16 Februari 2022
Jumatano ya Juma la Sita la Kipindi cha Kawaida
Masomo ya Leo
Sikiliza kwa Kiingereza
Yesu alimshika kipofu mkono, akampeleka nje ya kijiji. Akampaka mate machoni, akaweka mikono juu yake na kumwuliza, “Je, unaona chochote?” Yule mtu akatazama juu, akajibu, “Ninaona watu wanaofanana na miti wakitembea.” Kisha akaweka mikono juu ya macho ya yule mtu mara ya pili, naye akaona vizuri; uwezo wake wa kuona ukarudi, naye akaweza kuona kila kitu kwa uwazi. Marko 8:23-25
Simulizi hili ni la pekee sana kwa sababu moja. Ni la pekee kwa sababu mara ya kwanza Yesu alipojaribu kumponya yule kipofu, alipona kwa kiasi tu. Aliweza kuona baada ya jaribio la kwanza la Yesu la kumponya upofu wake, lakini alichokiona kilikuwa “watu wanaofanana na miti wakitembea.” Ilibidi Yesu aweke mikono Yake juu ya macho ya yule mtu mara ya pili ili apone kabisa. Kwa nini ilikuwa hivyo?
Katika Injili zote, kila mara Yesu anapomponya mtu, uponyaji huo hutokana na imani aliyo nayo mtu huyo na anayoidhihirisha. Si kwamba Yesu hangeweza kumponya mtu asiye na imani; bali, ni kwamba hivi ndivyo Yeye alivyochagua kutenda. Aliufanya uponyaji utegemee imani kamili.
Katika simulizi hili la muujiza, inaonekana kwamba yule kipofu ana imani kiasi, lakini si kubwa. Kwa hiyo, Yesu anafanya jambo lenye maana kubwa. Anamruhusu yule mtu apone kwa kiasi tu ili kuonyesha upungufu wa imani yake. Lakini pia anatufunulia kwamba imani kidogo inaweza kuongoza kwenye imani kubwa zaidi. Yule mtu, alipoanza kuona kidogo, ni wazi kwamba alianza kuamini zaidi. Na imani yake ilipokua, Yesu akaweka mikono juu yake tena, na kukamilisha uponyaji wake.
Ni mfano mzuri sana kwetu! Baadhi ya watu wanaweza kuwa na imani kamili kwa Mungu katika mambo yote. Ikiwa wewe ni miongoni mwao, basi hakika umebarikiwa. Lakini kifungu hiki ni hasa kwa wale walio na imani, lakini bado wanahangaika. Kwa wale walio katika kundi hili, Yesu anawapa matumaini makubwa. Kitendo cha kumponya yule mtu mara mbili mfululizo kinatuambia kwamba Yesu ni mvumilivu na mwenye huruma, naye atachukua kile kidogo tulicho nacho, na kile kidogo tunachotoa, na kukitumia kadiri awezavyo kwa namna bora zaidi. Atafanya kazi ya kuibadili imani yetu ndogo ili tuweze kupiga hatua nyingine ya kumkaribia Mungu na kukua katika imani.
Hali hiyo pia inaweza kusemwa kuhusu dhambi. Wakati mwingine tuna majuto yasiyo kamili kwa ajili ya dhambi, na wakati mwingine tunatenda dhambi bila kujuta, ingawa tunajua kwamba ni kosa. Ikiwa hiyo ndiyo hali yako, basi jaribu kupiga angalau hatua moja ndogo kuelekea uponyaji unaotokana na msamaha. Jaribu, angalau kabisa, kutamani kwamba hamu yako ya kujutia dhambi itakua. Huenda hicho kikawa kiwango cha chini kabisa, lakini Yesu atakitumia.
Tafakari leo kuhusu huyu kipofu. Tafakari uponyaji huu wa hatua mbili na kuongoka huku kwa hatua mbili anavyopitia mtu huyu. Tambua kwamba huyu mtu ni wewe, na kwamba Yesu anataka kukusaidia kupiga hatua moja zaidi katika imani yako na katika toba yako kwa ajili ya dhambi.
Bwana wa huruma, nakushukuru kwa uvumilivu Wako mkuu kwangu. Ninajua kwamba imani yangu Kwako ni dhaifu na inapaswa kukua. Ninajua kwamba majuto yangu kwa dhambi zangu pia yanapaswa kuongezeka. Tafadhali, pokea imani yangu ndogo na majuto yangu machache kwa dhambi zangu, na uvitumie kunisogeza hatua moja karibu zaidi Nawe na moyo Wako wenye huruma. Yesu, nakutumainia.
Tafakari juu ya Huruma ya Mungu
Tafakari za Maandiko Matakatifu kwa Kipindi cha Mwaka
Machaguo ya Masomo ya Misa Takatifu
