ഓഗസ്റ്റ് 20, 2023
ആണ്ടുവട്ടത്തിലെ ഇരുപതാം ഞായർ (വർഷം A)
ഇന്നത്തെ വായനകൾ
അക്കാലത്ത്, യേശു ടയിർ, സീദോൻ പ്രദേശങ്ങളിലേക്കു പിൻവാങ്ങി. അപ്പോൾ ആ ദേശത്തുനിന്നുള്ള ഒരു കാനാൻകാരി വന്ന് ഇങ്ങനെ വിളിച്ചപേക്ഷിച്ചു: “കർത്താവേ, ദാവീദിന്റെ പുത്രാ, എന്നോടു കരുണ തോന്നണമേ! എന്റെ മകളെ ഒരു പിശാച് കഠിനമായി പീഡിപ്പിക്കുന്നു.” മത്തായി 15:21–22
ഫരിസേയർ യേശുവിനെ രൂക്ഷമായി വെല്ലുവിളിച്ചതിനുശേഷം, അവിടുന്നും ശിഷ്യന്മാരും വടക്കുപടിഞ്ഞാറു ദിശയിൽ 35 മൈൽ യാത്രചെയ്ത് വിജാതീയരുടെ അധീനതയിലുള്ള ഒരു പ്രദേശത്തെത്തി. അത് ഹേറോദേസിന്റെയും യഹൂദനേതാക്കന്മാരുടെയും അധികാരപരിധിക്കു പുറത്തായിരുന്നു. അവിടുത്തേക്കും ശിഷ്യന്മാർക്കും അത് ഒരു വിശ്രമവേളയും, ശിഷ്യന്മാരെ കൂടുതൽ നേരിട്ട് പരിശീലിപ്പിക്കാൻ യേശുവിന് ഒരവസരവും ആയിരുന്നിരിക്കാം. ഇങ്ങനെ മാറിത്താമസിച്ചിരുന്ന സമയത്താണ് ഒരു വിജാതീയസ്ത്രീ യേശുവിനോടു സഹായം അപേക്ഷിക്കാൻ വന്നത്.
സംഭവം മുന്നോട്ടു പോകുമ്പോൾ, അവളുടെ പ്രാർഥന നമുക്കെല്ലാവർക്കും ഒരു മാതൃകയാണെന്നു നാം കാണുന്നു. ഒന്നാമതായി, യേശു ആരാണെന്ന്—ദാവീദിന്റെ പുത്രനാണെന്ന്—അവൾ ഏറ്റുപറയുന്നു. ഇത് അവളുടെ വിശ്വാസത്തിന്റെ പ്രകടനമാണ്; ഗലീലിയിലെ അനേകരിൽ യേശു കണ്ട വിശ്വാസമില്ലായ്മയിൽനിന്ന് തികച്ചും വ്യത്യസ്തവുമാണ്. രണ്ടാമതായി, അവളുടെ അപേക്ഷ നേരിട്ടുള്ളതും ലളിതവുമായ ഭാഷയിലാണ്: “എന്നോടു കരുണ തോന്നണമേ!” എന്നും “കർത്താവേ, എന്നെ സഹായിക്കണമേ” എന്നും. മൂന്നാമതായി, അവളുടെ പ്രാർഥന സ്ഥിരോത്സാഹത്തോടെയുള്ളതാണ്. ആദ്യം അവളുടെ അപേക്ഷയ്ക്കു മറുപടി നൽകാതെ മൗനം പാലിച്ചും, പിന്നീട് “മക്കളുടെ ഭക്ഷണമെടുത്ത് നായ്ക്കൾക്ക് എറിഞ്ഞുകൊടുക്കുന്നതു ശരിയല്ല” എന്ന് അവളോടു പറഞ്ഞും, അവളുടെ സ്ഥിരോത്സാഹം പ്രകടിപ്പിക്കാൻ യേശു അവസരം നൽകുന്നു. പരുഷമായി പെരുമാറാനല്ല, മറിച്ച് സ്ഥിരോത്സാഹത്തോടെ തന്റെ വിശ്വാസം പ്രകടിപ്പിക്കാൻ അവളെ ക്ഷണിക്കാനാണ് യേശു ഇങ്ങനെ പറയുന്നതെന്ന് വ്യക്തമാണ്. അവൾ അതുതന്നെ ചെയ്യുന്നു. അവസാനമായി, അവളുടെ പ്രാർഥന ആഴമായ എളിമ നിറഞ്ഞതാണ്. അവൾ മറുപടി പറയുന്നു: “കർത്താവേ, ദയവുണ്ടാകണമേ; നായ്ക്കളും തങ്ങളുടെ യജമാനന്മാരുടെ മേശയിൽനിന്നു വീഴുന്ന നുറുക്കുകൾ തിന്നുന്നുണ്ടല്ലോ.” യേശുവിന്റെ കരുണയുടെ “നുറുക്കുകൾക്കായി” അവൾ യാചിക്കുകയായിരുന്നു; അവിടുത്തെ കരുണ അവൾക്കു സമൃദ്ധമായി ലഭിക്കുകയും ചെയ്തു.
ഒരു നായ തന്റെ യജമാനന്റെ മേശയിൽനിന്നുള്ള നുറുക്കുകൾ ആഗ്രഹിക്കുന്നതുപോലെ, യേശുവിന്റെ കരുണയുടെ നുറുക്കുകൾ നിങ്ങൾ ആഗ്രഹിക്കുന്നുണ്ടോ? അങ്ങനെയായിരിക്കട്ടെ. പ്രാർഥനയിൽ നമുക്കെല്ലാവർക്കും ഉണ്ടായിരിക്കേണ്ട മനോഭാവം ഇതാണ്. ചിലപ്പോൾ, അഹങ്കാരം നിമിത്തം, ദൈവത്തിന്റെ കരുണയ്ക്ക് നമുക്ക് അവകാശമുണ്ടെന്നു നാം കരുതിയേക്കാം. ദൈവം നമുക്കു കടപ്പെട്ടിരിക്കുന്നുവെന്നു നാം വിചാരിച്ചേക്കാം. കരുണ നമുക്ക് അർഹതപ്പെട്ടതല്ലെന്നു നാം തിരിച്ചറിഞ്ഞാലും, ആ സത്യം നമ്മുടെ ഉള്ളിൽ ആഴത്തിൽ പതിയാൻ നാം അനുവദിക്കണം. അതുകൊണ്ടാണ് ഈ സംഭവം ഇത്ര പ്രധാനമായിരിക്കുന്നത്. പ്രാർഥിക്കേണ്ട മാതൃകാപരമായ രീതിയും ദൈവത്തെ സമീപിക്കുമ്പോൾ നമുക്കുണ്ടായിരിക്കേണ്ട എളിമയുള്ള ആന്തരിക മനോഭാവവും ഇതു നമ്മുടെ മുമ്പിൽ അവതരിപ്പിക്കുന്നു.
മേശയിൽനിന്നുള്ള നുറുക്കുകൾക്കായി യാചിക്കുന്ന ഒരു നായയുടെ ചിത്രം മനസ്സിൽ കണ്ടുകൊണ്ട് പ്രാർഥനാപൂർവം അൽപനേരം ചെലവഴിക്കുക. ബാക്കിവന്നത് ഒരു നായയ്ക്കു കൊടുക്കുമ്പോൾ അത് അത്യന്തം ആഹ്ലാദിക്കുന്നു. മറ്റൊരാളുടെ പാത്രത്തിലെ നുറുക്കുകൾ തിന്നുന്നത് നമുക്ക് അഭിലഷണീയമല്ല. എന്നാൽ ആ “പാത്രം” ലോകരക്ഷകന്റേതും ആ “ഭക്ഷണം” അവിടുത്തെ കൃപയും കരുണയുമാണെങ്കിൽ, എല്ലാം മാറിമറിയുന്നു. ഒടുവിൽ, യജമാനൻ നമ്മെയും മേശയിലേക്കു ക്ഷണിക്കുകയും ഏറ്റവും ശ്രേഷ്ഠമായ ആത്മീയാഹാരം നൽകി പോഷിപ്പിക്കുകയും ചെയ്യുന്നു. എങ്കിലും, ഈ എളിയ സ്ത്രീ മാതൃകയാക്കി കാണിച്ച എളിമയുള്ള മനോഭാവം എപ്പോഴും നമുക്കുണ്ടായിരിക്കണം എന്ന വസ്തുതയ്ക്ക് അതുകൊണ്ടു മാറ്റമുണ്ടാകുന്നില്ല.
ഈ വിശുദ്ധയായ സ്ത്രീയെക്കുറിച്ച് ഇന്ന് ധ്യാനിക്കുക. ഒടുവിൽ യേശു ഉദ്‌ഘോഷിച്ചു: “സ്ത്രീയേ, നിന്റെ വിശ്വാസം വലുതാണ്!” എന്നാൽ എളിമയോടും സ്ഥിരോത്സാഹത്തോടുംകൂടെ അവൾ തന്റെ വിശ്വാസം പൂർണഹൃദയത്തോടെ പ്രകടിപ്പിച്ചതിനുശേഷം മാത്രമാണ് അതു സംഭവിച്ചത്. അവളെ ഉജ്ജ്വലമായ മാതൃകയായി സ്വീകരിച്ചുകൊണ്ട്, നിങ്ങൾ ദൈവത്തോടു പ്രാർഥിക്കുന്ന രീതി വിചിന്തനം ചെയ്യുക. ദൈവത്തിന്റെ കരുണ നിങ്ങൾക്ക് അർഹതപ്പെട്ടതാണെന്ന മട്ടിൽ, സ്വയം നീതിമാനെന്ന ഭാവത്തോടെയാണോ നിങ്ങൾ പ്രാർഥിക്കുന്നത്? ദൈവത്തെ നിങ്ങൾക്ക് എന്തോ കടപ്പെട്ടിരിക്കുന്ന ഒരാളായി കാണുന്ന പ്രവണത നിങ്ങൾക്കുണ്ടോ? നിങ്ങളുടെ ആവശ്യങ്ങൾക്ക് അവിടുന്ന് ഉടൻ ഉത്തരം നൽകാതിരിക്കുമ്പോൾ നിങ്ങൾ ദൈവത്തോടു കോപിക്കുന്നുണ്ടോ? ഈ സ്ത്രീയെപ്പോലെ സ്വയം എളിമപ്പെടുത്താൻ ശ്രമിക്കുക. ദൈവം നിങ്ങൾക്കു നൽകാൻ ആഗ്രഹിക്കുന്നതെന്തും യാചിക്കുക. സ്ഥിരോത്സാഹത്തോടും പരിപൂർണ വിശ്വാസത്തോടുംകൂടെ അങ്ങനെ ചെയ്യുക. അങ്ങനെ ചെയ്താൽ, നമ്മുടെ കർത്താവ് തന്റെ കരുണയുടെ നുറുക്കുകൾ ചൊരിയുക മാത്രമല്ല, നിങ്ങളെ എടുത്തുയർത്തി തന്റെ സമൃദ്ധമായ കൃപയുടെ മഹിമയാർന്ന വിരുന്നിലേക്കു ക്ഷണിക്കുകയും ചെയ്യും.
പരമകാരുണികനായ യേശുവേ, അങ്ങയുടെ കരുണയുടെ മേശയിൽനിന്നുള്ള നുറുക്കുകൾ മാത്രം എനിക്കു നൽകണമേ എന്നു ഞാൻ യാചിക്കുന്നു. പൂർണഹൃദയത്തോടെ ഞാൻ അങ്ങയോട് ഇതു യാചിക്കുന്നു. അങ്ങയെ സ്വീകരിക്കാൻ എനിക്ക് അർഹതയില്ലെങ്കിലും, ഞാൻ അങ്ങയെ തേടുന്നു. പ്രിയ കർത്താവേ, എനിക്ക് എന്താണ് ആവശ്യമെന്ന് അങ്ങ് അറിയുന്നുവല്ലോ; ആ ആവശ്യങ്ങളിൽ ദയവായി അങ്ങയുടെ കരുണ എനിക്കു നൽകണമേ. യേശുവേ, ഞാൻ അങ്ങയിൽ ശരണപ്പെടുന്നു.
വിശുദ്ധ മോനിക്കയോടുള്ള നൊവേന
(പ്രത്യേകിച്ച് വഴിതെറ്റിപ്പോയ മക്കൾക്കുവേണ്ടി ചൊല്ലുന്ന പ്രാർഥന)
ഓഗസ്റ്റ് 18-26
ദൈവകരുണയെക്കുറിച്ചുള്ള വിചിന്തനങ്ങൾ
ആണ്ടുവട്ടത്തിലേക്കുള്ള വിശുദ്ധലിഖിത ധ്യാനങ്ങൾ
ഇന്നത്തെ വിശുദ്ധൻ – ക്ലെയർവോയിലെ വിശുദ്ധ ബെർണാർദ്, ആശ്രമാധിപനും വേദപാരംഗതനും
ഈ വർഷം ഞായറാഴ്ച വരുന്നതിനാൽ ആരാധനാക്രമത്തിൽ അനുസ്മരണമായി ആഘോഷിക്കുന്നില്ല
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
മുകളിൽ നൽകിയിരിക്കുന്ന മുഖ്യചിത്രം: ക്രിസ്തുവും കാനാൻകാരിയും, Web Gallery of Art മുഖേന
