Agosto 11, 2023
Biyernes sa Ikanapulog-walong Semana sa Ordinaryong Panahon
Mga Pagbasa Karong Adlawa
Santa Clara, Birhen—Handumanan
Paminaw sa Iningles
“Unsa may kapuslanan sa tawo kon maangkon niya ang tibuok kalibotan apan mawad-an siya sa iyang kinabuhi? O unsa may ikahatag sa tawo baylo sa iyang kinabuhi?” Mateo 16:26
Gusto ka bang “makaangkon sa tibuok kalibotan?” Daghang tawo ang maghanduraw nga mahimong hilabihan ka adunahan ug makapalit sa tanang butang nga ilang gipangandoy. Ang uban nagdamgo nga makahimo og bayanihong mga buhat nga magpabantog kanila ug makapadani sa pagdayeg sa katawhan. Ang uban usab nagdamgo nga makabaton og dakong gahom niining kalibotana ug mahimong mahinungdanong tawo. Bisan tuod walay usa niini nga daotan sa iyang kaugalingon, ang dili masukod nga pagtinguha niini makadaot sa imong relasyon sa Diyos. Ug kon ang usa niini nga mga tinguha mahimong labing nagpatigbabaw ug molukop sa imong tibuok pagkatawo, ang sangpotanan mao ang pagkawala sa imong walay kataposang kalag.
Kon maghisgot kita bahin sa “kalibotan,” mahimo kining sabton sa lainlaing paagi. Una, nagtumong kini sa tanang materyal nga butang niining kalibotana—pananglitan, ang labing lamian nga pagkaon ug ilimnon, pagpatuyang sa kaugalingon, mga kalipay sa unod, materyal nga bahandi, ug ang tanang temporaryo ug lumalabay niining kinabuhia. Ikaduha, ang “kalibotan” mahimong magtumong sa garbo ug sa tinguha nga tagdon ug dayegon. Mahitabo kini kon malukop kita sa kabalaka bahin sa gihunahuna ug gisulti sa uban mahitungod kanato. Ikatulo, ang “kalibotan” mahimong magtumong sa tinguha alang sa gahom aron ipatuman ang atong kaugalingong kabubut-on. Sa labing taas nga ang-ang, kini kasagaran maoy hinungdan sa mga gubat tali sa mga nasod. Ang usa ka pangulo adunay tinguha sa pagmando ug pagkontrolar. Kini nga tinguha alang sa gahom ug pagkontrolar mahimo usab nga makaapekto sa matag tawo sa bisan unsang bahin sa iyang kinabuhi, lakip ang pamilya, mga higala, trabaho, mga pundok nga iyang gikauban, ug uban pa.
Ang komon niining tulo ka pananglitan sa kalibotanong mga tinguha mao ang pagkalimbong nga kon mas daghan ka niini, mas matagbaw ka. Bisan tuod makahatag kini kanimo og temporaryo ug lumalabay nga katagbawan, kini nga mga tinguha adunay usab sangpotanan nga makaguba sa imong kalag. Kini tungod kay kinahanglan kitang mopili. Pilion nato ang pagtagbaw sa espirituhanong pangandoy sa atong mga kalag, o ang pagtagbaw sa atong kaugalingon pinaagi sa lumalabay nga mga saad sa kalibotan. Dili nato mahimong maangkon ang duha.
Angay hinumdoman nga ang pagbaton og bahandi, ang pagdayeg kanato sa katawhan, o ang pagbutang kanato sa usa ka posisyon sa gahom dili daotan sa iyang kaugalingon. Sa pagkatinuod, ang bisan hain niini makahatag og kahigayonan sa pagbuhat og maayo. Motungha ang problema kon tinguhaon sa usa ka tawo ang usa niining kalibotanong mga butanga tungod sa hakog nga mga hinungdan ug sa sayop nga pagtuo nga makahatag kini og hingpit nga katagbawan. Sa tinuod lang, ang bisan hain niining mga kahimtanga nagpabug-at og tinuod nga krus sa tawo nga naningkamot sa pag-alagad sa Diyos lamang. Tinuod ang responsibilidad nga kauban sa bahandi, kadungganan, o gahom. Busa, kon maangkon ang usa o labaw pa niini, kinahanglan kining dumalahon nga walay pagkagapos niini ug uban sa pagpaubos.
Pananglitan, kon ang usa ka tawo mahimong adunahan kaayo, nagpabilin gihapon ang sugo nga magkinabuhi nga ang espiritu dili mahigot sa materyal nga mga butang. Busa, niining kahimtanga, ang materyal nga bahandi nagdala og usa ka palas-anon diha sa dagway sa tentasyon. Bisan tuod mabuntog gayod kini nga tentasyon ug magamit ang bahandi alang sa kaayohan, tinuod ang kakuyaw ug kinahanglan kining kanunayng ilhon. O, kon dayegon ka sa daghan tungod sa imong gibuhat, o kon hatagan ka og dakong responsibilidad ug awtoridad ibabaw sa uban, kinahanglan usab nga motubo ang imong pagpaubos ug ang imong kagawasan gikan sa pagkagapos niini aron ang Diyos, ug ang Diyos lamang, magpabiling bugtong tumong sa imong tinguha.
Pamalandongi karon ang imong mga tinguha. Unsay imong gusto sa kinabuhi? Gusto ba nimo nga “maangkon ang tibuok kalibotan?” Nagtinguha ka ba nga makab-ot bisan ang pipila lamang sa kalibotanong mga ambisyon? Kon mao, pagbantay. Matinud-anong pamalandongi ang mga tinguha sa sulod sa imong kasingkasing ug paningkamoti nga maputli kini aron ang kabubut-on lamang sa Dios ang imong tinguhaon. Kon mahitabo na kini, dili na igsapayan kanimo kon adunahan ka o kabos, gidayeg o gisaway sa publiko, gitugyanan og kalibotanong gahom o wala. Ang bugtong mahinungdanon mao nga gamiton nimo ang tanan alang sa himaya sa Dios, sumala sa Iyang hingpit nga kabubut-on nga naghatag og katagbawan.
Labing mahimayaong Dios, ang Imong kabubut-on hingpit ug mao ang bugtong tinubdan sa katagbawan sa kinabuhi. Palihog putlia ang akong kalag gikan sa tanang tinguha nga alang lamang niining kalibotana. Hinaot nga ang akong bugtong tinguha sa kinabuhi mao ang pagtuman sa Imong balaang kabubut-on aron ang tanan kong naangkon magamit lamang alang sa Imong himaya. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Dugang nga Basahon – Santa Clara, Birhen—Handumanan
Mga Kapilian sa mga Basahon sa Misa
Pangunang Hulagway: gikan sa pixabay
