मराठी

सत्याच्या आत्म्याचे आगमन

१७ मे २०२०
पुनरुत्थानकाळातील सहावा रविवार (वर्ष अ)
आजची वाचने

“जर तुम्ही माझ्यावर प्रेम करत असाल, तर माझ्या आज्ञा पाळाल. आणि मी पित्याला विनंती करीन, व तो तुम्हाला दुसरा कैवारी देईल, जो सदैव तुमच्याबरोबर राहील. तो सत्याचा आत्मा आहे, ज्याचा स्वीकार जग करू शकत नाही…” योहान 14:15–17

आज, पुनरुत्थानकाळातील या सहाव्या रविवारी, आपले लक्ष पवित्र आत्म्याच्या आगमनाकडे वळू लागते. वर दिलेल्या उताऱ्यात येशू सांगतो की, सदैव आपल्याबरोबर राहण्यासाठी दुसरा कैवारी पाठवावा, अशी विनंती तो पित्याला करील. हा कैवारी म्हणजे पवित्र आत्मा.

विशेष म्हणजे, येशू पवित्र आत्म्याला “सत्याचा आत्मा” असे संबोधतो. पवित्र आत्म्याचा स्वीकार जग करू शकत नाही, हेही तो दाखवून देतो.

आपण सध्या ज्या काळात जगत आहोत, त्याला “पवित्र आत्म्याचे युग” असे म्हणता येईल. याच युगाविषयी येशू आपल्या प्रेषितांशी बोलला होता. म्हणून येशूने पवित्र आत्म्याच्या आगमनाविषयी जे उलगडून सांगितले, त्या प्रकाशात त्याच्या आगमनाकडे पाहणे योग्य ठरेल.

प्रथम, “सत्याचा आत्मा” या नावावर चिंतन करताना आपण स्वतःला विचारू या: पवित्र आत्म्याचा स्वीकार केल्याने आपल्याला जे संपूर्ण सत्य लाभते, ते स्वीकारण्याची आपली तयारी आणि क्षमता आहे का? आपण जगाच्या आहारी जाऊन सांसारिक विचार आणि मूल्ये स्वीकारत असू, तर आपल्याला पवित्र आत्म्याचा स्वीकार करता येणार नाही. पण आपल्या जगातील चुका आणि त्यात रूढ झालेली अनेक चुकीची मूल्ये आपल्याला ओळखता आली, तर ती मूल्ये नाकारणे आणि पवित्र आत्म्याचा व तो प्रकट करत असलेल्या अनेक सत्यांचा स्वीकार करणे आपल्याला अधिक सोपे जाईल.

शिवाय, पवित्र आत्म्याच्या आगमनासाठी आपण आपले अंतःकरण खुले ठेवले, तर जीवनात लाभू शकणारा सर्वश्रेष्ठ कैवारी आपल्याला लाभेल. पवित्र आत्माच आपला कैवारी आहे, म्हणजेच आपल्याला आवश्यक असलेला एकमेव साहाय्यकर्ता तोच आहे. पवित्र आत्म्याने आपले संपूर्ण जीवन व्यापून टाकले, तर जीवनासाठी आवश्यक असलेली प्रत्येक कृपा आपल्याला लाभते.

येशूने आपल्या प्रेषितांना दिलेले वचन पूर्ण झाले आहे आणि त्या वचनाचे फळ तुम्हाला तुमच्या जीवनात इथेच आणि आत्ताच स्वीकारता येते, या गोष्टीवर आज चिंतन करा. पवित्र आत्म्याला प्रार्थना करा आणि दोन आठवड्यांनी येणारा पेंटेकॉस्ट रविवार साजरा करण्याची आतुरतेने वाट पाहा.

हे पवित्र आत्म्या, ये. तुझ्या श्रद्धावंतांची अंतःकरणे भरून टाक आणि त्यांच्यात तुझ्या प्रेमाचा अग्नी प्रज्वलित कर. तुझा आत्मा पाठव, आणि ते निर्माण होतील. आणि तू पृथ्वीचे रूप नवे करशील.

हे देवा, पवित्र आत्म्याच्या प्रकाशाने तू श्रद्धावंतांच्या अंतःकरणांना बोध केलास. त्याच पवित्र आत्म्याद्वारे आम्हाला खरे शहाणपण लाभो आणि त्याचे सांत्वन आम्हाला सदैव मिळो, अशी कृपा कर. आमच्या प्रभू ख्रिस्ताद्वारे ही प्रार्थना करतो. आमेन. हे येशू, माझा तुझ्यावर विश्वास आहे.

शुभवर्तमानावरील आणखी चिंतने

दैवी दयेवरील चिंतन

आजचे संत आणि सण

मिस्साच्या वाचनांचे पर्याय

चित्र: पवित्र आत्म्याचा वर्षाव — अँथनी व्हॅन डाइक