Marso 20, 2022
Ikatulong Domingo sa Kwaresma (Tuig C)
Pahinumdom: Kon gamiton ang mga Skrutinyo sa Misa, mahimong gamiton ang pamalandong alang sa Tuig A puli niini.
Paminaw sa Iningles
“Sir, pasagdi lang kini niining tuiga, ug akong bungkalon ang yuta sa palibot niini ug abunohan; basin mamunga pa kini sa umaabot. Kon dili, mahimo na nimo kining putlon.” Lucas 13:8–9
Ang matag hardinero nasayod nga ang maayong bunga nag-agad, sa usa ka bahin, sa maayong yuta. Apan adunay ubang mga hinungdan nga importante usab aron makapamunga og maayo. Ang tanom kinahanglang walay sakit, makadawat og tubig ug kahayag sa adlaw, matanom sa mainit nga palibot, mapung-ongan sa hustong paagi, ug adunay igong luna aron motubo. Kon anaa kining tanang mga kahimtang, seguradong maayo ang bunga.
Ingon usab niana ang atong kinabuhi. Ang yuta nga angay natong katamnan mao ang kalooy sa Dios. Ug kini nga yuta mao ang labing tabunok nga atong makaplagan aron motubo ang mga hiyas sa atong kinabuhi. Ang Dios usab ang naghatag sa adlaw, sa ulan, ug sa kainit nga gikinahanglan sa atong pagtubo. Apan, kon gamiton nato kining pagtandi, kinahanglan natong tugotan nga pung-ongan kita. Kinahanglan usab natong tugotan nga abunohan ug bungkalon ang yuta sa nagkalainlaing paagi. Bisan tuod si Jesus ang Hardinero sa atong kinabuhi, husto usab nga moingon nga kita mga hardinero sa diwa nga kinahanglan kitang motambayayong sa atong Ginoo, nga nagsalig sa labaw-sa-kinaiyahan nga mga tabang sa Magbubuhat aron masiguro ang himsog nga pagtubo sa atong espirituhanong kinabuhi, ug sa ingon mamunga ang maayong bunga sa hiyas sa atong kinabuhi.
Ang teksto sa ibabaw mao ang kataposan sa Sambingay sa Kahoy nga Igos. Sa wala pa kining teksto, ang tag-iya sa ubasan, ang Dios nga Amahan, nagsugo nga putlon ang kahoy nga igos nga walay bunga aron dili na kini makahurot sa katambok sa yuta. Apan ang atong maloloy-ong Ginoo, nga gipadala sa Amahan aron bungkalon ang yuta sa atong kinabuhi, nagtinguha sa paghatag og usa pa ka higayon, ug ang Amahan miuyon tungod sa gugma. Kining kinabuhia mao kanang “tuig” diin ang atong Ginoo makugihong nagtrabaho aron bungkalon ang yuta sa atong palibot. Kinahanglan kitang motambayayong pinaagi sa adlaw-adlaw nga pag-ampo, pagkamatinumanon sa Iyang mga sugo, mga buhat sa mahigugmaong pagsakripisyo, ug pagtugyan sa Iyang probidensya. Sa kataposan, kon tugotan nato ang atong Ginoo sa pagbuhat sa tanan Niyang gitinguha, ang atong kinabuhi mamunga og maayo.
Apan sa laing bahin, ayaw gayod pagsayop sa pagsabot niini: kon ang atong kinabuhi dili mamunga og maayo, “putlon” kita. Ang pagpamunga og maayo dili usa lamang ka kapilian; kini usa ka kinahanglanon. Kini usa ka tin-aw nga timailhan sa atong espirituhanong kahimsog ug mahimong sukdanan sa atong walay kataposang ganti o walay kataposang kamatayon. Ayaw kahadlok sa ingon ka hait nga mga pulong gikan sa atong Ginoo. Gisulti Niya kini uban sa gugma aron masayod kita sa atong seryosong katungdanan sa pagpamunga og maayo sa atong kinabuhi.
Pamalandongi karon ang makita nga mga timailhan sa imong sulodnong espirituhanong kahimsog. Nakita ba nimo ang mga hiyas nga nanurok sa imong kinabuhi? Nasayod ka ba sa buhat nga gitinguha sa Dios diha sa imong kalag aron bungkalon kini ug abunohan sa grasya ug kalooy? Ingna Siya og “Oo” karong adlawa ug tugoti kana nga grasya nga makapamunga og daghang maayong bunga.
Ginoo ko nga puno sa hiyas, gidapit Ko Ikaw sa pagsulod sa akong kalag aron bungkalon kini ug abunohan sa Imong grasya. Palihog putla ug kuhaa ang akong mga sala ug tabangi ako nga mogamot pag-ayo diha sa sustansya sa Imong kalooy. Nagbasol ako sa mga paagi nga napakyas ako sa pagpamunga sa akong kinabuhi. Karon gitugyan ko ang akong kaugalingon Kanimo aron ang Imong pag-atiman makaayo sa tanan kong mga balatian ug kahuyang. Jesus, misalig ako Kanimo.
40 ka Adlaw sa Tiilan sa Krus:
Usa ka Mahigugmaong Pagtan-aw Gikan sa Kasingkasing sa Atong Mahal nga Inahan
Pamalandong Napulog-unom – Ang Labing Dako sa mga Milagro
(Ikatulong Domingo sa Kwaresma)
Dugang pang mga Video nga Pamalandong sa Ebanghelyo sa Domingo
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Kapanguhaan alang sa Kwaresma
Mga Pamalandong sa Balaang Kasulatan alang sa Kwaresma
Mga Santos/Kasaulogan Karong Adlawa
Mga Kapilian sa mga Basahon sa Misa
