Jumapili, Mei 19, 2019
Jumapili ya Tano ya Pasaka, Mwaka C
Sikiliza kwa Kiingereza
Yuda alipokuwa amewaacha, Yesu alisema, “Sasa Mwana wa Mtu ametukuzwa, naye Mungu ametukuzwa ndani Yake.” Yohane 13:31
Ni muhimu sana kujua mwisho wa simulizi. Yesu alijua mwisho wake alipowaambia Mitume maneno haya wakati wa Karamu ya Mwisho, mara tu baada ya Yuda kuondoka kwenda kumsaliti. Ni muhimu kutazama hali hii kwa kuzingatia jinsi Yesu alivyoielewa. Kwa mtazamo wa kibinadamu tu, mmoja wa rafiki wa karibu sana wa Yesu alikuwa karibu kumsaliti kwa ajili ya fedha. Kwa wengi wetu, jambo hili lingetuvunja moyo sana na kusababisha hasira na uchungu. Lakini kwa kuwa Yesu alijua mwisho wa simulizi, aliweza kuuona usaliti wa Yuda kama njia ya kutukuzwa Kwake, si ya kushindwa Kwake. Aliyaelekeza macho Yake Mbinguni na kwenye yote ambayo angetimiza kwa njia ya mateso Yake, badala ya kutazama uchungu ambao angeupitia muda mfupi baadaye.
Hili ni fundisho lenye nguvu kwetu sote. Kwanza, ni muhimu tutazame kutukuzwa kwa Yesu kwa njia ya kusalitiwa Kwake, mateso na kifo Chake. Lakini pia tunapaswa kujitahidi kuona yale yanayoweza kutimizwa kwa njia ya mateso yetu wenyewe yanapounganishwa na Mwokozi wa Ulimwengu.
Unafanyaje mtu mwingine anapokukosea? Ungefanyaje kama Yuda angeusaliti upendo wako? Hili ni swali gumu sana kulikabili kwa uaminifu, na ni vigumu zaidi kuishi kwa namna Yesu alivyoitikia. Ukweli ni kwamba kila tunapotendewa vibaya na mtu mwingine, tunapewa nafasi ya kumtukuza Mungu na kuuendeleza Ufalme wa Mbinguni kwa kusamehe, kuunganisha mateso yetu na ya Kristo, na kuonyesha huruma. Ni rahisi zaidi kuzungumza kuhusu jambo hili kuliko kuliishi.
Tafakari leo tukio hili la Injili. Mtazame Yuda akiondoka katika Karamu ya Mwisho na kutoka kwenda gizani usiku ili kumsaliti Bwana wetu. Lakini litazame tukio hili kama Yesu alivyolitazama. Litazame ukielewa kwamba hii ndiyo njia aliyochagua Baba ili kuuletea ulimwengu wokovu. Tafakari pia kila nafasi unayopewa ya kutenda kama Yesu alivyotenda. Jaribu kufikiria hali halisi na mahususi, na uyaone mateso yoyote na yote unayovumilia kuwa nafasi tukufu ya kuwafikishia wengine huruma ya Mungu. Ingawa hili linaweza kuwa gumu mwanzoni, tendo hili la upendo ndilo litakalompa Baba wa Mbinguni utukufu mkuu!
Bwana wangu mpendwa, ulisalitiwa kwa busu la mmoja wa rafiki Zako wa karibu sana. Lakini katika hekima Yako kamilifu, uliuona usaliti huu kama fursa bora kabisa ya kumtukuza Baba kwa njia ya huruma na msamaha Wako. Bwana, mimi pia nimekusaliti mara zisizohesabika. Kwa sababu hiyo ninajuta. Lakini ninakushukuru kwa kunipenda na kunisamehe kwa Moyo Wako wenye huruma kamilifu. Nisaidie kuipokea huruma hiyo na kuwahurumia wengine walionikosea. Yesu, nakutumainia.
Tafakari juu ya Huruma ya Mungu
