తెలుగు

మేల్కొని ఉండండి!

నవంబరు 26, 2022
సామాన్య కాలపు ముప్పై నాలుగవ వారంలోని శనివారం
నేటి పఠనాలు

వీడియో

ఆంగ్లంలో వినండి

“విందువినోదాలు, మద్యమత్తు, దైనందిన జీవితపు చింతలవల్ల మీ హృదయాలు నిద్రమత్తులో పడిపోకుండా, ఆ రోజు ఒక ఉచ్చులా అకస్మాత్తుగా మీపైకి రాకుండా జాగ్రత్తపడండి.”  లూకా 21:34-35a

ఇది మన ఆరాధనా సంవత్సరపు చివరి రోజు!  ఈ రోజున, మన విశ్వాస జీవితంలో అలసత్వానికి లోనవడం ఎంత సులభమో సువార్త మనకు గుర్తుచేస్తుంది.  “విందువినోదాలు, మద్యమత్తు, దైనందిన జీవితపు చింతలవల్ల” మన హృదయాలు నిద్రమత్తులో పడిపోవచ్చని అది మనకు గుర్తుచేస్తుంది.  ఈ శోధనలను పరిశీలిద్దాం.

మొదటిగా, విందువినోదాలకు, మద్యమత్తుకు దూరంగా ఉండాలని మనకు హెచ్చరిక ఇవ్వబడుతోంది.  ఇది నిశ్చయంగా అక్షరార్థంలోనూ వర్తిస్తుంది; అంటే, మాదకద్రవ్యాల వాడకాన్ని, మద్యపాన దుర్వినియోగాన్ని మనం తప్పక నివారించాలి.  అయితే మితాన్ని పాటించకపోవడంవల్ల మనం “నిద్రమత్తులో” పడిపోయే అనేక ఇతర విధాలకూ ఇది వర్తిస్తుంది.  జీవిత భారాలనుంచి తప్పించుకోవడానికి మద్యపాన దుర్వినియోగం ఒక మార్గం మాత్రమే; ఇలా తప్పించుకోవడానికి ఇంకా అనేక మార్గాలున్నాయి.  ఏ విషయంలోనైనా మితిమీరడానికి మనం లొంగిపోయిన ప్రతిసారీ, ఆధ్యాత్మికంగా మన హృదయాలు నిద్రమత్తులో పడిపోవడానికి అనుమతించడం మొదలుపెడతాం.  దేవునివైపు తిరగకుండా జీవితం నుంచి క్షణికంగా తప్పించుకునే మార్గాలను వెదికినప్పుడల్లా, ఆధ్యాత్మిక నిద్రమత్తుకు మనల్ని మనమే లోనుకానిస్తాం.  

రెండవదిగా, ఈ వాక్యభాగం “దైనందిన జీవితపు చింతలను” నిద్రమత్తుకు ఒక కారణంగా పేర్కొంటుంది.  జీవితంలో మనం తరచూ ఆందోళనను ఎదుర్కొంటాం.  ఏదో ఒక విషయం మనల్ని ఉక్కిరిబిక్కిరి చేస్తూ, భరించలేని భారంగా అనిపించవచ్చు.  జీవితం భారంగా అనిపించినప్పుడు, దానినుంచి బయటపడే మార్గాన్ని వెదకడానికి మొగ్గుచూపుతాం.  అయితే చాలా తరచుగా, ఆ “బయటపడే మార్గం” మనల్ని ఆధ్యాత్మిక నిద్రమత్తులో పడవేసేదిగా ఉంటుంది.  

మన విశ్వాస జీవితంలో మేల్కొని, అప్రమత్తంగా ఉండమని మనకు సవాలు విసురుతూ యేసు ఈ సువార్త మాటలను పలుకుతున్నారు.  సత్యాన్ని మన మనస్సుల్లోను హృదయాల్లోను నిలుపుకొని, దేవుని చిత్తంపై మన దృష్టిని ఉంచినప్పుడు మనం అలా ఉండగలుగుతాం.  జీవిత భారాలవైపు మన దృష్టిని మళ్లించి, అన్నిటి మధ్యలో ఉన్న దేవుణ్ణి చూడలేకపోయిన క్షణమే, మనం ఆధ్యాత్మిక నిద్రమత్తులో పడిపోతాం; ఒక విధంగా చెప్పాలంటే, నిద్రలోకి జారుకోవడం మొదలుపెడతాం.  

ఈ రోజు ఆరాధనా సంవత్సరం ముగుస్తున్న వేళ, పూర్తిగా మేల్కొని ఉండమని దేవుడు మిమ్మల్ని పిలుస్తున్నారనే విషయాన్ని ధ్యానించండి.  మీ ధ్యాస అంతా తనపైనే ఉండాలని, మీ విశ్వాస జీవితంలో మీరు పూర్తిగా మెలకువతో ఉండాలని ఆయన కోరుకుంటున్నారు.  ఆయనపై మీ దృష్టిని నిలిపి, త్వరలో జరగబోయే తన పునరాగమనానికి ఆయన మిమ్మల్ని నిరంతరం సిద్ధంగా ఉంచనివ్వండి.

ప్రభువా, నేను నిన్ను నిజంగా ప్రేమిస్తున్నాను, నిన్ను మరింతగా ప్రేమించాలని కోరుకుంటున్నాను.  నా విశ్వాస జీవితంలో పూర్తిగా మెలకువగా ఉండేందుకు నాకు సహాయం చేయి.  నీవు నా దగ్గరకు వచ్చినప్పుడు నేను ఎల్లప్పుడూ నీ కోసం సిద్ధంగా ఉండేలా, అన్నిటిలోనూ నా దృష్టిని నీపైనే నిలిపి ఉంచేందుకు నాకు సహాయం చేయి.  యేసూ, నేను నీపై నమ్మకం ఉంచుతున్నాను.

మా ఆగమనకాల వనరులను చూడండి!

పవిత్ర గ్రంథ ధ్యానాలు

మరిన్ని సువార్త ధ్యానాలు

దైవకారుణ్య ధ్యానాలు

నేటి పునీతులు/పండుగలు

దివ్యబలిపూజ పఠనాల ఎంపికలు

పైన ప్రదర్శించిన ప్రధాన చిత్రం: మీరు నాతో ఒక్క గంట కూడా మేల్కొని ఉండలేకపోయారు — జేమ్స్ టిస్సోట్ కృతి, వికీమీడియా కామన్స్ ద్వారా