2024 ഓഗസ്റ്റ് 5
ആണ്ടുവട്ടത്തിലെ പതിനെട്ടാം ആഴ്ചയിലെ തിങ്കളാഴ്ച (വർഷങ്ങൾ B&C)
ഇന്നത്തെ വായനകൾ
സാന്താ മരിയ മജോരെ ബസിലിക്കയുടെ പ്രതിഷ്ഠ—ഐച്ഛിക അനുസ്മരണം
അവൻ ആ അഞ്ച് അപ്പവും രണ്ട് മീനും എടുത്ത്, സ്വർഗത്തിലേക്കു നോക്കി ആശീർവാദം ചൊല്ലി, അപ്പം മുറിച്ച് ശിഷ്യന്മാർക്കു നൽകി. അവർ അത് ജനക്കൂട്ടങ്ങൾക്കു വിതരണം ചെയ്തു. എല്ലാവരും ഭക്ഷിച്ചു തൃപ്തരായി. ശേഷിച്ച കഷണങ്ങൾ അവർ ശേഖരിച്ചു—പന്ത്രണ്ട് മെടഞ്ഞ കുട്ടകൾ നിറയെ. മത്തായി 14:19–20
ഈ അത്ഭുതത്തിന്റെ എളുപ്പത്തിൽ ശ്രദ്ധിക്കപ്പെടാതെ പോകാവുന്ന ഒരു പ്രധാന വശം, യേശു തന്റെ ശിഷ്യന്മാരെ ഉപകരണങ്ങളാക്കിയാണ് അപ്പവും മീനും വർധിപ്പിച്ചത് എന്നതാണ്. അപ്പം വിതരണം ചെയ്യാനും ശേഷിച്ച കഷണങ്ങൾ ശേഖരിക്കാനും സഹായിക്കുവാൻ അവരെ ക്ഷണിച്ചുകൊണ്ടാണ് അവൻ ഇതു ചെയ്തത്. മറ്റുള്ളവർക്കു നൽകുന്ന തന്റെ അതിസമൃദ്ധമായ കൃപകളുടെ മധ്യസ്ഥരായി ദൈവം പലപ്പോഴും നമ്മെ ഉപയോഗിക്കുന്നു എന്ന് ഇതു വെളിപ്പെടുത്തുന്നു. ദൈവത്തിനു തന്റെ കരുണ നേരിട്ടു വർഷിക്കാൻ കഴിയുമെങ്കിലും, മിക്കപ്പോഴും അവിടുന്ന് അതു ചെയ്യുന്നത് മറ്റുള്ളവരിലൂടെയാണ്.
ഈ അത്ഭുതത്തെക്കുറിച്ച് ധ്യാനിക്കുമ്പോൾ, ജനങ്ങൾക്ക് അപ്പം വിതരണം ചെയ്യാൻ ക്ഷണിക്കപ്പെട്ട ശിഷ്യന്മാരിൽ ഒരാളായി നിങ്ങളെത്തന്നെ കാണാൻ ശ്രമിക്കുക. നിങ്ങൾ അവിടെ ഉണ്ടായിരുന്നുവെന്നും വിശന്നിരിക്കുകയായിരുന്നുവെന്നും സങ്കൽപ്പിക്കുക. അപ്പോൾ നിങ്ങൾക്ക് അപ്പം ലഭിച്ചിരുന്നെങ്കിൽ, മറ്റുള്ളവർക്ക് എന്തെങ്കിലും നൽകുന്നതിനുമുമ്പ് സ്വയം അതു ഭക്ഷിക്കാൻ നിങ്ങൾക്കു പ്രലോഭനമുണ്ടാകുമായിരുന്നു. എന്നാൽ വിശന്നിരുന്ന തന്റെ ശിഷ്യന്മാർക്ക് യേശു അപ്പം നൽകിയത്, ആദ്യം അതു മറ്റുള്ളവർക്കു നൽകണമെന്ന നിർദേശത്തോടെയായിരുന്നു.
ചിലപ്പോൾ, തന്റെ കരുണ മറ്റുള്ളവർക്കു പകർന്നുനൽകാൻ ദൈവം നമ്മെ വിളിക്കുമ്പോൾ, നാം സ്വാർഥരായിത്തീരുന്നു. ആദ്യം നമ്മെത്തന്നെയും നമ്മുടെ ആവശ്യങ്ങളെയും പരിപാലിക്കണമെന്നു ചിന്തിക്കാൻ എളുപ്പമാണ്. നമ്മുടെ ആവശ്യങ്ങൾ നിറവേറ്റപ്പെട്ടതിനുശേഷം മാത്രമേ മറ്റുള്ളവരോടു കരുണ കാണിക്കാൻ കഴിയൂ എന്നു നാം തെറ്റായി വിശ്വസിക്കുന്നു. ഉദാഹരണത്തിന്, യേശുവിൽനിന്ന് അപ്പം ലഭിച്ചപ്പോൾ, ആദ്യം തങ്ങൾ അതിൽനിന്നു ഭക്ഷിക്കണമെന്ന് ശിഷ്യന്മാർ തീരുമാനിച്ചിരുന്നെങ്കിൽ എന്താകുമായിരുന്നുവെന്ന് സങ്കൽപ്പിക്കുക. അതിനുശേഷം എന്തെങ്കിലും അധികമുണ്ടെങ്കിൽ മറ്റുള്ളവർക്കു നൽകാമായിരുന്നു. അവർ അങ്ങനെ ചെയ്തിരുന്നെങ്കിൽ, അപ്പം വർധിച്ചതിലൂടെ ഉണ്ടായ ആ അതിസമൃദ്ധി സംഭവിക്കുമായിരുന്നില്ല. ഒടുവിൽ ശിഷ്യന്മാർക്കുതന്നെ അതിസമൃദ്ധമായി ഭക്ഷണം ലഭിച്ചു—തങ്ങൾക്കു ലഭിച്ചത് അവർ ആദ്യം മറ്റുള്ളവർക്കു നൽകിയതുകൊണ്ടുതന്നെ.
ആത്മീയമായി പറഞ്ഞാൽ, നമ്മുടെ കാര്യത്തിലും ഇതുതന്നെയാണ് സത്യം. നമ്മുടെ കർത്താവിൽനിന്ന് ആത്മീയ പോഷണം ലഭിക്കുമ്പോൾ, അതു മറ്റുള്ളവർക്കു പകർന്നുനൽകുക എന്നതായിരിക്കണം നമ്മുടെ ആദ്യ ചിന്ത. ദൈവത്തിൽനിന്നു ലഭിക്കുന്നതെല്ലാം ആ അനുഗ്രഹങ്ങൾ മറ്റുള്ളവർക്കു പകർന്നുനൽകാനുള്ള അവസരമായി നാം ആദ്യം കാണണം. ഇതാണ് കൃപയുടെ സ്വഭാവം. ഉദാഹരണത്തിന്, നമ്മുടെ ഹൃദയങ്ങളിൽ സമാധാനത്തിന്റെയോ സന്തോഷത്തിന്റെയോ അനുഭവം ലഭിക്കുകയാണെങ്കിൽ, നമുക്കു ലഭിക്കുന്ന ഈ സമാധാനമോ സന്തോഷമോ ഉടൻതന്നെ മറ്റുള്ളവർക്കു പകർന്നുനൽകേണ്ട ഒരു ദാനമാണെന്നു നാം തിരിച്ചറിയണം. വിശുദ്ധഗ്രന്ഥത്തെക്കുറിച്ച് ഒരു ആത്മീയ ഉൾക്കാഴ്ച നമുക്കു ലഭിച്ചാൽ, അതു നമുക്കു നൽകപ്പെട്ടിരിക്കുന്നത് സർവോപരി മറ്റുള്ളവരുമായി പങ്കുവയ്ക്കാനാണ്. ദൈവത്തിൽനിന്നു ലഭിക്കുന്ന ഓരോ ദാനവും ഉടൻതന്നെ മറ്റുള്ളവരുമായി പങ്കുവയ്ക്കാൻവേണ്ടി നമുക്കു നൽകപ്പെട്ട ദാനമായി മനസ്സിലാക്കണം. നമുക്കു ലഭിച്ചതു പകർന്നുനൽകാൻ നാം ശ്രമിക്കുമ്പോൾ, കൂടുതൽ നമുക്കു നൽകപ്പെടുന്നു; ഒടുവിൽ നാം ഏറെ സമ്പന്നരായിത്തീരും എന്നതാണ് സന്തോഷവാർത്ത.
നമ്മുടെ കർത്താവിൽനിന്ന് ഈ ഭക്ഷണം സ്വീകരിച്ച് ഉടൻതന്നെ അതു മറ്റുള്ളവർക്കു നൽകിയ ശിഷ്യന്മാരുടെ പ്രവൃത്തിയെക്കുറിച്ച് ഇന്ന് ധ്യാനിക്കുക. ഈ അത്ഭുതത്തിൽ നിങ്ങളെത്തന്നെ കാണുക; ദൈവത്തിൽനിന്നു നിങ്ങൾക്കു ലഭിക്കുന്ന ഓരോ കൃപയുടെയും പ്രതീകമായി അപ്പത്തെ കാണുക. മറ്റുള്ളവർക്കു വിതരണം ചെയ്യണമെന്ന് ദൈവം ആഗ്രഹിക്കുന്ന എന്താണ് നിങ്ങൾക്കു ലഭിച്ചിരിക്കുന്നത്? നിങ്ങൾക്കു ലഭിച്ച കൃപകളിൽ സ്വാർഥതയോടെ മുറുകെപ്പിടിക്കാൻ നിങ്ങൾ ശ്രമിക്കുന്നവയുണ്ടോ? മറ്റുള്ളവർക്കു നൽകാൻവേണ്ടിയാണ് കൃപ നൽകപ്പെടുന്നത് എന്നതാണ് അതിന്റെ സ്വഭാവം. നിങ്ങൾക്കു ലഭിക്കുന്ന ഓരോ ആത്മീയ ദാനവും ഇങ്ങനെ പങ്കുവയ്ക്കാൻ ശ്രമിക്കുക. അപ്പോൾ, നിങ്ങൾക്കു സങ്കൽപ്പിക്കാൻ കഴിയുന്നതിലും അധികം ലഭിക്കുംവിധം കൃപകൾ വർധിക്കുന്നതായി നിങ്ങൾ കണ്ടെത്തും.
അത്യുദാരനായ കർത്താവേ, അങ്ങയുടെ കൃപയും കരുണയും അങ്ങ് അതിസമൃദ്ധമായി വർഷിക്കുന്നു. അങ്ങ് നൽകുന്നതെല്ലാം ഞാൻ സ്വീകരിക്കുമ്പോൾ, അങ്ങയുടെ കരുണ മറ്റുള്ളവർക്കു പകർന്നുനൽകാൻ ഒരിക്കലും മടിക്കാതിരിക്കേണ്ടതിന് എന്റെ ഹൃദയത്തെ ഉദാരതയാൽ നിറയ്ക്കണമേ. പ്രിയ കർത്താവേ, എന്നിലൂടെ മറ്റുള്ളവരെ സമൃദ്ധമായി പോഷിപ്പിക്കേണ്ടതിന് എന്നെ അങ്ങയുടെ ഉപകരണമാക്കണമേ. ഈശോയേ, ഞാൻ അങ്ങയിൽ ശരണപ്പെടുന്നു.
ദൈവകരുണയെക്കുറിച്ചുള്ള വിചിന്തനങ്ങൾ
ആണ്ടുവട്ടത്തിലേക്കുള്ള വിശുദ്ധലിഖിത ധ്യാനങ്ങൾ
കൂടുതൽ വായനയ്ക്ക് – സെന്റ് മേരി മേജർ ബസിലിക്കയുടെ പ്രതിഷ്ഠാദിനം
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
