Aibu ya Kiburi

Oktoba 31, 2020
Jumamosi ya Juma la Thelathini la Mwaka
Masomo ya Leo

“Unapoalikwa na mtu kwenye karamu ya arusi, usikae mezani mahali pa heshima. Huenda amemwalika mgeni mwenye heshima kuliko wewe, na mwenyeji aliyewaalika ninyi wawili akakujia na kukuambia, ‘Mpishe mtu huyu mahali pako,’ nawe hapo utaenda kwa aibu kukaa mahali pa mwisho.”  Luka 14:8-9

Kwa kuwasimulia mfano huu wale waliokuwa wakila pamoja Naye nyumbani mwa Farisayo, Yesu anagusa mioyo yao.  Ni wazi kwamba miongoni mwa wasikilizaji Wake walikuwamo wengi waliotafuta kuthaminiwa na wengine na waliojali sana sifa zao katika jamii.  Kwao, lilikuwa wazo la kutisha kukaa mahali pa heshima karamuni, kisha kuaibishwa na mwenyeji kwa kuombwa kuhamia mahali pa chini zaidi.  Wale waliojishughulisha sana na hadhi katika jamii walielewa vizuri fedheha hiyo.

Yesu anatumia mfano huu wa kuaibisha ili kuonyesha wazi kiburi chao na hatari ya kuishi kwa kiburi namna hiyo.  Anaendelea kusema, “Kwa maana kila anayejikweza atashushwa, lakini anayejinyenyekeza atakwezwa.”

Hata tukijichunguza dhamiri mara nyingi namna gani kuhusu kiburi, bado haitoshi.  Kuna sababu ya kiburi kuitwa “Mama wa dhambi zote.”  Kiburi huongoza kwenye kila dhambi nyingine na, kwa namna nyingi, ndicho chanzo cha dhambi zote.  Kwa hiyo, ikiwa tunataka kujitahidi kufikia ukamilifu maishani, tunapaswa kutafuta unyenyekevu wa kweli kila siku.

Unyenyekevu si kitu kingine ila kuona mambo jinsi yalivyo.  Mtu mnyenyekevu hujiona katika mwanga wa ukweli wa Mungu.  Hili linaweza kuwa gumu kwa sababu linatuhitaji tujione kuwa dhaifu na wenye kumtegemea Mungu.  Tunaweza kutimiza mambo mengi ya kidunia kwa nguvu zetu wenyewe na kwa kufanya kazi kwa bidii.  Lakini hatuwezi kufikia furaha na wema tusipokuwa tayari kuukubali ukweli wa udhaifu wetu na wa kumtegemea Mungu kwa mambo yote.

Unyenyekevu pia husaidia kuitakasa mioyo yetu kutokana na jambo ambalo ni vigumu sana kuliacha.  Kiburi hutufanya tutamani sana kuthaminiwa na wengine na kuifanya furaha yetu itegemee kuthaminiwa huko.  Hiyo ni njia hatari ya kufuata, kwa sababu hutuacha tukitegemea daima maoni ya wengine.  Na mara nyingi mno, maoni ya wengine hutegemea vigezo visivyo vya kweli na vinavyoangalia mambo ya juu juu tu.

Tafakari leo jinsi ulivyo huru kutokana na maoni ya wengine yanayopotosha na yasiyo ya kweli.  Bila shaka, unahitaji kutafuta mara kwa mara ushauri kutoka kwa wale unaowajua na kuwapenda.  Lakini ni lazima ujifunze kumtegemea Mungu na Ukweli Wake pekee.  Ukifanya hivyo, utakuwa umesonga mbele sana katika njia ya unyenyekevu wa kweli.

Bwana, tafadhali nifanye mnyenyekevu.  Ondoa kiburi chote maishani mwangu ili niweze kukugeukia Wewe na kuyafuata mapenzi Yako pekee.  Nisaidie kuujali tu Ukweli unaouweka Wewe na kuutumia kuwa kipimo pekee cha nafsi yangu.  Yesu, nakutumainia.

Sala & Nyenzo kwa ajili ya Uchaguzi wa Marekani

Tafakari Zaidi za Injili

Tafakari juu ya Huruma ya Mungu

Watakatifu/Sikukuu za Leo

Machaguo ya Masomo ya Misa Takatifu

Picha: Chakula Nyumbani mwa Farisayo, na James Tissot