February 12, 2021
Friday of the Fifth Week in Ordinary Time
Readings for Today
Nahibulong gayod sila ug miingon, “Maayo ang tanan Niyang gibuhat. Iyang gipadungog ang mga bungol ug gipasulti ang mga amang.” Marcos 7:37
Kining mga pulonga mao ang panapos sa sugilanon sa pag-ayo ni Jesus sa usa ka bungol nga adunay usab depekto sa pagsulti. Gidala ang maong tawo ngadto kang Jesus, gilain siya ni Jesus gikan sa uban, ug misinggit, “Ephphatha!” (nga nagpasabot, “Maablihi!”), ug naayo ang tawo. Ug bisan tuod kini usa ka talagsaong gasa alang niining tawhana ug usa ka buhat sa dakong kalooy ngadto kaniya, nagpadayag usab kini nga buot sa Dios nga gamiton kita aron madala ang uban ngadto Kaniya.
Sa natural nga kahimtang, kitang tanan walay katakos sa pagpaminaw sa tingog sa Dios kon Siya mosulti. Gikinahanglan nato ang gasa sa grasya alang niini. Tungod niini, sa natural nga kahimtang, dili usab kita makahimo sa pagsulti sa daghang kamatuoran nga buot sa Dios nga atong isulti. Kini nga sugilanon nagtudlo kanato nga buot usab sa Dios nga ayohon ang atong mga dalunggan aron madungog nato ang Iyang malumong tingog ug badbaron ang atong mga dila aron mahimo kitang Iyang tigpamaba.
Apan kini nga sugilanon dili lamang mahitungod sa pagsulti sa Dios ngadto sa matag usa kanato; nagpadayag usab kini sa atong katungdanan sa pagdala ngadto kang Cristo sa uban nga wala pa makaila Kaniya. Gidala kini nga tawo sa iyang mga higala ngadto kang Jesus. Ug gilain ni Jesus ang tawo gikan sa uban. Naghatag kini kanato og pagsabot kon unsaon nato pagtabang ang uban nga makaila sa tingog sa atong Ginoo. Kasagaran, kon buot natong ipaambit ang Ebanghelyo sa uban, lagmit makigsulti kita kanila ug maningkamot sa pagkombinsir kanila pinaagi sa pangatarongan nga itugyan ang ilang kinabuhi ngadto kang Cristo. Ug bisan tuod kini usahay makapamunga og maayo, ang tinuod natong tumong kinahanglan mao ang pagtabang kanila nga makig-uban sa atong Ginoo nga sila ra sa makadiyot aron mahimo ni Jesus ang pag-ayo.
Kon tinuod nga giablihan sa atong Ginoo ang imong mga dalunggan, mabadbar usab ang imong dila. Ug kon mabadbar lamang ang imong dila makahimo ang Dios sa pagdala sa uban ngadto Kaniya pinaagi kanimo. Kay kon dili, ang imong buhat sa pag-ebanghelyo magsalig lamang sa imong kaugalingong paningkamot. Busa, kon adunay mga tawo sa imong kinabuhi nga daw wala mamati sa tingog sa Dios ug wala mosunod sa Iyang balaang kabubut-on, nan una sa tanan, ipasalig ang imong kaugalingon sa pagpaminaw mismo sa atong Ginoo. Tugoti ang imong mga dalunggan nga mamati Kaniya. Ug kon madungog mo Siya, ang Iyang tingog na unya ang mosulti pinaagi kanimo sa paagi nga Iyang gitinguha aron maabot ang uban.
Pamalandongi karon kining hitabo sa Ebanghelyo. Palandonga ilabina ang mga higala niining tawhana samtang gidasig sila sa pagdala kaniya ngadto kang Jesus. Hangyoa ang atong Ginoo nga gamiton ka sa samang paagi. Uban sa pag-ampo, palandonga ang mga tawo sa imong kinabuhi nga buot sa Dios nga tawgon ngadto Kaniya pinaagi sa imong pagpataliwala, ug itugyan ang imong kaugalingon sa pag-alagad sa atong Ginoo aron ang Iyang tingog makasulti pinaagi kanimo sa paagi nga Iyang pilion.
My good Jesus, please open my ears to hear all that You wish to say to me and please loosen my tongue so that I will become a mouthpiece of Your holy word to others. I offer myself to You for Your glory and pray that You will use me in accord with Your holy will. Jesus, I fully trust in You.
You can now follow us on Gab and MeWe
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
Featured image above: Healing of the deaf and mute
