மார்ச் 5, 2020
தவக்காலத்தின் முதல் வார வியாழன்
இன்றைய வாசகங்கள்
“கேளுங்கள், உங்களுக்குக் கொடுக்கப்படும்; தேடுங்கள், கண்டடைவீர்கள்; தட்டுங்கள், உங்களுக்குக் கதவு திறக்கப்படும்…”
“அப்படியானால், உங்கள் விண்ணகத் தந்தை தம்மிடம் கேட்பவர்களுக்கு எவ்வளவோ மேலாக நன்மைகளை வழங்குவார்.” மத்தேயு 7:7, 11
நாம் கேட்கும்போது பெற்றுக்கொள்வோம், தேடும்போது கண்டடைவோம், தட்டும்போது நமக்குக் கதவு திறக்கப்படும் என்று இயேசு மிகத் தெளிவாகக் கூறுகிறார். ஆனால் உங்கள் அனுபவம் அப்படித்தான் இருக்கிறதா? சில வேளைகளில் நாம் மீண்டும் மீண்டும் கேட்டுக் கெஞ்சினாலும், நமது செபத்திற்குப் பதில் கிடைக்காததுபோல் தோன்றுகிறது; குறைந்தபட்சம், நாம் விரும்பும் விதத்தில் பதில் கிடைப்பதில்லை. அப்படியானால், “கேளுங்கள்…தேடுங்கள்…தட்டுங்கள்”, நீங்கள் பெற்றுக்கொள்வீர்கள் என்று இயேசு கூறுவதன் பொருள் என்ன?
நம் ஆண்டவரின் இந்த அறிவுரையைப் புரிந்துகொள்வதற்கான திறவுகோல் இதுதான்: மேலே உள்ள மறைநூல் பகுதி கூறுவதுபோல், நமது செபத்தின் வழியாகக் கடவுள் “நன்மைகளைத் தம்மிடம் கேட்பவர்களுக்கு வழங்குவார்.” நாம் கேட்பதையெல்லாம் தருவதாக அவர் வாக்களிக்கவில்லை; மாறாக, உண்மையிலேயே நல்லதையும், குறிப்பாக நமது நிலைவாழ்வின் மீட்புக்கு நன்மை தருவதையுமே வாக்களிக்கிறார்.
இது நம்முள் ஒரு கேள்வியை எழுப்புகிறது: “அப்படியானால், நான் எப்படிச் செபிப்பது? எதற்காகச் செபிப்பது?” நாம் ஏறெடுக்கும் ஒவ்வொரு மன்றாட்டும் ஆண்டவரின் திருவுளம் நிறைவேறுவதற்காக மட்டுமே இருக்க வேண்டும். அதற்கு மேலாகவோ குறைவாகவோ எதுவுமில்லை. அவரது நிறைவான திருவுளம் மட்டுமே.
இதற்காகச் செபிப்பது, முதலில் நாம் நினைப்பதைவிடக் கடினமாக இருக்கலாம். பல நேரங்களில், நாம் “என் விருப்பம் நிறைவேறட்டும்” என்றே செபிக்க முனைகிறோம்; “உமது திருவுளம் நிறைவேறட்டும்” என்று அல்ல. ஆனால் கடவுளின் திருவுளம் நிறைவானது, அது எல்லா “நன்மைகளையும்” நமக்கு வழங்குகிறது என்பதை நம்மால் நம்ப முடிந்தால், அதுவும் ஆழமாக நம்ப முடிந்தால், அவரது திருவுளத்தை நாடுவதும், அதற்காக மன்றாடுவதும், அவரது இதயக் கதவைத் தட்டுவதும், அவர் வழங்க விரும்புகிறபடியே நமக்கு அருளை அபரிமிதமாகப் பெற்றுத் தரும்.
இன்று நீங்கள் செபிக்கும் விதத்தைச் சிந்தித்துப் பாருங்கள். கடவுள் உங்களுக்கு வழங்க வேண்டுமென நீங்கள் விரும்பும் பலவற்றை நாடுவதற்குப் பதிலாக, அவர் வழங்க விரும்பும் நன்மைகளை நாடும் வகையில் உங்கள் செபத்தை மாற்ற முயலுங்கள். உங்கள் சொந்த எண்ணங்களையும் விருப்பத்தையும் விட்டுவிடுவது முதலில் கடினமாக இருக்கலாம். ஆனால் இறுதியில், கடவுளிடமிருந்து பல நன்மைகளைப் பெற்று நீங்கள் ஆசீர்வதிக்கப்படுவீர்கள்.
ஆண்டவரே, அனைத்திலும் உமது திருவுளம் நிறைவேற வேண்டும் என்றே நான் செபிக்கிறேன். எல்லாவற்றிற்கும் மேலாக உம்மிடம் என்னை ஒப்படைக்கவும், உமது நிறைவான திட்டத்தில் நம்பிக்கை வைக்கவும் விரும்புகிறேன். அன்பு ஆண்டவரே, என் சொந்த எண்ணங்களையும் ஆசைகளையும் விட்டுவிட்டு, எப்போதும் உமது திருவுளத்தை நாட எனக்கு உதவியருளும். இயேசுவே, உம்மில் நம்பிக்கை வைக்கிறேன்.
சிலுவையடியில் 40 நாள்கள் – எட்டாம் சிந்தனை – அனைத்திலும் பிரமாணிக்கம்
இன்றைய புனிதர்கள்/திருவிழாக்கள்
திருப்பலி வாசிப்புகளுக்கான தெரிவுகள்
