తెలుగు

మంచి కాపరి సంరక్షణలో

అక్టోబరు 5, 2023
సామాన్య కాలం ఇరవై ఆరవ వారంలోని గురువారం
నేటి పఠనాలు

ధన్య ఫ్రాన్సిస్ జేవియర్ సీలోస్, గురువు—అమెరికా సంయుక్త రాష్ట్రాల్లో ఐచ్ఛిక స్మరణ

పునీత ఫౌస్టినా కొవాల్స్కా, కన్య—ఐచ్ఛిక స్మరణ

వీడియో

ఆంగ్లంలో వినండి

యేసు మరొక డెబ్బై ఇద్దరు శిష్యులను నియమించి, తాను వెళ్లదలచిన ప్రతి పట్టణానికీ ప్రదేశానికీ తనకంటే ముందుగా వారిని ఇద్దరిద్దరుగా పంపారు. ఆయన వారితో ఇలా అన్నారు: “పంట సమృద్ధిగా ఉంది, కాని పనివారు కొద్దిమందే ఉన్నారు; కాబట్టి తన పంటకోతకు పనివారిని పంపమని పంట యజమానిని అడగండి. మీరు బయలుదేరండి; ఇదిగో, తోడేళ్ల మధ్యకు గొర్రెపిల్లలను పంపినట్లు నేను మిమ్మల్ని పంపుతున్నాను.”  లూకా 10:1–3

మన ప్రభువు తన శిష్యులను తోడేళ్ల మధ్యకు గొర్రెపిల్లల్లా ఎందుకు పంపుతారు? మొదట్లో ఇది మనకు ఆందోళన కలిగించి, వారికి హాని కలిగే పరిస్థితిలోకి మన ప్రభువు వారిని పంపుతున్నారా అని మనం అనుకునేలా చేయవచ్చు. దీనిపై వ్యాఖ్యానిస్తూ పునీత అంబ్రోస్, ఈ శిష్యులు భయపడాల్సిన అవసరం లేదని వివరిస్తారు. ఎందుకంటే యేసు తన గొర్రెలను ఎల్లప్పుడూ కాపాడే మంచి కాపరి. ఈ ప్రేషిత కార్యంలోనూ, భవిష్యత్తులోని ప్రేషిత కార్యాలన్నిటిలోనూ ఈ శిష్యులకు ఎలాంటి ప్రమాదం ఎదురవుతుందో ధ్యానించడం, ఆ ప్రమాదాన్ని మనం భయపడవలసిన ఏకైక ప్రమాదంతో పోల్చి చూడటం ప్రయోజనకరం.

ఈ సందర్భంలోని “తోడేళ్లు” ముఖ్యంగా ఆనాటి క్రూరులైన కొందరు మత, పౌర నాయకులు; అలాగే శిష్యులను, వారి బోధనను తిరస్కరించేవారు కూడా. మన ప్రభువుకు, ఆయన శిష్యులకు ఎదురైన లౌకిక ప్రమాదాన్ని పరిశీలించినప్పుడు, అది హింసకు గురయ్యే ప్రమాదమని మనం చూస్తాము. కాని అది మనం భయపడవలసిన “ప్రమాదమా”? ఖచ్చితంగా కాదు, ఎందుకంటే యేసు దానిని ఎదుర్కొన్నప్పుడు ఎన్నడూ భయంతో వెనుకంజ వేయలేదు. ఇదే విధమైన హింస యేసు అనుచరులకు కూడా ఎలా ఎదురైందో అపొస్తలుల కార్యములలో మనం చూస్తాము. కాని దైవ దృక్కోణంలో, ఒకరి ఆత్మకు శాశ్వతమైన హాని కలిగించగల పాపం మాత్రమే నిజమైన “ప్రమాదం”. 

నిజమైన హాని కలిగించగలది పాపం, పాపం మాత్రమే; హింసగాని, మరణంగాని కాదు. కాబట్టి యేసు తన శిష్యులను “తోడేళ్ల మధ్యకు గొర్రెపిల్లల్లా” పంపినప్పుడు, ఈ లోకంలో వారు ఎదుర్కోబోయే హింస గురించి ఆయనకు పూర్తిగా తెలుసు. అయినా ఆయన వారిని ప్రోత్సహించి పంపారు. ఎందుకంటే చివరికి వారు హింసను, మరణాన్ని అనుభవించవలసి వచ్చినా, వాటి మధ్య వారు చూపే విశ్వాసం, ధైర్యం వారికి నిత్యజీవంలో పుణ్యఫలాన్ని చేకూరుస్తాయని, ఇతరుల విశ్వాస జీవితంలో కృపకు సాధనమవుతాయని ఆయనకు తెలుసు. తొలి కతోలిక సభలో తరచుగా చెప్పినట్లు, “వేదసాక్షుల రక్తం క్రైస్తవులకు విత్తనం.” అందుకే యేసు ఈ గొర్రెలను తోడేళ్ల మధ్యకు పంపినప్పుడు, మంచి కాపరిగా వారి ఆత్మలకు కూడా తోడుగా ఉన్నారు. వారి సద్గుణాన్ని కాపాడుతూ, విశ్వాసానికి సాక్ష్యమివ్వడంలో వారిని బలపరుస్తూ, భయం నుండి, పాపం నుండి వారిని రక్షించారు. తమ శరీర మరణానికిగాని, లోకంలో తమకున్న పేరుప్రతిష్ఠలు నశించడానికిగాని వారు భయపడాలని ఆయన కోరలేదు. బదులుగా, మంచి కాపరిగా తాను ఎంతో శక్తితో కాపాడే వారి ఆత్మల మరణానికి మాత్రమే వారు భయపడాలని ఆయన కోరారు.

తోడేళ్ల మధ్య గొర్రెపిల్లలా ఉండటానికి మన ప్రభువు మిమ్మల్ని కూడా పంపుతున్నారనే మహిమాన్విత సత్యాన్ని నేడు ధ్యానించండి. పాపానికి దారితీసే లెక్కలేనన్ని శోధనల నుండి మన ప్రభువు మిమ్మల్ని కాపాడతారని నమ్ముతూ, మీ జీవితంలో దేవుని చిత్తాన్ని నెరవేర్చడానికి మీకు మనోధైర్యం, సాహసం అవసరం. మీరు ముందుకు సాగుతున్నప్పుడు, లోకంలో ఇతరుల కఠినత్వం, తీర్పులు, వివిధ రూపాల్లో హింస కూడా ఎదురైతే ఆశ్చర్యపడకండి. అలా ఎదురైనప్పుడు సద్గుణంతో స్పందించండి. మీ జీవితంలో విశ్వాసం, నిరీక్షణ, ప్రేమ సజీవంగా ఉండేలా చూసుకోండి. శాశ్వతం కాని విధాల్లో మీకు హాని చేయగలవారికి భయపడకండి. బదులుగా, పరిణామాలు ఏవైనా సరే, ప్రేమించడానికి, మన లోకంలో దేవుని కారుణ్యాన్ని, సత్యాన్ని పంచడానికి మీకు అప్పగించబడిన కార్యంలో దృఢంగా నిలిచి ఉండండి. అలా చేయడం వల్ల మీ అంతరంగంలో లెక్కలేనన్ని కృపాశీర్వాదాలు లభిస్తాయి. మీరు ఊహించగల దానికంటే మించిన విధాల్లో దేవుడు మిమ్మల్ని తన కృపకు సాధనంగా ఉపయోగించగలుగుతారు.

ధైర్యవంతుడవైన నా ప్రభువా, ఈ లోకంలోని కాఠిన్యాన్ని, క్రౌర్యాన్ని నీవు ముఖాముఖిగా ఎదుర్కొన్నావు. చివరికి నీ ప్రాణాన్ని స్వేచ్ఛగా అర్పించడం ద్వారా నీ దివ్యప్రేమకు సాక్ష్యమివ్వడానికి అవే నీకు అవకాశమిచ్చాయి. దయచేసి నీ ప్రేషిత కార్యం కోసం నన్ను పంపుము. ఏ విధమైన హింసకూ భయపడకుండా, విశ్వాసమనే వరం ద్వారా భయమంతటినీ అధిగమిస్తూ, నీ పట్ల నాకున్న ప్రేమలో ఎల్లప్పుడూ స్థిరంగా ఉండేలా ప్రతి దివ్య సద్గుణంతో నన్ను బలపరచుము. ప్రియ ప్రభువా, నా జీవితం నీదే. నీ చిత్తప్రకారం నన్ను నడిపించుము. యేసూ, నేను నీపై నమ్మకం ఉంచుతున్నాను.

దైవకారుణ్యంపై దైనందిన ధ్యానాలు:
పునీత ఫౌస్టీనాతో 365 రోజులు

మరిన్ని సువార్త ధ్యానాలు

దైవకారుణ్య ధ్యానాలు

సామాన్య కాలానికి పవిత్ర గ్రంథ ధ్యానాలు

పునీతులందరూ/పండుగలు

నేటి పునీతులు – 

ధన్య ఫ్రాన్సిస్ జేవియర్ సీలోస్, గురువు—అమెరికా సంయుక్త రాష్ట్రాల్లో ఐచ్ఛిక స్మరణ

పునీత ఫౌస్టినా కొవాల్స్కా, కన్య—ఐచ్ఛిక స్మరణ

దివ్యబలిపూజ పఠనాల ఎంపికలు

పైన ప్రదర్శించిన చిత్రం: ఆయన వారిని ఇద్దరిద్దరుగా పంపారు — చిత్రకారుడు జేమ్స్ టిస్సో, వికీమీడియా కామన్స్ ద్వారా


దైవకారుణ్యంపై దైనందిన ధ్యానాలు:
పునీత ఫౌస్టీనాతో 365 రోజులు

ఈ-పుస్తకం & పేపర్‌బ్యాక్ రూపాల్లో లభిస్తుంది