மார்ச் 20, 2022
தவக்காலம் மூன்றாம் ஞாயிறு (ஆண்டு C)
குறிப்பு: திருப்பலியில் ஆய்ந்தறிதல் சடங்குகள் இடம்பெறும்போது, இந்தச் சிந்தனைக்குப் பதிலாக ஆண்டு A சிந்தனையைப் பயன்படுத்தலாம்.
“ஐயா, இந்த ஆண்டும் இதை விட்டுவையுங்கள்; இதைச் சுற்றிலும் நிலத்தைக் கொத்தி உரமிடுவேன்; வருங்காலத்தில் இது கனி தரக்கூடும். இல்லாவிட்டால் இதை வெட்டிவிடலாம்.” லூக்கா 13:8–9
நல்ல கனி விளைவது ஓரளவுக்கு நல்ல மண் இருப்பதைச் சார்ந்துள்ளது என்பது ஒவ்வொரு தோட்டக்காரருக்கும் தெரியும். ஆனால், நல்ல கனி விளைவதற்கு வேறு காரணிகளும் முக்கியமானவை. செடி நோயின்றி இருக்க வேண்டும்; அதற்குத் தண்ணீரும் சூரிய ஒளியும் கிடைக்க வேண்டும்; அது வெப்பமான சூழலில் நடப்பட வேண்டும்; முறையாகக் கவாத்துச் செய்யப்பட வேண்டும்; வளர்வதற்குப் போதுமான இடமும் இருக்க வேண்டும். இந்தக் காரணிகள் அனைத்தும் அமையும்போது, நல்ல கனி விளைவது உறுதி.
நம் வாழ்விலும் அவ்வாறே. நாம் நடப்பட வேண்டிய மண் கடவுளின் இரக்கமே. நம் வாழ்வில் நற்பண்புகள் விளைவதற்குக் கிடைக்கக்கூடிய மிக வளமான மண் இதுவே. நம் வளர்ச்சிக்குத் தேவையான சூரியனையும் மழையையும் வெப்பத்தையும் கடவுளே அளிக்கிறார். ஆனால், இந்த ஒப்புமையின்படி சொல்வதென்றால், நாம் கவாத்துச் செய்யப்படுவதற்கு நம்மையே அனுமதிக்க வேண்டும். மண்ணுக்குப் பல்வேறு வழிகளில் உரமிடவும் அதைப் பண்படுத்தவும் நாம் அனுமதிக்க வேண்டும். இயேசுவே நம் வாழ்வின் தோட்டக்காரர் என்றாலும், நாமும் தோட்டக்காரர்கள் என்று சொல்வது பொருத்தமானதே. ஏனெனில், நம் ஆண்டவருடன் நாம் ஒத்துழைக்க வேண்டும். நம் வாழ்வில் நற்பண்புகளின் நல்ல கனிகள் விளையும்படி, நமது ஆன்மிக வாழ்வின் ஆரோக்கியமான வளர்ச்சிக்காகப் படைப்பாளரின் இயற்கைக்கு அப்பாற்பட்ட கொடைகளை நாம் சார்ந்திருக்க வேண்டும்.
மேலே உள்ள பகுதி அத்திமர உவமையின் முடிவாகும். இந்தப் பகுதிக்கு சற்று முன்னர், திராட்சைத் தோட்டத்தின் உரிமையாளரான தந்தையாம் கடவுள், கனி தராத அத்திமரம் இனியும் மண்ணின் வளத்தை உறிஞ்சாதபடி அதை வெட்டிவிடுமாறு கட்டளையிட்டார். ஆனால், நம் வாழ்வின் மண்ணைப் பண்படுத்தும் பணிக்காகத் தந்தையால் அனுப்பப்பட்ட நம் இரக்கமுள்ள ஆண்டவர், இன்னுமொரு வாய்ப்பை அளிக்க விரும்புகிறார்; தந்தையும் அன்பினால் அதற்கு இணங்குகிறார். நம்மைச் சுற்றியுள்ள மண்ணைப் பண்படுத்த நம் ஆண்டவர் ஆர்வமுடன் உழைக்கும் அந்த “ஆண்டு”தான் இந்த வாழ்க்கை. அன்றாட இறைவேண்டல், அவரது கட்டளைகளுக்கு உண்மையாக இருத்தல், அன்பினால் செய்யும் தியாகச் செயல்கள், அவரது பராமரிப்புக்கு நம்மையே ஒப்படைத்தல் ஆகியவற்றின் வழியாக நாம் ஒத்துழைக்க வேண்டும். இறுதியில், நம் ஆண்டவர் தாம் விரும்புவதையெல்லாம் செய்ய நாம் அனுமதித்தால், நம் வாழ்வு நல்ல கனி தரும்.
ஆனால் மறுபுறம், நம் வாழ்வு நல்ல கனி தராவிட்டால், நாம் “வெட்டப்படுவோம்” என்ற உண்மையைப் பற்றித் தவறாக எண்ணிவிடாதீர்கள். நல்ல கனி தருவது நம் விருப்பத்திற்குட்பட்டதல்ல; அது கட்டாயமானது. அது நமது ஆன்மிக நலத்தின் தெளிவான அடையாளம்; நமக்குக் கிடைக்கும் நிலைவாழ்வின் கைம்மாறு அல்லது நிலையான சாவுக்கான அளவுகோலாகவும் அது அமையும். நம் ஆண்டவரிடமிருந்து வரும் இத்தகைய கடுமையான சொற்களைக் கண்டு அஞ்சாதீர்கள். நம் வாழ்வில் நல்ல கனி தர வேண்டிய மிக முக்கியமான கடமை நமக்கு இருப்பதை நாம் அறிந்துகொள்ளும்படி அவர் அன்போடு இவ்வாறு கூறினார்.
உங்கள் உள்ளார்ந்த ஆன்மிக நலத்தை வெளிப்படுத்தும் அடையாளங்களைப் பற்றி இன்று சிந்தியுங்கள். உங்கள் வாழ்வில் நற்பண்புகள் துளிர்விடுவதைக் காண்கிறீர்களா? உங்கள் ஆன்மாவைப் பண்படுத்தி, அருளாலும் இரக்கத்தாலும் அதற்கு உரமிடுவதற்காகக் கடவுள் செய்ய விரும்பும் பணியை நீங்கள் உணர்ந்திருக்கிறீர்களா? இன்று அவருக்கு “ஆம்” என்று சொல்லுங்கள்; அந்த அருள் ஏராளமான நல்ல கனிகளை விளைவிக்க அனுமதியுங்கள்.
நற்பண்புகள் நிறைந்த என் ஆண்டவரே, என் ஆன்மாவைப் பண்படுத்தி, உமது அருளால் அதற்கு உரமிடும்படி உம்மை அதற்குள் வர அழைக்கிறேன். என் பாவங்களைக் கவாத்துச் செய்து அகற்றும்; ஊட்டமளிக்கும் உமது இரக்கத்தில் என் வேர்களை ஆழமாகப் பதிக்க எனக்கு உதவும். என் வாழ்வில் கனி தரத் தவறிய விதங்களுக்காக நான் மனம் வருந்துகிறேன். உமது அக்கறையான பராமரிப்பு என் தீமைகளையும் பலவீனங்களையும் குணமாக்கும்படி, இப்போது என்னையே உம்மிடம் ஒப்படைக்கிறேன். இயேசுவே, நான் உம்மில் நம்பிக்கை வைக்கிறேன்.
சிலுவையடியில் 40 நாட்கள்:
நம் அருள்மிகு அன்னையின் இதயத்திலிருந்து ஓர் அன்புப் பார்வை
சிந்தனை பதினாறு – புதுமைகளில் மிகப் பெரியது
(தவக்காலம் மூன்றாம் ஞாயிறு)
மேலும் பல ஞாயிறு நற்செய்தி காணொளிச் சிந்தனைகள்
தவக்காலத்திற்கான திருவிவிலியத் தியானங்கள்
இன்றைய புனிதர்கள்/திருவிழாக்கள்
திருப்பலி வாசிப்புகளுக்கான தெரிவுகள்
