ക്രൈസ്തവരിൽ ഉൾപ്പെടുന്നുവെങ്കിലും, അവരുടെ ദൗത്യം തുടരണം; അതിനായി ഉപയോഗിക്കാൻ ദൈവം ആഗ്രഹിക്കുന്ന ഉപകരണങ്ങളിൽ നിങ്ങളും ഉൾപ്പെടുന്നു. ഈ ദൗത്യത്തിനായി നിങ്ങളെത്തന്നെ സമർപ്പിക്കുക. അങ്ങനെ, സുവിശേഷപ്രഘോഷണവും നമ്മുടെ സഭയുടെ ശിലാസ്ഥാപനവും പണ്ടെന്നപോലെ നമ്മുടെ കാലത്തും ശക്തമായി നിലനിൽക്കട്ടെ.
വിശുദ്ധ പത്രോസേ, സഭ സ്ഥാപിക്കപ്പെട്ട വിശ്വാസത്തിന്റെ ഉറച്ച ശിലാസ്ഥാപനമാകാൻ അങ്ങ് സവിശേഷമായി തിരഞ്ഞെടുക്കപ്പെട്ടു. വിശുദ്ധ പൗലോസേ, വിശ്വാസികളുടെ അനേകം പുതിയ സമൂഹങ്ങൾ സ്ഥാപിച്ചുകൊണ്ട് ഈ വിശ്വാസം ദൂരദേശങ്ങളിൽ പ്രഘോഷിക്കാൻ അങ്ങ് പുറപ്പെട്ടു. പ്രിയ കർത്താവേ, അങ്ങയുടെ സഭയുടെ ദൗത്യം തുടരാൻ എന്നെ ഉപയോഗിക്കണമേ. അങ്ങനെ ലോകമെങ്ങുമുള്ള അങ്ങയുടെ ജനത്തിന്റെ മനസ്സുകളിലും ഹൃദയങ്ങളിലും വിശ്വാസം ഉറച്ചു വേരൂന്നട്ടെ. ഈശോയേ, ഞാൻ അങ്ങയിൽ ശരണപ്പെടുന്നു.
ദൈവകരുണയെക്കുറിച്ചുള്ള വിചിന്തനങ്ങൾ
ഇന്നത്തെ വിശുദ്ധർ – വിശുദ്ധ പത്രോസും വിശുദ്ധ പൗലോസും
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
