తెలుగు

దేవుని వాక్యాన్ని స్వేచ్ఛగా పలకడం

గురువారం, మార్చి 28, 2019

తపస్సుకాలం మూడవ వారంలోని గురువారం

నేటి పఠనాలు

నేటి పునీతులందరూ

ఆంగ్లంలో వినండి

యేసు ఒక మూగ దయ్యాన్ని వెళ్లగొడుతున్నారు. ఆ దయ్యం బయటకు వెళ్లిపోయినప్పుడు, మూగవాడు మాట్లాడాడు; జనసమూహాలు ఆశ్చర్యపోయాయి.  లూకా 11:14

దేవుని వాక్యాన్ని బహిరంగంగా, నిజాయితీగా, స్పష్టంగా పలకకుండా మిమ్మల్ని ఏది అడ్డుకుంటోంది?  సువార్త ఎంతో అత్యవసరంగా కావలసినవారు ఎందరో ఉన్నారు.  జీవితంలో అయోమయానికి లోనై, మరింత గందరగోళానికి, నాశనానికి దారితీసే తప్పుడు మార్గంలో నడుస్తున్నవారు ఎందరో ఉన్నారు.  వారు ఈ మార్గంలో ప్రయాణిస్తుంటే మనం మౌనంగా ఉండిపోతున్నాం.  ఎందుకు?

పై సువార్తలో, ఒక దయ్యం కారణంగా మూగవాడైన వ్యక్తి గురించి వింటున్నాం.  యేసు ఆ దయ్యాన్ని వెళ్లగొట్టినప్పుడు, ఆ మూగవాడు మాట్లాడాడు; అనేకమంది ఆశ్చర్యపోయారు.  బహుశా ఆ వ్యక్తిని ఈ దయ్యం పూర్తిగా ఆవహించి ఉండవచ్చు; అతడు అనుభవించిన పీడన అతని మాటను కూడా హరించి ఉండవచ్చు.  ఈ దయ్యపు ప్రభావం నుండి విముక్తి పొందినప్పుడు, అతడు స్వేచ్ఛగా మాట్లాడాడు.

మనం అంతటి స్థాయిలో దయ్యపు ప్రభావాన్ని అనుభవించకపోయినా, తరచూ అలాంటి మూగ దుష్టాత్మల వల్ల ఆటంకాలకు, పీడనకు గురవుతుంటాం.  దేవుడు తెలియజేయాలనుకుంటున్న సందేశం ఎవరికి అత్యంత అవసరమో, వారికి సువార్తను స్వేచ్ఛగా, మనస్ఫూర్తిగా, ఆలస్యం చేయకుండా ప్రకటించడానికి మనం భయపడేలా దుష్టుడు తరచూ మనపై ప్రభావం చూపడానికి ప్రయత్నిస్తాడు.  ఇతరులతో మన విశ్వాసాన్ని పంచుకునే అవకాశం వచ్చినప్పుడు, “మూగ దుష్టాత్మలు” తరచూ మనల్ని అడ్డుకోవచ్చు, అయోమయానికి గురిచేయవచ్చు లేదా ఏదో ఒక భయంతో నింపవచ్చు.  పూర్తిగా వాటి అధీనంలోకి వెళ్లిపోవడం అరుదైనా, మనం తరచూ వాటి ప్రభావానికి లోనై, వాటివల్ల ఆటంకాలను ఎదుర్కొంటూనే ఉంటాం.

ఈ నీచమైన ఆత్మలు నిజంగా ఉన్నాయనీ, ఎంతోమంది వినవలసిన సత్యసందేశాన్ని మనం పలకకుండా మన నోరు మూయించడానికి అవి ప్రయత్నిస్తున్నాయనీ ఈ రోజు ధ్యానించండి.  వాటి ప్రభావానికి మనం భయపడకూడదు.  అలాంటి ఆత్మలన్నిటిపైనా యేసుకు సంపూర్ణ అధికారం ఉంది. మనం ఆయనను అనుమతిస్తే, మనపై వాటి ప్రభావాన్ని అణచివేయడానికి ఆయన వెనుకాడరు.  ఇతరులు ఆయననూ, ఆయన పరిపూర్ణ ప్రేమనూ తెలుసుకునేలా, ఆయన ప్రేమసందేశాన్ని ఏ సంకోచమూ లేకుండా పలికేందుకు మనల్ని విముక్తులను చేయాలని ఆయన కోరుకుంటున్నారు.  సత్యానికి, ప్రేమకు అలాంటి ఒక సాధనంగా మిమ్మల్ని ఉపయోగించుకోవడానికి ఆయనను అనుమతించండి.

ప్రభువా, అవసరంలో ఉన్నవారికి నీ ప్రేమపూర్వకమైన మాటలను చెప్పమని నీవు నన్ను పిలిచినప్పుడు, కొన్నిసార్లు నేను భయానికి లోనవుతున్నాను.  ఏమి చెప్పాలో తెలియని అయోమయంతో నాకు మాట పెగలడం లేదనిపిస్తుంది.  ప్రియ ప్రభువా, నీ వాక్యానికి పవిత్ర సాధనంగా ఉండటానికి, ఎంతో అవసరంలో ఉన్నవారికి నీ సత్యాన్ని ధైర్యంగా ప్రకటించటానికి దయచేసి నన్ను ఈ భయం నుండి విడిపించు.  యేసూ, నేను నీపై నమ్మకం ఉంచుతున్నాను.

సిలువ పాదాల చెంత 40 రోజులు – ఇరవై రెండవ ధ్యానం – “ఇదిగో, మీ రాజు!”

మరిన్ని సువార్త ధ్యానాలు

దైవకారుణ్య ధ్యానాలు

తపస్సుకాలం కోసం మరిన్ని