తెలుగు

యేసు పాదాలకు సుగంధతైలంతో అభిషేకం

ఏప్రిల్ 6, 2020
పవిత్ర వారంలోని సోమవారం
నేటి పఠనాలు

ఆంగ్లంలో వినండి

మరియ స్వచ్ఛమైన జటామాంసితో చేసిన ఖరీదైన సుగంధతైలాన్ని ఒక లీటరు తీసుకొని, యేసు పాదాలకు అభిషేకించి, తన తలవెంట్రుకలతో ఆయన పాదాలను తుడిచింది; ఆ తైలపు సువాసనతో ఇల్లంతా నిండిపోయింది.  యోహాను 12:3

యేసు పట్ల ఎంత వినయపూర్వకమైన, అందమైన ప్రేమచర్య ఇది!  ఈ సుగంధతైలం విలువ 300 రోజుల కూలికి సమానం.  అది ఎంతో పెద్ద మొత్తం!  దానిని అమ్మి, ఆ డబ్బును పేదలకు ఇవ్వాల్సిందని తనకు అనిపించిందంటూ యూదా ఈ చర్యను వ్యతిరేకించడం గమనించదగ్గ విషయం.  అయితే, యూదా డబ్బు సంచి నుండి దొంగిలిస్తుండేవాడు కాబట్టి, నిజానికి అతనికి ఆసక్తి ఉన్నది తన కోసం ఆ డబ్బుపైనే అని సువార్త స్పష్టంగా చెబుతోంది.  అంతకంటే ఎక్కువగా గమనించవలసినది యూదాకు యేసు ఇచ్చిన సమాధానం.  యేసు యూదాను మందలిస్తూ ఇలా అంటారు: “ఆమెను వదిలిపెట్టు. నా సమాధి దినం కోసం ఆమె దీన్ని ఉంచుకోనివ్వు. పేదలు ఎల్లప్పుడూ మీతో ఉంటారు, కానీ నేను ఎల్లప్పుడూ మీతో ఉండను.”

ఇదే మాట మరెవరైనా చెప్పి ఉంటే, అది స్వార్థంతో చెప్పినట్లుగా వినిపించేది.  కానీ ఆ మాట చెప్పింది యేసు; ఆయన ప్రేమలో పరిపూర్ణమైన నిస్వార్థం ఉంది.  మరి దీని అంతరార్థం ఏమిటి?  మరియకు ఏమి అవసరమో యేసుకు తెలుసు అన్నదే దాని అంతరార్థం.  ఆయన ఆ మాటలు చెప్పడం ద్వారా మనలో ప్రతి ఒక్కరికీ ఏమి అవసరమో వెల్లడించారు.  మనం ఆయనను ఆరాధించాలి, గౌరవించాలి, మన జీవితాలకు ఆయననే కేంద్రంగా చేసుకోవాలి.  ఆయన ఎదుట మనల్ని మనం తగ్గించుకొని, ఆయనకు సేవ చేయాలి.  మనం ఆయన పట్ల ఇలా ప్రవర్తించడం ఆయనకు అవసరం కాబట్టి కాదు, మనకు ఆయన పట్ల ఇలా ప్రవర్తించవలసిన అవసరం ఉంది కాబట్టి.  మన సొంత పవిత్రత, సంతోషం కోసం మనం చేయవలసినది వినయంతో, ప్రేమతో ఆయనను గౌరవించడమే.  యేసుకు ఇది తెలుసు; అందుకే మరియ చేసిన ఈ ప్రేమచర్యను బట్టి ఆయన ఆమెను గౌరవించారు.

ఈ సంఘటన మనల్ని కూడా అలాగే చేయమని ఆహ్వానిస్తోంది.  యేసువైపు దృష్టి సారించి, మన ఆరాధనకు, ప్రేమకు ఆయననే కేంద్రంగా చేసుకోమని ఆహ్వానిస్తోంది.  మన శ్రమనంతటినీ ఇష్టపూర్వకంగా ఆయన కోసం ధారపోయమని ఆహ్వానిస్తోంది (300 రోజుల కూలికి సమానమైన విలువగల సుగంధతైలం దీనికి సూచనగా ఉంది).  యేసు కోసం ఎంత ఖరీదైనది సమర్పించినా అది ఎక్కువ కాదు.  మనం చేసే ఒక్క ఆరాధనా కార్యం కంటే విలువైనది ఏదీ లేదు.

దేవుణ్ణి ఆరాధించడం సముచితం.  అన్నిటికంటే ముఖ్యంగా, మీరు ఏ వ్యక్తిగా ఉండాలని సృజించబడ్డారో ఆ వ్యక్తిగా మిమ్మల్ని మార్చే కార్యం అది.  దేవుణ్ణి పూజించడానికి, ఆరాధించడానికి మీరు సృజించబడ్డారు; మీ సమస్త అస్తిత్వంతో వినయంగా మన ప్రభువును గౌరవించినప్పుడు ఈ ఉద్దేశం నెరవేరుతుంది.  

మన ప్రభువు పట్ల మీ ఆరాధన ఎంత లోతుగా ఉందో నేడు ధ్యానించండి.  మీ జీవనాధారమంతటినీ ఆయనపై “ధారపోయడానికి” మీరు సిద్ధంగా ఉన్నారా?  మీ దృష్టిలో ఆయన విలువ 300 రోజుల కూలికంటే ఎక్కువేనా?  మీ జీవితంలో ఆయనకే అత్యంత ప్రధాన స్థానం ఉందా?  ప్రతిరోజూ ఆయన ఎదుట మిమ్మల్ని మీరు తగ్గించుకొని, ప్రార్థనలో మీ హృదయాన్ని ఆయన ముందు ధారపోస్తున్నారా?  మరియ యేసుకు అర్పిస్తున్న ఈ వినయపూర్వక ఆరాధనా కార్యాన్ని ధ్యానించి, ఆమె అందమైన ఆదర్శాన్ని అనుసరించడానికి ప్రయత్నించండి.

ప్రభువా, ఈ పవిత్ర స్త్రీ అయిన మరియ ఆదర్శాన్ని నేను అనుసరించేలా చేయుము.  నీ ఎదుట నన్ను నేను తగ్గించుకొని, నా జీవితమంతటితో నిన్ను గౌరవించడానికి నాకు సహాయం చేయుము.  ప్రియమైన ప్రభువా, జీవితంలో నీకంటే, నిన్ను సంపూర్ణంగా ఆరాధించడంకంటే ముఖ్యమైనది ఏదీ లేదు.  ప్రియమైన ప్రభువా, నన్ను నీ దగ్గరకు ఆకర్షించుము, నీ మహిమ ఎదుట నన్ను వినయపరచుము; నా సమస్త అస్తిత్వంతో నిన్ను ప్రేమించడానికి, ఆరాధించడానికి నాకు సహాయం చేయుము.  యేసూ, నేను నీపై నమ్మకం ఉంచుతున్నాను.

సిలువ పాదాల చెంత 40 రోజులు – నలభయ్యవ ధ్యానం – సమాధి నిశ్శబ్దం

తపస్సుకాలం కోసం వనరులు

పవిత్ర వారపు ప్రార్థనలు

మరిన్ని సువార్త ధ్యానాలు

దైవకారుణ్య ధ్యానాలు

నేటి పునీతులు/పండుగలు

దివ్యబలిపూజ పఠనాల ఎంపికలు