18 ऑगस्ट 2026
सामान्य काळातील विसाव्या आठवड्याचा मंगळवार
आजची वाचने
व्हिडिओ
येशू आपल्या शिष्यांना म्हणाला, “आमेन, मी तुम्हांला सांगतो, श्रीमंत माणसाला स्वर्गराज्यात प्रवेश करणे कठीण जाईल. मी तुम्हांला पुन्हा सांगतो, श्रीमंत माणसाने देवाच्या राज्यात प्रवेश करण्यापेक्षा उंटाला सुईच्या नेढ्यातून जाणे सोपे आहे.” हे ऐकून शिष्य फारच आश्चर्यचकित झाले आणि म्हणाले, “मग कोणाचे तारण होऊ शकेल?” मत्तय 19:23–25
आजच्या शुभवर्तमानाच्या प्रकाशात स्वतःला विचारा: तुम्हांला श्रीमंत व्हावेसे वाटते का? बहुतेकांना तसे वाटते. एखादे मोठे, सुंदर घर (किंवा अशी अनेक घरे) विकत घेण्याची कल्पना मोहक वाटू शकते. ज्याला सुखाचे जीवन म्हणतात असे जीवन जगण्याची, सुट्ट्यांमध्ये ऐषआरामाच्या सहलींना जाण्याची आणि महागड्या गाड्या चालवण्याची इच्छा सोडणे कठीण असते. ही इच्छा सोडण्याचा प्रयत्न तुम्ही करायला हवा का?
एका श्रीमंत तरुणाशी येशूने प्रेमाने केलेल्या संवादानंतर लगेचच आजचा शुभवर्तमानाचा उतारा येतो. तो तरुण येशूकडे येऊन म्हणाला होता, “गुरुजी, शाश्वत जीवन मिळवण्यासाठी मी कोणते चांगले कृत्य करावे?” येशूला त्या तरुणाच्या अंतःकरणातील चांगुलपणा दिसला, म्हणून त्याने सुज्ञपणे त्याला आणखी पुढे नेले. येशूने आज्ञा पाळण्यास सांगितले तेव्हा त्या तरुणाने आपण लहानपणापासून त्या पाळत आलो आहोत असे सांगितले. मग त्याने विचारले, “माझ्यात अजून काय उणे आहे?” येशूने त्याला प्रेमाने परिपूर्णतेचा मार्ग दाखवला: “जा, तुझ्याजवळ जे आहे ते विकून गरिबांना दे, म्हणजे तुला स्वर्गात संपत्ती मिळेल. मग ये आणि माझ्यामागे चल.” त्या श्रीमंत तरुणाला हे ऐकायचे नव्हते, म्हणून तो दुःखी होऊन निघून गेला. येशूने त्याला ज्या परिपूर्णतेकडे बोलावले होते, तिचा स्वीकार करण्याची त्याची अजून तयारी नव्हती.
आपल्या मूळ प्रश्नाकडे पुन्हा वळूया: तुम्हांला श्रीमंत व्हावेसे वाटते का? आजच्या शुभवर्तमानात तो तरुण निघून गेल्यावर येशू आपल्या जवळच्या शिष्यांकडे वळतो आणि त्यांना भौतिक संपत्तीचा धोका समजावून सांगतो. हे ऐकून शिष्यांना इतका धक्का बसला की त्यांच्या समजुतींनाच तडा गेल्यासारखे झाले. त्यांनी विचारले, “मग कोणाचे तारण होऊ शकेल?”
त्या श्रीमंत तरुणात आणि हे ऐकून हादरलेल्या शिष्यांतही आपण स्वतःला पाहिले पाहिजे. त्यांना कल्पनाही करता येणार नाही इतके समृद्ध त्यांनी व्हावे अशी येशूची इच्छा होती—पण या जगातील क्षणभंगुर वस्तूंच्या बाबतीत नव्हे. भौतिक संपत्ती वाईट नाही; आपल्या आणि आपल्या कुटुंबाच्या गरजा भागवण्यासाठी ती आवश्यक असते. पण पैसा आणि मालमत्ता आपल्याला खरे समाधान देऊ शकत नाहीत. पैसा आणि वस्तू आपल्याला आवडू शकतात, कारण ते काही काळ आपल्या इच्छा पूर्ण करतात आणि इंद्रियांना सुख देतात. पण चिरस्थायी दिलासा आणि खरे समाधान केवळ देवामध्ये आणि त्याच्या पवित्र इच्छेतच मिळते.
“मला श्रीमंत व्हावेसे वाटते का?” या प्रश्नावर विचार करताना आपण न कचरता ठामपणे म्हणायला हवे, “नाही!” ज्या गोष्टीबद्दल येशूने इतका स्पष्ट इशारा दिला, ती गोष्ट आपल्याला कशाला हवी? अर्थात, श्रीमंत माणसाला स्वर्गराज्यात प्रवेश करणे “अशक्य” आहे असे येशूने म्हटले नाही; पण ते “कठीण” आहे असे त्याने म्हटले. म्हणून संपत्ती बाळगणे म्हणजे आगीशी खेळण्यासारखे आहे. त्यात भाजण्याची शक्यता बरीच असते.
पैशाचेही असेच आहे. येशूची स्पष्ट शिकवण आणि त्या श्रीमंत तरुणाचे दुःख लक्षात घेऊन, आपण सर्वांनी थोडे थांबून पैसा आणि मालमत्ता यांच्याकडे पाहण्याची आपली दृष्टी तपासली पाहिजे. साधेपणाची, अगदी गरिबीचीही ओढ असणे ही अंतःकरणाची आदर्श वृत्ती आहे. इथे गरिबी म्हणजे दारिद्र्य नव्हे. तिचा अर्थ फारच थोडा संचय करणे, साधे आणि नम्र जीवन जगणे, आणि तरीही स्वतःसाठी व कुटुंबासाठी आवश्यक असलेल्या गोष्टींचा आनंद घेणे. तुम्हांला असे जीवन जगावेसे वाटते का? अशा जीवनातील शहाणपण आणि भौतिक संपत्तीने भरलेल्या जीवनातील धोके तुम्हांला समजतात का?
आज भौतिक संपत्ती आणि सुखसोयी यांविषयीच्या आपल्या इच्छा आणि दृष्टिकोन यांवर चिंतन करा. स्वतःला प्रामाणिकपणे विचारा: मला संपत्ती हा सुखाचा मार्ग वाटतो, की आध्यात्मिक गरिबीतून मिळणाऱ्या स्वातंत्र्याचा स्वीकार करण्यास मी खरोखर तयार आहे? येशूने त्या श्रीमंत तरुणाला दिलेल्या, जीवनाला नवी दिशा देणाऱ्या आमंत्रणाकडे ओझे म्हणून नव्हे, तर देणगी म्हणून पाहा. तुम्ही अजूनही कशाला धरून बसला आहात याचा विचार करा आणि ते सोडून देण्याचे धैर्य दाखवा. साधेपणात, उदारतेत आणि केवळ देवावर भरवसा ठेवण्यात आनंद मानणारे अंतःकरण घडवण्याचा प्रयत्न करा. असे केल्याने स्वर्गराज्यासाठी जगलेल्या जीवनाची अतुलनीय संपत्ती तुम्हांला सापडेल.
हे खऱ्या संपत्तीच्या प्रभू, या जगातील क्षणभंगुर संपत्तीपेक्षा कितीतरी मोलाचा शाश्वत खजिना आम्हाला केवळ तुझ्यातच सापडतो. पैसा आणि मालमत्ता यांच्यामुळे उद्भवणारे धोके ओळखण्यासाठी आणि साधेपणाचे व अनासक्तीचे जीवन स्वेच्छेने निवडण्यासाठी मला सुबुद्धी व सामर्थ्य दे. तू आणि तुझी पवित्र इच्छा हाच एकमेव खजिना मी शोधावा, जेणेकरून ज्या परिपूर्णतेसाठी मला पाचारण केले आहे, तिच्याकडे मी ओढला जाईन. हे येशू, माझा तुझ्यावर विश्वास आहे.
संत मोनिकाची नोव्हेना
(विशेषतः वाट चुकलेल्या मुलांसाठी ही प्रार्थना केली जाते)
१८–२६ ऑगस्ट
सामान्य काळासाठी पवित्र शास्त्रावरील चिंतन





