Machi 20, 2022
Jumapili ya Tatu ya Kwaresima (Mwaka C)
Tanbihi: Ibada za uchunguzi zinapofanyika katika Misa Takatifu, tafakari ya Mwaka A inaweza kutumiwa badala ya hii.
Sikiliza kwa Kiingereza
“Bwana, uuache mwaka huu pia, nami nitalima udongo unaouzunguka na kuutia mbolea; huenda ukazaa matunda baadaye. Usipozaa, unaweza kuukata.” Luka 13:8–9
Kila mkulima anajua kwamba kupatikana kwa matunda mema hutegemea, kwa kiasi fulani, kuwepo kwa udongo mzuri. Lakini mambo mengine pia ni muhimu katika uzalishaji wa matunda mema. Mmea lazima usiwe na magonjwa, upate maji na mwanga wa jua, upandwe katika mazingira yenye joto, upogolewe ipasavyo, na uwe na nafasi ya kutosha ya kukua. Mambo yote hayo yanapokuwepo, matunda mema hupatikana kwa hakika.
Ndivyo ilivyo pia katika maisha yetu. Udongo ambamo tunapaswa kupandwa ni huruma ya Mungu. Nao ndio udongo wenye rutuba nyingi kuliko yote unaoweza kupatikana ili kukuza fadhila katika maisha yetu. Mungu pia hutupatia jua, mvua na joto linalohitajika kwa ukuaji wetu. Lakini, kwa kutumia mfano huu, ni lazima tukubali kupogolewa. Pia ni lazima tukubali udongo utiwe mbolea na ulimwe kwa njia mbalimbali. Ingawa Yesu ndiye Mkulima wa maisha yetu, ni sahihi pia kusema kwamba sisi ni wakulima kwa maana ya kwamba ni lazima tushirikiane na Bwana wetu, tukitegemea misaada ya Kimungu ya Muumba ili kuhakikisha kwamba maisha yetu ya kiroho yanakua vizuri na hivyo kuzaa matunda mema ya fadhila katika maisha yetu.
Kifungu hiki hapo juu ni hitimisho la Mfano wa Mtini. Mara tu kabla ya kifungu hiki, mwenye shamba la mizabibu, Mungu Baba, aliamuru mtini usiozaa ukatwe ili usiendelee kumaliza rutuba ya udongo. Lakini Bwana wetu mwenye huruma, aliyetumwa na Baba kulima udongo wa maisha yetu, anaomba utolewe nafasi moja zaidi, naye Baba anakubali kwa upendo. Maisha haya ndiyo “mwaka” huo ambao katika huo Bwana wetu anafanya kazi kwa bidii kulima udongo unaotuzunguka. Ni lazima tushirikiane Naye kwa sala ya kila siku, uaminifu kwa amri Zake, matendo ya kujitoa sadaka kwa upendo na kujikabidhi kwa maongozi Yake. Hatimaye, tukimruhusu Bwana wetu kufanya yote anayotamani, maisha yetu yatazaa matunda mema.
Lakini kwa upande mwingine, msikose kuelewa ukweli huu: ikiwa maisha yetu hayazai matunda mema, “tutakatwa.” Kuzaa matunda mema si jambo la hiari, ni lazima. Ni ishara iliyo wazi ya afya yetu ya kiroho, na kutakuwa kipimo cha thawabu yetu ya milele au kifo chetu cha milele. Msiogope maneno makali namna hii yanayotoka kwa Bwana wetu. Aliyasema kwa upendo ili tujue wajibu mzito tulio nao wa kuzaa matunda mema katika maisha yetu.
Tafakari leo juu ya ishara za nje zinazoonyesha afya yako ya ndani ya kiroho. Je, unaona fadhila zikichipuka katika maisha yako? Je, unatambua kazi ambayo Mungu anatamani kufanya katika nafsi yako ili kuilima na kuitia mbolea ya neema na huruma? Mwambie “Ndiyo” leo, na uiruhusu neema hiyo izae matunda mema kwa wingi.
Bwana wangu mwenye fadhila, nakukaribisha ndani ya nafsi yangu ili uilime na kuitia mbolea ya neema Yako. Tafadhali pogoa dhambi zangu na unisaidie kuzamisha mizizi yangu ndani kabisa katika lishe ya huruma Yako. Ninasikitika kwa namna nilivyoshindwa kuzaa matunda katika maisha yangu. Sasa najikabidhi Kwako ili utunzaji Wako uponye maovu na udhaifu wangu wote. Yesu, nakutumainia.
Siku 40 Chini ya Msalaba:
Mtazamo wa Upendo Kutoka Moyoni mwa Mama Yetu Mbarikiwa
Tafakari ya Kumi na Sita – Muujiza Mkuu Kuliko Yote
(Jumapili ya Tatu ya Kwaresima)
Tafakari Zaidi za Injili ya Jumapili kwa Video
Tafakari juu ya Huruma ya Mungu
Tafakari za Maandiko Matakatifu kwa Kipindi cha Kwaresima
Machaguo ya Masomo ya Misa Takatifu
