(Tanbihi: Kuna tafakari mbili hapa chini: ‘Alhamisi ya Juma la Sita la Pasaka’ inatumika katika majimbo ambamo adhimisho la Kupaa Mbinguni huhamishiwa Jumapili ya Saba ya Pasaka. Kwa majimbo yanayoadhimisha Kupaa Mbinguni leo, bofya hapa au sogeza ukurasa chini.)
Mei 21, 2020
Alhamisi ya Juma la Sita la Pasaka
Masomo ya Leo
Mtakatifu Kristoforo Magallanes, Padri na Shahidi, na Wenzake, Mashahidi—Kumbukumbu ya Hiari
Sikiliza kwa Kiingereza
“Amina, amina, nawaambia, mtalia na kuomboleza, huku ulimwengu ukifurahi; mtahuzunika, lakini huzuni yenu itageuka kuwa furaha.” Yohane 16:20
Huzuni, maombolezo na hata kulia ni sehemu ya maisha. Mara nyingi watoto hulia wanapokabiliwa na shida ndogo tu, lakini sisi sote hukabili huzuni na uchungu katika maisha yetu yote.
Katika kifungu hicho hapo juu, Yesu anawaambia Mitume Wake kwamba huzuni na uchungu vitakuwa sehemu ya maisha yao. Haya ni maneno mazito sana kutoka kwa Bwana wetu, lakini yanaeleza hali halisi. Kuwambia Mitume Wake waziwazi kuhusu taabu zitakazowakabili ni tendo la upendo kwa upande Wake.
Habari njema ni kwamba Yesu anafuatisha kauli hii kwa habari yenye matumaini kwamba “huzuni yao itageuka kuwa furaha.” Hii ndiyo sehemu muhimu zaidi ya yale anayosema Yesu.
Ndivyo ilivyo pia katika maisha yetu. Yesu hatuahidi kwamba maisha yetu hayatakuwa na taabu na maumivu. Hatuambii kwamba kumfuata kunamaanisha kuwa kila kitu kitakuwa rahisi maishani. Badala yake, anataka tujue kwamba tukichagua kumfuata, tutatembea katika nyayo Zake. Aliteseka, alitendewa vibaya na hatimaye akauawa. Na huo ungekuwa msiba kama hatimaye asingefufuka kutoka kwa wafu, kupaa Mbinguni na kugeuza huzuni na maumivu yote yaliyotangulia kuwa njia yenyewe ya wokovu wa ulimwengu.
Tukitembea katika nyayo Zake, tunahitaji kuona kwamba kila huzuni katika maisha yetu inaweza kuwa njia ya neema kwa wengi. Tukiweza kukabiliana na taabu za maisha kwa imani na matumaini, hatimaye hakuna kitakachoweza kutushinda, na kila kitu kitaweza kutumika kwa utukufu wa Mungu na kuleta furaha kuu.
Tafakari leo juu ya maneno haya ya Yesu. Jua kwamba hakuwa akiwaambia Mitume Wake tu, bali pia wewe. Usikwazike wala kushtuka unapokumbana na shida fulani maishani. Usikate tamaa unapokabiliwa na mateso. Yakabidhi mambo yote kwa Bwana wetu na umruhusu ayageuze kuwa furaha anayoahidi mwishoni.
Bwana, ninakukabidhi mateso yote katika maisha yangu. Huzuni yangu, taabu zangu, uchungu wangu na kuchanganyikiwa kwangu ninaviweka mikononi Mwako. Ninaamini kwamba Wewe ni mwenyezi na unatamani kugeuza mambo yote kuwa njia ya kuudhihirisha utukufu Wako. Nipe matumaini nyakati za kukata tamaa na tumaini Kwako maisha yanapokuwa magumu. Yesu, nakutumainia.
Novena kwa Roho Mtakatifu
Husaliwa kwa maandalizi ya Pentekoste
Kuanzia Ijumaa, Mei 22
Tafakari juu ya Huruma ya Mungu
Mtakatifu wa Siku – Mtakatifu Kristoforo Magallanes, Padri na Shahidi, na Wenzake, Mashahidi
Machaguo ya Masomo ya Misa Takatifu
+++
Uwepo wa Kudumu wa Bwana Wetu
Sherehe ya Kupaa kwa Bwana Wetu Mbinguni
Sikiliza kwa Kiingereza
“Basi, enendeni, mkawafanye watu wa mataifa yote kuwa wanafunzi, mkiwabatiza kwa jina la Baba, na la Mwana, na la Roho Mtakatifu, mkiwafundisha kuyashika yote niliyowaamuru. Na tazama, Mimi nipo pamoja nanyi daima, hata mwisho wa nyakati.” Mathayo 28:19-20 (Mwaka A)
Yesu anakamilisha utume Wake duniani na kupaa Mbinguni ili aketi kwenye kiti Chake cha enzi chenye utukufu milele yote. Au sivyo? Jibu ni ndiyo na hapana. Ndiyo, anaketi kwenye kiti Chake cha enzi chenye utukufu, lakini hapana, hakamilishi utume Wake duniani. Kupaa Mbinguni ni mwisho na pia mwanzo. Ni mpito kuelekea hatua inayofuata katika mpango mkamilifu wa Baba. Na kuelewa jinsi mpango huu unavyotimia kunapaswa kutujaza mshangao na kicho.
Bila shaka, huenda Mitume walikuwa na hofu na kuchanganyikiwa kwa kiasi fulani. Yesu alikuwa pamoja nao, kisha akafa, halafu akafufuka na kuwatokea mara kadhaa, na baadaye akapaa kwenda kwa Baba mbele ya macho yao. Lakini pia aliwaambia kwamba ni vema aende. Kwa kweli, alisema kwamba ni bora aende. Bila shaka walichanganyikiwa. Yesu pia aliwaambia kwamba Msaidizi Wake angekuja kuwaongoza katika Ukweli wote. Hivyo Mitume walitoka katika furaha wakaingia katika hofu, kisha wakapata nafuu na furaha zaidi, halafu wakachanganyikiwa na kuhuzunika, na baadaye wakawa na shauku ya kujua na hali ya kutokuwa na uhakika.
Je, hali hiyo unaifahamu? Labda hivyo ndivyo wengine wanavyoyaona maisha yao. Kupanda na kushuka, mabadiliko yasiyotarajiwa, furaha na huzuni. Kila hatua hufunua jambo jipya, jambo lenye changamoto, jambo lenye utukufu au jambo la kuhuzunisha. Habari njema ni kwamba mpango wa Baba unatimia kikamilifu.
Katika adhimisho hili kuu, tunajikuta katika sehemu ile ya mpango mkamilifu ambapo Yesu anaanza kuongoza kutoka Mbinguni utume Wake wa kuusimamisha Ufalme wa Mungu. Kwa maana fulani, kiti Chake cha enzi ni kiti cha dereva wa maisha yetu. Kutoka Mbinguni, Yesu anaanza ghafla kushuka daima katika maisha yetu, akitimiza utume Wake ndani ya Mitume na kwa njia yao, na pia ndani yetu sote na kwa njia yetu. Kupaa Mbinguni hakumaanishi kwamba Yesu ameondoka; badala yake, kunamaanisha kwamba Yesu sasa yupo kwa kila mtu anayemgeukia na kuyakabidhi maisha yake kwa utume Wake. Kutoka Mbinguni, Yesu anaweza kuwapo kwa wote. Anaweza kuishi ndani yetu na anatualika tuishi ndani Yake. Huu ndio mwanzo mpya wa Kanisa. Sasa jambo pekee ambalo Mitume wote wanahitaji kufanya ni kumngojea Roho Mtakatifu ashuke.
Tafakari leo juu ya uwepo wa Bwana wetu maishani mwako, uwepo wa kudumu na wa karibu sana. Jua kwamba Yesu anakualika ushiriki katika utume Wake. Kutoka kwenye kiti Chake cha enzi chenye utukufu, anataka “tuhubiri kila mahali.” Anataka kumwalika kila mmoja wetu atimize sehemu yake. Sehemu ya mpango wa Baba aliyokabidhiwa kila mmoja wetu haijakabidhiwa mwingine. Sote tuna sehemu katika mpango huo. Sehemu yako ni ipi? Yesu anauongozaje utume Wake kupitia wewe? Litafakari swali hili leo na ujue kwamba anakusindikiza unaposema “Ndiyo” kwa sehemu yako katika kutimia kwa utukufu kwa mpango Wake mkamilifu.
Bwana, kwa kweli naona kwamba maisha yangu yamejaa kupanda na kushuka, mabadiliko na misukosuko mingi. Kuna furaha na huzuni, nyakati za kuchanganyikiwa na za kuelewa mambo wazi. Katika mambo yote, nisaidie niendelee daima kusema “Ndiyo” kwa mpango Wako. Yesu, nakutumainia.
Novena kwa Roho Mtakatifu
Husaliwa kwa maandalizi ya Pentekoste
Kuanzia Ijumaa, Mei 22
Tafakari juu ya Huruma ya Mungu
Machaguo ya Masomo ya Misa Takatifu
Soma Zaidi – Kupaa Mbinguni
Tafakari ya Sala kwa ajili ya Kupaa Mbinguni
Picha: Kupaa Mbinguni, kazi ya Benjamin West
_by_Benjamin_West,_PRA.jpg){kind=link}