29 जानेवारी 2026
सामान्य काळातील तिसऱ्या आठवड्याचा गुरुवार
आजची वाचने
आंद्रेयास एफ. बोर्खर्ट, CC BY-SA 3.0 DE, विकिमीडिया कॉमन्समार्फत
येशू आपल्या शिष्यांना म्हणाला, “दिवा दिवठणीवर ठेवायचा सोडून धान्य मोजण्याच्या टोपल्याखाली किंवा पलंगाखाली ठेवण्यासाठी आणतात काय? कारण जे काही लपलेले आहे ते दिसावे म्हणूनच, आणि जे काही गुप्त आहे ते उजेडात यावे म्हणूनच. ज्याला ऐकायला कान आहेत, त्याने ऐकावे.” मार्क 4:21–23
तुमच्या जीवनाला कशातून दिशा मिळते? तुमच्या निर्णयांवर कशाचा प्रभाव पडतो? संपत्ती किंवा प्रतिष्ठा मिळवण्यासारख्या सांसारिक इच्छा अनेकांना चालना देतात. इतर जण क्षणभंगुर सुखांत समाधान शोधतात. काही जण सांस्कृतिक क्षेत्रातील नामवंत व्यक्तींकडून किंवा समाज ज्यांना यशस्वी मानतो अशा लोकांकडून प्रेरणा घेतात. पण ख्रिस्ती म्हणून आपल्याला प्रेरणा आणि चालना एकाच उगमातून घेण्याचे आवाहन आहे: देवाच्या सत्याच्या प्रकाशातून.
आजच्या शुभवर्तमानातील दिवा हे स्वतः ख्रिस्ताचे प्रतीक आहे. जसा दिवा अंधारी खोली उजळतो, तसा ख्रिस्त आपले मन उजळतो आणि निर्णय घेताना आपल्याला मार्ग दाखवतो. दिवा धान्य मोजण्याच्या टोपल्याखाली किंवा पलंगाखाली लपवला, तर त्याचा हेतू साधत नाही. त्याचप्रमाणे ख्रिस्ताने आपल्या जीवनाचे प्रत्येक अंग उजळले पाहिजे आणि त्याचा प्रकाश आपल्या शब्दांतून, कृतींतून आणि आपण इतरांना देत असलेल्या साक्षीतून झळकला पाहिजे.
दैवी सत्य असलेल्या ख्रिस्ताचे प्रतीक जर दिवा असेल, तर ते सत्य उंच धरून इतरांपर्यंत पोहोचवण्याच्या साधनाचे प्रतीक दिवठणी आहे. देव, त्याची कृपा आणि शुभवर्तमानाचे सत्य हाच प्रकाश आहे; तो आपल्यापर्यंत निरनिराळ्या मार्गांनी पोहोचतो. देवाचा प्रकाश आपल्या जीवनाच्या केंद्रस्थानी असावा, हे ख्रिस्ती म्हणून आपले पहिले ध्येय आहे. म्हणजेच, जीवनात प्रश्न उभे राहतात तेव्हा सत्य व मार्गदर्शन यांचा एकमेव उगम असलेल्या त्या प्रकाशाकडे आपण सर्वप्रथम वळतो. त्यासाठी आपण पवित्र शास्त्र, कॅथलिक धर्मशिक्षणग्रंथ आणि संतांचे जीवन यांकडे वळतो व इतर पवित्र व्यक्तींकडून प्रेरणा घेतो.
दिवठणी दिव्याला आधार देते आणि तो उंच धरते. तिचा पाया भक्कम असल्याने जीवनातील आव्हानांचे वारे वाहत असतानाही ज्योत स्थिर राहते आणि दिसत राहते. त्याचप्रमाणे प्रार्थना, संस्कार आणि सत्कृत्ये आपल्या जीवनात सत्याचा प्रकाश स्थिर ठेवण्यास मदत करतात, जेणेकरून तो तेजाने आणि सातत्याने झळकत राहतो.
आपले जीवन उजळले आणि देवाने आपल्यासाठी निवडलेला मार्ग आपल्याला स्पष्ट दिसू लागला, की तो प्रकाश सहजपणे आपल्यातून इतरांपर्यंत पोहोचू लागतो. शुभवर्तमानप्रसाराचे सार हेच आहे. रोजची प्रार्थना, संस्कारमय जीवन, प्रेमाची कृत्ये आणि शुभवर्तमानाची साक्ष देण्याचे धैर्य यांद्वारे आपण ख्रिस्ताचा प्रकाश उंच धरणारी दिवठणी बनतो. आपल्या उदाहरणातून इतरांना त्या प्रकाशाचा अनुभव येतो, तेव्हा त्यांनाही त्याच्या उगमाच्या अधिक जवळ येण्याचे आमंत्रण मिळते, जेणेकरून शुभवर्तमानाचे सत्य त्यांचेही जीवन उजळू शकेल.
शुभवर्तमानाचा प्रसार करताना कधी कधी आपल्याला अडचणी येतात. शुभवर्तमानात अजिबात रस नसल्याचे सांगणारे लोक भेटतात, तेव्हा गप्प राहून ख्रिस्ताचा प्रकाश झाकून ठेवण्याचा मोह होतो. पण त्यामुळे इतर जण अंधारातच राहतात. इतरांना अंधारच पसंत असेल, तर आपण ख्रिस्ताच्या प्रकाशासाठी दिवठणी होऊ नये, असे दुष्ट आपल्याला अनेकदा भासवतो. त्यांचे मन दुखावेल किंवा ‘आम्ही तुमच्यापेक्षा अधिक पवित्र आहोत’ असा आव आणत असल्यासारखे वाटेल, अशी भीती आपल्याला वाटू शकते. हा एक धोकादायक सापळा आहे.
प्रेम आपल्याला शुभवर्तमानाचा प्रसार करण्यास प्रवृत्त करते. प्रत्येकाच्या जीवनात ख्रिस्ताची गरज आहे, मग ती गरज त्यांना जाणवत नसली किंवा ते ख्रिस्ताच्या प्रकाशाला विरोध करत असले तरीही. ख्रिस्ताची दिवठणी होणे तुम्हाला कठीण वाटत असेल, तर येशूच्या पुढील शब्दांवर चिंतन करा: “कारण जे काही लपलेले आहे ते दिसावे म्हणूनच, आणि जे काही गुप्त आहे ते उजेडात यावे म्हणूनच.” म्हणजेच, एक दिवस आपण सर्व ख्रिस्ताच्या न्यायासनासमोर उभे राहू. अंतिम न्यायाच्या वेळी प्रत्येक लपलेला विचार आणि प्रत्येक गुप्त कृती उजेडात येईल. ती आपल्याला आणि ख्रिस्तासमोर उभ्या असलेल्या सर्वांना दिसेल. त्या दिवशी, इतरांसाठी ख्रिस्ताचा प्रकाश उंच धरणारी दिवठणी होण्याकरिता आपण शक्य ते सर्व केले, याची आपल्याला खंत वाटेल का? नक्कीच नाही. उलट, आपले शब्द आणि कृती निष्फळ वाटल्या असल्या तरी, आपण केलेल्या प्रत्येक प्रयत्नाचा आपल्याला आनंद होईल. आपण पसरवलेला प्रकाश कदाचित दुसऱ्या कुणाचा मार्ग लगेच उजळणार नाही. तरीही, जमिनीत पेरलेल्या बियांसारखा तो देवाने ठरवलेल्या योग्य वेळी वाढू शकतो आणि फळ देऊ शकतो.
भीती, आत्मसंतुष्टता किंवा स्वतःबद्दलची शंका यांमुळे तुम्ही तुमच्या जीवनातील ख्रिस्ताचा प्रकाश झाकून ठेवला आहे का, यावर आज चिंतन करा. देवाने तुमच्या वाटेवर आणलेल्या अशा लोकांचा विचार करा, ज्यांना त्याच्या प्रकाशाची गरज आहे, पण ज्यांना तुमच्याद्वारे अजून त्या प्रकाशाचा अनुभव आलेला नाही. ख्रिस्ताची दिवठणी होण्याचा निर्धार करा आणि त्याचे सत्य सर्वांना दिसावे म्हणून ते धैर्याने व प्रेमाने उंच धरा.
हे येशू, जगाच्या प्रकाशा, सर्वांना मुक्त करणारे सत्य आणि सारा अंधार दूर करणारा प्रकाश म्हणून स्वतःला प्रकट करण्यासाठी तू आलास. कृपा करून माझ्या जीवनात तेजाने झळक आणि मला सदैव मार्ग दाखव, म्हणजे मी तुझे साधन होऊ शकेन, तू माझ्यावर विसावशील आणि माझ्याद्वारे इतरांच्या जीवनात तुझा प्रकाश झळकेल. हे येशू, माझा तुझ्यावर विश्वास आहे.
सामान्य काळासाठी पवित्र शास्त्रावरील चिंतन




