జూన్ 19, 2021
సామాన్య కాలం పదకొండవ వారంలోని శనివారం
నేటి పఠనాలు
పునీత రొమువాల్డ్, మఠాధిపతి—ఐచ్ఛిక స్మరణ

ఆంగ్లంలో వినండి
యేసు తన శిష్యులతో ఇలా అన్నారు: “ఎవరూ ఇద్దరు యజమానులకు సేవ చేయలేరు. ఒకరిని ద్వేషించి మరొకరిని ప్రేమిస్తారు, లేదా ఒకరిపట్ల నిష్ఠ కలిగి మరొకరిని తృణీకరిస్తారు. మీరు దేవునికీ మమ్మోనుకీ సేవ చేయలేరు.” మత్తయి 6:24
మమ్మోను అనేది ధనానికి మరో పేరు. మీరు దేవునికైనా ధనానికైనా సేవ చేయడాన్ని ఎంచుకోవాలి గానీ, రెండింటికీ సేవ చేయలేరని యేసు స్పష్టంగా చెబుతున్నారు. విభజితమైన హృదయం సరిపోదు. పునీత సిలువ యోహాను తన ఆధ్యాత్మిక ప్రామాణిక గ్రంథమైన “కార్మెల్ పర్వతారోహణం”లో ఇటువంటి విషయాన్నే వివరిస్తారు. మనం కోరుకునేదంతా దేవుడూ ఆయన పవిత్ర చిత్తమూ మాత్రమే అయ్యేంతగా మన కోరికలు పూర్తిగా శుద్ధి కావాలని ఆయన చెబుతారు. మనం దేవునిపట్ల ఏకనిష్ఠ కలిగి ఉండేలా జీవితంలోని మిగిలిన ప్రతి కోరికా తొలగిపోవాలి. అంటే మన ప్రేమ అంతటికీ దేవుడు, కేవలం దేవుడు మాత్రమే లక్ష్యంగా ఉండాలనా? అవును, నిశ్చయంగా. అయితే ఆ సత్యాన్ని సరిగ్గా అర్థం చేసుకోవాలి.
ప్రేమించమని దేవుడు మనకు ఇచ్చిన పిలుపును పరిశీలించినప్పుడు, మనం దేవుణ్ణి మాత్రమే కాకుండా జీవితంలోని మరెన్నో విషయాలను కూడా ప్రేమించాలనేది నిజం. మనం కుటుంబ సభ్యులను, స్నేహితులను, పొరుగువారిని, మన శత్రువులను సైతం ప్రేమించాలి. మన జీవితంలోని ఇతర అంశాలైన మన పిలుపు, మన ఉద్యోగం, మన ఇల్లు, ఏదైనా అభిరుచి మొదలైనవాటిని కూడా మనం ప్రేమిస్తున్నామని ఆశించవచ్చు. అలాంటప్పుడు, మనం ప్రేమించవలసిన ఇతర విషయాలు ఎన్నో ఉన్నప్పుడు, దేవుణ్ణి ఏకనిష్ఠతో ఎలా ప్రేమించగలం?
దీనికి సమాధానం చాలా సరళమైనది. దేవునిపట్ల ప్రేమ ఎటువంటిదంటే, దేవుణ్ణి మాత్రమే మన ప్రేమకూ భక్తికీ ఏకైక లక్ష్యంగా చేసుకున్నప్పుడు, ఆయనపట్ల మనకున్న ప్రేమ మానవాతీతంగా పొంగిపొర్లుతుంది. దేవునిపట్ల ప్రేమ స్వభావం ఇదే. మనం దేవుణ్ణి ప్రేమిస్తున్నకొద్దీ, ఇతరులను, మన జీవితంలోని వివిధ అంశాలను కూడా ప్రేమించడం ద్వారా తనను ప్రేమించమని దేవుడు మనల్ని పిలుస్తున్నట్లు గ్రహిస్తాము. మనం దేనిని ప్రేమించాలని దేవుడు కోరుతున్నారో దానిని ప్రేమిస్తూ, దేవుని చిత్తంలో ఇమిడి ఉన్న సమస్తం పట్ల మన ప్రేమను వ్యక్తపరుస్తున్నప్పుడు కూడా, మన పూర్ణ హృదయంతో, మనస్సుతో, ఆత్మతో, శక్తితో దేవుణ్ణే ప్రేమిస్తున్నాము.
అయితే, పైన పేర్కొన్న పవిత్ర గ్రంథ వాక్యానికి తిరిగి వద్దాం. మనం దేవుణ్ణీ ధనాన్నీ ఎందుకు ప్రేమించలేం? ఈ వాక్యభాగంలో “మమ్మోను” అనే మాటను అనారోగ్యకరమైన మమకారంగా, కోరికగా మారే ప్రేమగా అర్థం చేసుకోవాలి. ధనం పట్ల మన కోరికలు క్రమరహితంగా మారడానికి అనుమతిస్తూ, తద్వారా ఆ “ప్రేమ” నుంచి దేవుని చిత్తాన్ని మినహాయించే విధంగా మనం ధనాన్ని “ప్రేమించే” అవకాశం ఉంది. కేవలం దేవుని చిత్తానికి అనుగుణంగా ఉపయోగించినప్పుడు ధనం చెడ్డది కాదు. అటువంటి సందర్భంలో, మనం ఉపయోగించే ధనం దేవునికి గొప్ప మహిమను తెస్తుంది. కానీ ధనం గానీ, మనం కోరుకునే మరేదైనా గానీ, ఒక విధంగా చెప్పాలంటే, దానికదే ఒక స్వతంత్ర స్థానాన్ని సంతరించుకోవడం ప్రారంభించినప్పుడు, ఆ కోరిక దేవునిపట్ల మనకున్న ప్రేమకు విరుద్ధమవుతుంది. దేవుణ్ణి, కేవలం దేవుణ్ణి మాత్రమే ప్రేమించడం అంటే, దేవుణ్ణీ, జీవితంలో మనం ప్రేమించాలని ఆయన కోరే వాటన్నిటినీ ప్రేమించడమే.
దేవునిపట్ల ఏకనిష్ఠ కలిగి ఉండవలసిన అవసరాన్ని గురించి ఈ రోజు ధ్యానించండి. ఈ అనన్యమైన ప్రేమకు మిమ్మల్ని మీరు అంకితం చేసుకుంటూ, ఆయనలోనూ ఆయన ద్వారానూ ఎవరిని, దేనిని ప్రేమించమని దేవుడు మిమ్మల్ని పిలుస్తున్నారో కూడా ఆలోచించండి. ఆయన పరిపూర్ణ చిత్తం మిమ్మల్ని ఎటువైపు నడిపిస్తోంది? ఇతరులను ప్రేమించడం ద్వారా దేవునిపట్ల మీ ప్రేమను చూపడానికి మీకు ఎలాంటి పిలుపు అందుతోంది? అలాగే, ధనం పట్ల గానీ జీవితంలోని మరేదైనా విషయం పట్ల గానీ అనారోగ్యకరమైన మమకారం మీ జీవితపు ఏకైక, అంతిమ లక్ష్యం నుంచి మీ దృష్టిని మళ్లించడానికి మీరు ఏయే విధాలుగా అనుమతించారో పరిశీలించండి. మీరు ఏ విధంగా ప్రేమించడానికి సృష్టించబడ్డారో ఆ విధంగా స్వేచ్ఛగా ప్రేమించగలిగేలా, ఆ అనారోగ్యకరమైన కోరికలనూ తప్పుడు “ప్రేమలనూ” మీ హృదయం నుంచి తొలగించడానికి దేవుణ్ణి అనుమతించండి.
నా ప్రభువా, నా దేవా, నా ప్రేమ అంతటికీ నీవు అర్హుడవు. నీవు, నీవు మాత్రమే నా ప్రేమ అంతటికీ ఏకైక కేంద్రంగా ఉండాలి. ప్రియ ప్రభువా, నేను నిన్ను ప్రేమిస్తూ ఉండగా, దేనినంతటినీ మరింతగా ప్రేమించాలని నీ చిత్తం నన్ను నడిపిస్తుందో, దేనినంతటి నుంచీ మమకారాన్ని విడిచిపెట్టమని నీ చిత్తం నన్ను పిలుస్తుందో తెలుసుకోవడానికి నాకు సహాయం చేయి. నిన్ను మాత్రమే, నీ పవిత్రమైన, పరిపూర్ణమైన చిత్తంలో ఇమిడి ఉన్నవాటిని మాత్రమే నేను ఎంచుకునేలా అనుగ్రహించు. యేసూ, నేను నీపై నమ్మకం ఉంచుతున్నాను.
![]()
దైనందిన కతోలిక ధ్యానాలు
సామాన్య కాలం: మే 24–ఆగస్టు 31
క్రింది విక్రేతల వద్ద ఈ-పుస్తకంగా & పేపర్బ్యాక్గా లభిస్తుంది:
అమెజాన్ పేపర్బ్యాక్ – కిండిల్ – గూగుల్ ప్లే బుక్స్ – ఐబుక్స్ – బార్న్స్ & నోబుల్
సామాన్య కాలానికి పవిత్ర గ్రంథ ధ్యానాలు
నేటి పునీతులు – పునీత రొమువాల్డ్, మఠాధిపతి
పైన ప్రదర్శించిన చిత్రం: జేమ్స్ టిస్సోట్ చిత్రించిన అష్టభాగ్యాల ప్రసంగం, వికీమీడియా కామన్స్ ద్వారా




