ஜூன் 14, 2022
பொதுக்காலம் பதினொன்றாம் வாரத்தின் செவ்வாய்க்கிழமை
இன்றைய வாசகங்கள்
“ஆனால் நான் உங்களுக்குச் சொல்கிறேன்: உங்கள் விண்ணகத் தந்தையின் பிள்ளைகளாகும்படி, உங்கள் பகைவர்களிடம் அன்பு செலுத்துங்கள்; உங்களைத் துன்புறுத்துவோருக்காக இறைவனிடம் வேண்டுங்கள்.” மத்தேயு 5:44-45a
நம் ஆண்டவர் அளிக்கும் இந்தக் கட்டளை எளிதானதல்ல. ஆனால் இது அன்பின் கட்டளை.
முதலில், நம் பகைவர்களிடம் அன்பு செலுத்த அவர் நம்மை அழைக்கிறார். நம் பகைவர்கள் யார்? நாம் வேண்டுமென்றே வெறுக்கத் தீர்மானித்தவர்கள் என்ற பொருளில் நமக்குப் “பகைவர்கள்” யாரும் இல்லை என்று நம்புவோம். ஆனால் நம் வாழ்வில் சிலர்மீது கோபம் கொள்ளும் சோதனை நமக்கு ஏற்படலாம்; அவர்களிடம் அன்பு செலுத்துவதும் நமக்குக் கடினமாக இருக்கலாம். ஒருவேளை, யாருடன் பழகுவது நமக்குப் போராட்டமாக இருக்கிறதோ, அவர்கள் எவரையும் நம் பகைவர்களாகக் கருதலாம்.
அவர்களிடம் அன்பு செலுத்துவது என்பது, நாம் அவர்களின் மிக நெருங்கிய நண்பர்களாக மாற வேண்டும் என்று அவசியம் பொருள்படாது. ஆனால் அவர்கள்மீது அக்கறையும் கரிசனையும் புரிதலும் மன்னிப்பும் கொண்ட உண்மையான பாசத்தை வளர்த்துக்கொள்ள நாம் முயல வேண்டும் என்பதே அதன் பொருள். எல்லாரிடமும் இத்தகைய பாசத்தைக் கொண்டிருப்பது கடினமாக இருக்கலாம்; இருப்பினும் அதுவே நம் இலக்காக இருக்க வேண்டும்.
இந்தக் கட்டளையின் இரண்டாம் பகுதி நமக்கு உதவும். நம்மைத் துன்புறுத்துவோருக்காக இறைவேண்டல் செய்வது, நாம் வளர்த்துக்கொள்ள வேண்டிய தகுந்த அன்பிலும் பாசத்திலும் வளர நமக்கு உதவும். அன்பின் இந்த அம்சம் மிகவும் கடினமானதாக இருந்தாலும், புரிந்துகொள்வதற்கு மிகவும் எளிமையானது.
யாரிடம் அன்பு செலுத்துவது உங்களுக்கு மிகவும் கடினமாக இருக்கிறதோ, அவர்களை நினைத்துப் பாருங்கள். யார்மீது உங்களுக்குக் கோபம் இருக்கிறதோ, அவர்களை நினைத்துப் பாருங்கள். அவர் உங்கள் குடும்ப உறுப்பினராகவோ, உடன் பணிபுரிபவராகவோ, அயலவராகவோ, அல்லது கடந்த காலத்தில் உங்கள் வாழ்வில் இருந்தும் இதுவரை நீங்கள் ஒப்புரவாகாத ஒருவராகவோ இருக்கலாம். வெளிப்படையாகவோ உள்ளத்திலோ, குறைந்தது ஒருவருடனாவது, அல்லது ஒன்றுக்கும் மேற்பட்டவர்களுடனாவது உறவாடுவதில் உங்களுக்குப் போராட்டம் இருப்பதை நேர்மையாக ஒப்புக்கொள்வது இந்த நற்செய்திப் பகுதிக்கு ஏற்புடையதே. இதை ஒப்புக்கொள்வது நேர்மையான ஒரு செயலே.
அந்த நபரை அல்லது நபர்களை அடையாளம் கண்டுகொண்டதும், அவர்களுக்காக நீங்கள் இறைவேண்டல் செய்கிறீர்களா என்று சிந்தித்துப் பாருங்கள். தவறாமல் நேரம் ஒதுக்கி, இறைவேண்டலில் அவர்களைக் கடவுளிடம் ஒப்புக்கொடுக்கிறீர்களா? கடவுள் தமது அருளையும் இரக்கத்தையும் அவர்கள்மீது பொழிய வேண்டுமென்று மன்றாடுகிறீர்களா? இதைச் செய்வது கடினமாக இருக்கலாம்; ஆனால் நீங்கள் செய்யக்கூடிய மிக நலமளிக்கும் செயல்களில் இதுவும் ஒன்று. அவர்களிடம் அன்பையும் பாசத்தையும் வெளிப்படுத்துவது கடினமாக இருக்கலாம்; ஆனால் அவர்களுக்காக இறைவேண்டல் செய்ய மனமறிந்து தீர்மானிப்பது கடினமல்ல.
யாருடன் பழகுவது நமக்குக் கடினமாக இருக்கிறதோ, அவர்களுக்காக இறைவேண்டல் செய்வதே, அவர்கள்மீது உண்மையான அன்பையும் அக்கறையையும் நம் இதயங்களில் கடவுள் வளர்க்க அனுமதிப்பதற்கான திறவுகோல். கோப உணர்வுகளையோ, ஏன் வெறுப்பு உணர்வுகளையும்கூட நாம் இனியும் பற்றிக்கொண்டிருக்க வேண்டியிராதபடி, நம் உணர்ச்சிகளையும் உணர்வுகளையும் கடவுள் சீரமைக்க அனுமதிக்கும் வழி இது.
யாருடன் பழகுவது உங்களுக்கு மிகுந்த போராட்டமாக இருக்கிறதோ, அவருக்காக இறைவேண்டல் செய்ய இன்று உங்களை அர்ப்பணியுங்கள். இந்த இறைவேண்டல் அவர்மீது நீங்கள் கொண்டுள்ள அன்பை ஒரே இரவில் மாற்றிவிடுவதற்குப் பெரும்பாலும் வாய்ப்பில்லை. ஆனால் ஒவ்வொரு நாளும் இவ்வாறு இறைவேண்டல் செய்வதில் நீங்கள் உறுதியாக இருந்தால், காலப்போக்கில் கடவுள் உங்கள் இதயத்தை மெதுவாக மாற்றுவார். எல்லா மனிதர்களிடமும் நீங்கள் கொண்டிருக்க வேண்டுமென அவர் விரும்பும் அன்புக்கு இடையூறாக இருக்கக்கூடிய கோபம், மனக்காயம் ஆகியவற்றின் சுமையிலிருந்து உங்களை விடுவிப்பார்.
நிறைவான அன்பின் ஆண்டவரே, நான் யாருக்காகச் செபிக்க வேண்டுமென்று நீர் விரும்புகிறீரோ, அவருக்காகச் செபிக்கிறேன். எல்லா மனிதரையும் அன்பு செய்ய எனக்கு உதவும்; குறிப்பாக, அன்பு செய்யக் கடினமாக இருப்பவர்களை அன்பு செய்ய எனக்கு உதவும். அவர்கள் மீதான என் உணர்வுகளைச் சீர்படுத்தி, எவ்விதக் கோபமும் இன்றி வாழ எனக்கு உதவும். இயேசுவே, உம்மீது நம்பிக்கை வைக்கிறேன்.
திருஇருதய நவநாள்
நவநாள் தேதிகள்: ஜூன் 15-23, 2022
ஜூன் 24, 2022: திருஇருதயப் பெருவிழா
இன்றைய புனிதர்கள்/திருவிழாக்கள்
திருப்பலி வாசிப்புகளுக்கான தெரிவுகள்
