2019 ഫെബ്രുവരി 27, ബുധനാഴ്ച
ആണ്ടുവട്ടത്തിലെ ഏഴാം വാരത്തിലെ ബുധനാഴ്ച
യോഹന്നാൻ യേശുവിനോടു പറഞ്ഞു: “ഗുരുവേ, അങ്ങയുടെ നാമത്തിൽ ഒരാൾ പിശാചുക്കളെ പുറത്താക്കുന്നതു ഞങ്ങൾ കണ്ടു. അയാൾ ഞങ്ങളെ അനുഗമിക്കാത്തതിനാൽ ഞങ്ങൾ അയാളെ തടയാൻ ശ്രമിച്ചു.” യേശു മറുപടി പറഞ്ഞു: “അയാളെ തടയരുത്. എന്റെ നാമത്തിൽ അത്ഭുതപ്രവൃത്തി ചെയ്യുന്ന ആർക്കും അതേ സമയം എന്നെക്കുറിച്ച് ദോഷം പറയാൻ കഴിയുകയില്ല.” മർക്കോസ് 9:38-39
അസൂയയെക്കുറിച്ച്, അഥവാ “തങ്ങൾക്കു മാത്രമുള്ള അവകാശമാണെന്ന മനോഭാവം” എന്നു വിളിക്കാവുന്ന ഒന്നിനെക്കുറിച്ച്, ഈ വചനഭാഗം നമുക്കൊരു പാഠം നൽകുന്നു. തങ്ങൾക്കു പരിചയമില്ലാത്ത ഒരാൾ യേശുവിന്റെ നാമത്തിൽ പിശാചിനെ പുറത്താക്കുന്ന മഹത്തായ സൽപ്രവൃത്തി ചെയ്യുന്നത് യോഹന്നാനും മറ്റു അപ്പസ്തോലന്മാരും കാണുന്നു. മനസ്സിൽ കാണുമ്പോൾ അൽപം വിചിത്രമായി തോന്നുന്ന ഒരു രംഗമാണിത്. യോഹന്നാൻ ഈ സൽപ്രവൃത്തി കാണുകയും അതു നിർത്താൻ ആ വ്യക്തിയോട് ആവശ്യപ്പെട്ടുകൊണ്ട് ഇടപെടാൻ ശ്രമിക്കുകയും ചെയ്യുന്നു. തുടർന്ന്, യേശു ഇടപെടുമെന്ന പ്രതീക്ഷയോടെ അദ്ദേഹം ചെന്ന് ആ മനുഷ്യനെക്കുറിച്ച് യേശുവിനോടു പരാതിപ്പെടുന്നു. എന്നാൽ യേശു ചെയ്യുന്നത് നേരെ മറിച്ചാണ്.
ചില കാര്യങ്ങളിൽ, സ്വന്തം സഹോദരനെക്കുറിച്ച് കുറ്റം പറഞ്ഞുകൊടുക്കുന്ന ഒരു കുട്ടിയുടെ പെരുമാറ്റത്തോട് ഈ സംഭവത്തിന് സാമ്യമുണ്ട്. മാതാപിതാക്കൾ അനുവദിച്ച ഒരു കാര്യം സഹോദരങ്ങളിൽ ഒരാൾ ചെയ്യുന്നുവെന്നും മറ്റൊരാൾക്ക് അതിൽ അസൂയ തോന്നുന്നുവെന്നും കരുതുക. അതിന്റെ ഫലമായി, അസൂയ തോന്നിയ കുട്ടി നിസ്സാരമായ ഒരു കാരണം പറഞ്ഞ് മറ്റേ കുട്ടിയെക്കുറിച്ച് കുറ്റം പറഞ്ഞുകൊടുക്കുന്നു.
“ഞങ്ങൾക്കു മാത്രമെന്ന മനോഭാവം” എന്നതിനെ, ഞാൻ ചെയ്യുമ്പോൾ മാത്രമേ ഒരു കാര്യം നല്ലതാകൂ എന്നു ചിന്തിക്കുന്ന പ്രവണതയായി നിർവചിക്കാം. മറ്റൊരാളുടെ സൽപ്രവൃത്തികളിൽ ആനന്ദിക്കാനും അവയെ പിന്തുണയ്ക്കാനും നമുക്കു പ്രയാസം തോന്നുന്ന ഒരുതരം ആത്മീയ അത്യാഗ്രഹമാണിത്. അപകടകരമാണെങ്കിലും, അനേകരുടെ ജീവിതത്തിൽ വളരെ സാധാരണമായി കാണുന്ന ഒരു പോരാട്ടമാണിത്.
നമ്മുടെ ക്രൈസ്തവജീവിതത്തിൽ, എല്ലായിടത്തും എല്ലാവരിലും ദൈവത്തിന്റെ പ്രവൃത്തികൾ കണ്ടെത്താൻ ശ്രമിക്കുന്നതാണ് ഉത്തമം. ദൈവരാജ്യം പടുത്തുയർത്തപ്പെടണമെന്ന ആഗ്രഹം നമ്മിൽ അത്ര ആഴമുള്ളതായിരിക്കണം; അത്തരം പ്രവർത്തനങ്ങൾ കാണുമ്പോഴെല്ലാം നാം അതിയായി ആനന്ദിക്കണം. മറിച്ച്, മറ്റൊരാൾ ചെയ്യുന്ന നന്മയെപ്രതി നമുക്ക് അസൂയ തോന്നുകയോ, അവർ ചെയ്യുന്ന കാര്യങ്ങളിൽ കുറ്റം കണ്ടെത്താൻ നാം ശ്രമിക്കുകയോ ചെയ്യുന്നുവെങ്കിൽ, ഈ പ്രവണത നാം തിരിച്ചറിയണം. അത് അവരുടെ പാപമല്ല, നമ്മുടെ പാപമാണെന്ന് ഏറ്റുപറയുകയും വേണം.
മറ്റുള്ളവരുടെ നന്മയോടുള്ള നിങ്ങളുടെ പ്രതികരണത്തെക്കുറിച്ച് ഇന്ന് വിചിന്തനം ചെയ്യുക. ആ നന്മയിൽ ആനന്ദിക്കാൻ നിങ്ങൾക്കു കഴിയുന്നുണ്ടോ? അതോ അത് നിങ്ങളിൽ ഏതെങ്കിലും തരത്തിലുള്ള അസൂയയോ മാത്സര്യമോ ഉളവാക്കുന്നുണ്ടോ? രണ്ടാമത്തേതാണ് സംഭവിക്കുന്നതെങ്കിൽ, ഈ പ്രലോഭനങ്ങളിൽനിന്ന് മോചനം നേടാൻ ദൃഢനിശ്ചയം ചെയ്യുക. തന്റെ സൽപ്രവൃത്തികളിൽ നിങ്ങൾ പങ്കുചേരണമെന്ന് നമ്മുടെ ദിവ്യനാഥൻ ആഗ്രഹിക്കുന്നു. അതേ ആഗ്രഹം നിങ്ങളിലും വളർത്തിയെടുക്കാൻ നിങ്ങൾ പരിശ്രമിക്കണം.
കർത്താവേ, എനിക്ക് മറ്റുള്ളവരോട് അസൂയ തോന്നുമ്പോൾ, പ്രത്യേകിച്ച് അവരുടെ സൽപ്രവൃത്തികളെക്കുറിച്ച് അസൂയ തോന്നുമ്പോൾ, ഇത് എന്റെ പാപമാണെന്നു തിരിച്ചറിയാൻ എന്നെ സഹായിക്കണമേ. പകരം, അങ്ങ് നമ്മുടെ ലോകത്തിൽ പ്രവർത്തിക്കുന്ന അത്ഭുതകരമായ അനേകം വഴികൾ കണ്ടെത്താൻ എന്നെ സഹായിക്കണമേ; മറ്റുള്ളവരിലൂടെ അങ്ങ് ചെയ്യുന്ന എല്ലാ കാര്യങ്ങളിലും ആനന്ദിക്കാൻ എന്നെ സഹായിക്കണമേ. യേശുവേ, ഞാൻ അങ്ങയിൽ ശരണപ്പെടുന്നു.
ദൈവകരുണയെക്കുറിച്ചുള്ള വിചിന്തനങ്ങൾ
