Disyembre 7, 2020
Lunes sa Ikaduhang Semana sa Adbiyento
Mga Pagbasa Karong Adlawa
San Ambrosio, Obispo ug Magtutudlo sa Simbahan—Paghandum

Paminaw sa Iningles
Ug may pipila ka mga lalaki nga nagdala ug usa ka paralitiko nga naghigda sa higdaanan; naningkamot sila sa pagpasulod kaniya aron ibutang sa atubangan ni Jesus. Apan tungod sa panon sa katawhan, wala silay makit-ang agianan aron mapasulod siya. Busa misaka sila sa atop ug gitonton siya uban sa iyang higdaanan latas sa mga tisa, ngadto sa taliwala sa katawhan, sa atubangan ni Jesus. Lucas 5:18–19
Angayng matikdan nga sa dihang gipaubos sa mga higala nga puno sa pagtuo ang paralitiko gikan sa atop ngadto sa atubangan ni Jesus, si Jesus gilibotan sa mga Pariseo ug mga magtutudlo sa Balaod “gikan sa matag baryo sa Galilea ug Judea ug gikan sa Jerusalem” (Lucas 5:17). Daghan kaayo ang miabot nga mga pangulo sa relihiyon. Usa sila sa mga Hudiyo nga labing edukado, ug kauban sila sa mga nagtigom aron maminaw kang Jesus niadtong adlawa. Ang ilang kadaghan sa paglibot kang Jesus maoy usa sa mga hinungdan nga dili makaduol kaniya ang mga higala sa paralitiko kon dili sila mohimo niadtong talagsaong paagi sa pag-abli sa atop.
Busa unsay gibuhat ni Jesus sa pagkakita niya nga gipaubos gikan sa atop ang paralitiko sa iyang atubangan? Gisultihan niya ang paralitiko nga gipasaylo na ang iyang mga sala. Ikasubo nga dihadiha gisaway pag-ayo sa mga pangulo sa relihiyon ang iyang mga pulong diha sa ilang hunahuna. Miingon sila sa ilang kaugalingon, “Kinsa man kining nagsulti ug pasipala batok sa Diyos? Kinsa may makapasaylo sa mga sala gawas sa Diyos lamang?” (Lucas 5:21)
Apan nasayod si Jesus sa ilang gihunahuna ug mihukom nga mobuhat pa ug usa ka butang alang sa kaayohan niining mga pangulo sa relihiyon. Ang unang gibuhat ni Jesus, ang pagpasaylo sa mga sala sa paralitiko, alang sa kaayohan sa paralitiko. Apan angayng matikdan nga ang pag-ayo sa iyang lawas morag gituyo una sa tanan alang niining mapahitas-on nga mga Pariseo ug mga magtutudlo sa Balaod nga nagpakamatarong sa ilang kaugalingon. Giayo ni Jesus ang tawo aron sila “masayod nga ang Anak sa Tawo adunay awtoridad dinhi sa yuta sa pagpasaylo sa mga sala” (Lucas 5:24). Sa pagbuhat dayon ni Jesus niining milagro, gisulti sa Ebanghelyo nga ang tanan “napuno sa kahibulong” ug naghimaya sa Diyos. Dayag nga naapil usab niini ang mga pangulo sa relihiyon nga daling manghukom sa uban.
Busa unsay gitudlo niini kanato? Gipakita niini kon unsa kalawom ang gugma ni Jesus niining mga pangulo sa relihiyon bisan tuod hilabihan ang ilang garbo ug ang ilang pagkahilig sa pagpanghukom. Gusto niyang madani ang ilang kasingkasing. Gusto niya nga magbag-o sila, magpaubos ug modangop kaniya. Dili kaayo lisod ang pagpakita og gugma ug kalooy sa usa ka tawo nga paralitiko, gisalikway ug gipakaulawan na. Apan gikinahanglan ang hilabihan kalawom nga gugma aron tinud-anay usab nga magpakabana sa mga mapahitas-on ug arogante.
Pamalandongi karon ang gugma ni Jesus alang niining mga pangulo sa relihiyon. Bisan tuod mianhi sila aron mangitag ikasaway Kaniya, mohukom Kaniya sa dili makiangayon ug kanunayng mosulay sa paglit-ag Kaniya, wala gayod mohunong si Jesus sa Iyang mga paningkamot nga makabig sila. Samtang naghunahuna ka niining kaluoy sa atong Ginoo, hunahunaa usab ang tawo sa imong kinabuhi nga labing lisod higugmaon, ug bag-oha ang imong pasalig sa paghigugma kaniya sa tibuok mong kasingkasing, sa pagsundog sa atong balaang Ginoo.
Labing maluluy-on kong Ginoo, hatagi ako ug kasingkasing nga andam mopasaylo ug maluoy sa uban. Tabangi ako, ilabi na, nga magpakabana pag-ayo niadtong labing lisod alang kanako nga higugmaon. Lig-ona ako aron, sa pagsundog sa Imong balaang kaluoy, magpakita ako ug gugma nga walay pagduhaduha ngadto sa tanan, aron mas lawom ang ilang pag-ila Kanimo. Jesus, misalig ako Kanimo.
Nobena sa Imakulada Concepcion
Nobyembre 29-Disyembre 7
Tan-awa ang among mga kapanguhaan alang sa Adbiyento!
Mga Pamalandong sa Balaang Kasulatan
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santo sa Adlaw – San Ambrosio, Obispo ug Doktor sa Simbahan—Handumanan
Mga Kapilian sa mga Basahon sa Misa
Hulagway sa ibabaw: Ang Paralitiko nga Gipaubos Agi sa Atop, obra ni James Tissot




