Pagtagbo kang Kristo sa Kamingawan

Disyembre 17, 2023
Ikatulong Domingo sa Adbiyento (Tuig B)
Mga Pagbasa Karong Adlawa

Paminaw sa Iningles

“Ako mao ang tingog sa usa nga nagsinggit sa kamingawan, ‘Tul-ira ang dalan sa Ginoo,’” sumala sa giingon ni propeta Isaias.” John 1:23

Sa teksto sa ibabaw, gikutlo ni San Juan Bautista ang Isaiah 40:3: “Usa ka tingog ang nagmantala: Sa kamingawan andama ang dalan sa GINOO! Sa dapit nga awaaw, tul-ira ang halapad nga dalan alang sa atong Dios!” Kini usa ka panagna ni Isaias mahitungod sa pagbalik sa mga Judiong destiyero gikan sa Babilonia ngadto sa Jerusalem. Kasagaran, ang mga tawo moagi sa mga ruta nga dunay daghang tinubdan sa tubig gikan sa Mesopotamia ngadto sa Israel. Mas luwas kadtong mga ruta kay sa desyerto ug makahatag sa gikinahanglang pagkaon ug tubig alang sa panaw. Apan gitagna ni Isaias nga ang mga Judiong destiyero moagi sa labing mubong ruta—diretso latas sa desyerto—ug nga ang Dios motagana sa ilang mga panginahanglan nianang panawa. Ang maong panaw nagkinahanglan og dakong pagsalig sa pag-atiman sa Dios.

Sa pagkutlo ni Juan Bautista kang Isaias, iyang gipadapat kini nga panagna sa iyang kaugalingon. Gitawag siya sa pagsinggit sa kamingawan ug sa pagtudlo sa mga tawo sa direktang dalan ngadto sa Mesiyas. Sa kamingawan nila makaplagan ang ilang Manluluwas.

Una sa tanan, si Juan nagsinggit sa “kamingawan.” Ang iyang mensahe alang niadtong nakasinati og pagkauga, grabeng kakabos, kakulang ug pagkawala sa kinabuhi tungod sa sala. Ang iyang mensahe sa paghinulsol una sa tanan alang niadtong walay espirituhanong pagkaon nga buot ihatag sa Dios kanila pinaagi sa grasya. Ang mensahe ni Juan gitumong niadtong mapainubsanong nakakita sa lisod nga kahimtang nga ilang giatubang sa kinabuhi ug miila sa ilang panginahanglan sa Tubig nga Buhi sa Manluluwas sa Kalibotan.

Ikaduha, kining bag-ong “tul-id” nga dalan nagpasabot nga daghan ang wala maglakaw sa direktang dalan ngadto kang Kristo. Hinuon, naglikoliko sila sa kinabuhi nga wala kinahanglana. Ang mensahe ni Juan nagtawag sa tanan ngadto sa tul-id ug direktang dalan sa paghinulsol sa ilang mga sala aron makab-ot nila ang pagtuo kang Kristo Jesus.

Ikatulo, ang paglakaw latas sa desyerto aron makaplagan si Kristo nagkinahanglan og pagsalig sa pag-atiman sa Dios. Nagkinahanglan og kaisog ang paghimo sa maong panaw. Ang pagsalig sa padayong pag-atiman sa Dios, nga nagsaad sa pagtagana sa tanan natong panginahanglan, maoy yawe. Dili molakaw ang usa ka tawo diretso latas sa desyerto kon wala siya mosalig sa iyang giya.

Ang Adbiyento usa ka panahon sa pagsusi pag-usab sa dalan nga imong gisubay. Naningkamot ka ba sa pagpangita sa imong kaugalingong dalan ngadto sa kalipay? Nagsalig ka ba sa imong kaugalingong mga abilidad, sa imong kaugalingong salabutan ug sa imong kaugalingong plano alang sa umaabot? Kon mao, paminawa ang “tingog sa usa nga nagsinggit sa kamingawan.” Paminawa si San Juan nga nakigsulti kanimo, nga nagtawag kanimo ngadto sa kayano sa kamingawan, sa mas dakong kagawasan gikan sa pagkahigot sa tanang butang, sa pagbiya sa tanang dili gikan sa Dios, ug sa mas kinabubut-ong pagsalig sa pag-atiman sa Dios aron Siya mogiya kanimo.

Pamalandongi karong adlawa kining tawag gikan sa kamingawan ug paminawa ang mensahe nga personal nga gisulti sa Dios kanimo. Biyai ang tanang kalibotanong kabalaka, paghinulsol sa sala, salig Kaniya ug lakaw aron sa pagtagbo Kaniya aron mas dali ug mas sayon kang makab-ot ang mas lawom nga pagtuo sa atong Ginoo niining panahon sa Adbiyento.

Akong mahigugmaong Ginoo, anaa Ka, naghulat kanako sa kangitngit ug pagkauga sa akong sala. Naghulat Ka kanako aron mangulo ug mogiya kanako latas sa daghang hagit nga akong giatubang sa kinabuhi. Palihog hatagi ako sa kaisog ug kaalam nga akong gikinahanglan aron mosalig Kanimo sa igo nga paagi nga makasunod ako Kanimo bisan asa Ka mogiya. Jesus, nagsalig ako Kanimo.

Bag-o alang sa 2024!
Usa ka maanindot nga regalo sa Pasko…