വരുവിൻ, നിങ്ങൾ കാണും

2024 ജനുവരി 4, വ്യാഴാഴ്ച

അവർ അവനോടു ചോദിച്ചു: “റബ്ബീ” (പരിഭാഷപ്പെടുത്തുമ്പോൾ ഗുരു എന്നർഥം), “അങ്ങ് എവിടെയാണ് താമസിക്കുന്നത്?” അവൻ അവരോടു പറഞ്ഞു: “വരുവിൻ, നിങ്ങൾ കാണും.” അങ്ങനെ അവർ പോയി അവൻ താമസിക്കുന്ന സ്ഥലം കണ്ടു; അന്ന് അവർ അവനോടൊപ്പം താമസിച്ചു. യോഹന്നാൻ 1:38–39

എത്ര കൗതുകകരമായ ഒരു സംഭാഷണം! യേശുവാണ് “ദൈവത്തിന്റെ കുഞ്ഞാട്” എന്നു സ്നാപകയോഹന്നാൻ പറയുന്നതു കേട്ട അദ്ദേഹത്തിന്റെ രണ്ടു ശിഷ്യന്മാരിൽ ഒരാളായിരുന്നു അന്ത്രയോസ്. അതിന്റെ ഫലമായി, അന്ത്രയോസും മറ്റേ ശിഷ്യനും സ്നാപകനെ വിട്ട് യേശുവിന്റെ പിന്നാലെ നടക്കാൻ തുടങ്ങി. അവർ യേശുവിനെ അനുഗമിക്കാൻ തുടങ്ങിയപ്പോൾ, അവൻ അവരുടെ നേരെ തിരിഞ്ഞ് അവർ എന്താണ് അന്വേഷിക്കുന്നതെന്നു ചോദിച്ചു. അവരുടെ മറുപടിയും അതിനെത്തുടർന്നുള്ള യേശുവിന്റെ ക്ഷണവുമാണ് മുകളിൽ രേഖപ്പെടുത്തിയിരിക്കുന്നത്.

യേശുവിന്റെ ക്ഷണം സവിശേഷമായിരുന്നു: “വരുവിൻ, നിങ്ങൾ കാണും.” ആ ക്ഷണം സ്വീകരിച്ച് ഈ രണ്ടു ശിഷ്യന്മാരും പോയി അന്ന് യേശുവിനോടൊപ്പം താമസിച്ചു. എന്നാൽ അതു മാത്രമല്ല സംഭവിച്ചത്. യേശുവിനോടൊപ്പം ആ ദിവസം ചെലവഴിച്ചതിലൂടെ, യേശു ആരാണെന്ന വിശ്വാസത്തിലേക്ക് ഈ രണ്ടു ശിഷ്യന്മാരും എത്തിച്ചേർന്നുവെന്ന് തുടർന്നുള്ള ഭാഗത്തുനിന്ന് വ്യക്തമാണ്. പിന്നീട് ആ ഭാഗത്ത്, അന്ത്രയോസ് തന്റെ സഹോദരനായ പത്രോസിന്റെ അടുക്കൽ ചെന്ന്, “ഞങ്ങൾ മിശിഹായെ കണ്ടെത്തിയിരിക്കുന്നു” എന്നു പറയുന്നു. യേശുവിനോടൊപ്പം ചെലവഴിച്ച ആ ദിവസത്തിലെ എന്താണ് അവൻ ആരാണെന്ന് അവർക്ക് ബോധ്യം നൽകിയത്?

യേശുവിനോടൊപ്പമുള്ള അവരുടെ താമസത്തിന്റെ വിശദാംശങ്ങൾ സുവിശേഷത്തിൽ ഉൾപ്പെടുത്തിയിട്ടില്ലെങ്കിലും, യേശുവിന്റെ സാന്നിധ്യത്തിൽ ആയിരിക്കുക എന്നതു മാത്രമാണ് ഈ ശിഷ്യന്മാർക്ക് ആവശ്യമായിരുന്നതെന്ന് വ്യക്തമായി തോന്നുന്നു. യേശുവിന്റെ ക്ഷണത്തിലെ രണ്ടു ഭാഗങ്ങൾ വീണ്ടും പരിഗണിക്കുക: “വരുവിൻ…” തുടർന്ന്, “നിങ്ങൾ കാണും.”

നമ്മുടെ കർത്താവ് നമ്മിൽ ഓരോരുത്തരോടും സംസാരിക്കുമ്പോൾ, അവന്റെ ക്ഷണവും ഏറെ സമാനമാണ്. ആദ്യം, തന്നോടൊപ്പം വരാൻ അവൻ നമ്മെ ക്ഷണിക്കും. യേശു താമസിക്കുന്ന ഇടത്തേക്കാണ് നാം വരേണ്ടത്. അത് എവിടെയാണ്? നമ്മെ സംബന്ധിച്ചിടത്തോളം അത് ഒരു ഭൗതികസ്ഥലം തന്നെയാകണമെന്നില്ല; മറിച്ച്, ഒന്നാമതും പ്രധാനമായും അത് പ്രാർഥനയുടെ ഇടമാണ്. വ്യക്തിപരമായ പ്രാർഥനയുടെ ആന്തരിക യാത്രയിലൂടെ തന്റെ അടുക്കലേക്കു വരാൻ യേശു നമ്മെ ക്ഷണിക്കുന്നതു നാം കേൾക്കണം. അവിടെ, നമ്മുടെ ആത്മാവിന്റെ ആഴങ്ങളിലാണ് നാം നമ്മുടെ കർത്താവിനോടൊപ്പം വിശ്രമിക്കുക. അവന്റെ ദൈവിക സാന്നിധ്യത്തിൽ വെറുതെ ആയിരിക്കാൻ അവൻ നമ്മെ ക്ഷണിക്കുന്നു.

നാം അവന്റെ അടുക്കൽ വന്ന്, അവന്റെ സാന്നിധ്യത്തിൽ അവനോടൊപ്പം വിശ്രമിക്കുമ്പോൾ, മറ്റൊന്നുകൂടി സംഭവിക്കും: “നിങ്ങൾ കാണും.” നാം അവനെ കാണുകയും അവനെ അറിയുകയും അവനാൽ പ്രബുദ്ധരാകുകയും അവനിൽ വിശ്വസിക്കുകയും ചെയ്യും. ആദ്യം, അവൻ അരുളിച്ചെയ്യുന്ന വചനത്തിലൂടെയാണ് ഇതു സംഭവിക്കുന്നത്. ആത്യന്തികമായി, പ്രാർഥനയിൽ മാത്രം നമുക്കു സ്വീകരിക്കാൻ കഴിയുന്ന ഒരു ആന്തരിക വെളിപ്പെടുത്തലിലൂടെയാണ് ഇതു സംഭവിക്കുന്നത്.

ഈ ശിഷ്യന്മാർക്ക് നമ്മുടെ കർത്താവ് നൽകിയ ഈ സൗമ്യമായ ക്ഷണത്തെക്കുറിച്ച് ഇന്ന് വിചിന്തനം ചെയ്യുക. ഈ വാക്കുകളെക്കുറിച്ച് ധ്യാനിക്കുമ്പോൾ, അവ നിങ്ങളോടും പറയുന്നതായി കേൾക്കുക. ആദ്യം, “വരുവിൻ” എന്ന വാക്കിനെക്കുറിച്ചു മാത്രം വിചിന്തനം ചെയ്യാൻ സമയം ചെലവഴിക്കുക. അത് നിങ്ങളുടെ ആത്മാവിലേക്ക് ആഴ്ന്നിറങ്ങാൻ അനുവദിക്കുക. അത് നിങ്ങളെ ആഴത്തിൽ വ്യക്തിപരമായി സ്പർശിക്കാൻ അനുവദിക്കുക. യേശുവിൽനിന്നുള്ള യഥാർഥവും സ്നേഹപൂർണവുമായ ഒരു ക്ഷണമാണതെന്ന് അറിയുക. അതിനുശേഷം, “നിങ്ങൾ കാണും” എന്ന വാക്കുകളെക്കുറിച്ച് ധ്യാനിക്കാൻ സമയം ചെലവഴിക്കാൻ ശ്രമിക്കുക. നിങ്ങൾ എന്തു കാണണമെന്നാണ് ദൈവം ആഗ്രഹിക്കുന്നത്? വിശ്വാസസംബന്ധമായ ഏതു വ്യക്തിപരമായ വെളിപ്പെടുത്തലാണ് ദൈവം നിങ്ങൾക്കു നൽകാൻ ആഗ്രഹിക്കുന്നത്? “വരുവിൻ, നിങ്ങൾ കാണും.” നമ്മുടെ കർത്താവിന്റെ ഈ ആദ്യശിഷ്യന്മാരുടെ ജീവിതങ്ങളെ മാറ്റിയതുപോലെ, നിങ്ങളുടെ ജീവിതത്തെയും മാറ്റാൻ ഈ വാക്കുകളെ അനുവദിക്കുക.

കർത്താവേ, അങ്ങയുടെ അടുക്കൽ വരാനും അങ്ങയോടൊപ്പം ആയിരിക്കാനും അങ്ങയുടെ ദൈവിക സാന്നിധ്യത്തിൽ അങ്ങയോടൊപ്പം ഇരിക്കാനും അങ്ങ് എന്നെ നിരന്തരം ക്ഷണിക്കുന്നു. അങ്ങയുടെ സ്നേഹത്തിന്റെ ഈ സൗമ്യമായ ക്ഷണം കേൾക്കാൻ എന്നെ സഹായിക്കണമേ. ഞാൻ അതു കേൾക്കുമ്പോൾ, അങ്ങയെ കൂടുതൽ പൂർണമായി കാണാനും അറിയാനും സ്നേഹിക്കാനും എന്റെ ആത്മാവിന്റെ കണ്ണുകൾ തുറക്കണമേ. അങ്ങയെ കാണുമ്പോൾ, അങ്ങ് എവിടേക്കു നയിച്ചാലും അങ്ങയെ അനുഗമിക്കാനുള്ള കൃപയും ശക്തിയും എനിക്കു നൽകണമേ. ഈശോയേ, ഞാൻ അങ്ങയിൽ ശരണപ്പെടുന്നു.

2024-ലേക്ക് പുതിയത്!